Zaaki 5 - Bibeli do fee

Laabaau iyi à sɔ̃ ilu fia ŋa

¹ Nsɛi, iŋɛ ilu fia ŋa, i gbɔ iyi ǹ wa n sɔ̃ ŋɛ. I kpata i cã kpokpo ŋa na wahala ŋa iyi aa naa si ŋɛ.

² Amani nŋɛ ŋa à sãmi, nɔ tũtũ ŋa à jɛ ibɔ nŋɛ ŋa má.

³ Wura nŋɛ ŋa do isɔ fũfũ nŋɛ ŋa fei à mu atɛ. Atɛ ku mu nŋaui á jɛ sɛɛda si ŋɛ nɔ ku ŋɔ ara nŋɛ bɛi ina. Ì ko amani ì tɔtɔɔɛ ŋa si waatii ankãanyiu ihɛ̃.

⁴ Wee i ci ya sãa woo da amaajɛ nŋɛ ŋa fia nŋa. I cɔ inɔ kufɔ nŋa ŋa. Anu ku dɔ̃i inɛ ŋau í to hee si itĩi Aɔ̃ Lafɛ̃ɛi lele do ilɛ.

⁵ Ì ce kuwɛɛ nŋɛ ŋa si andunya do amani nla nla do faayi. Ì jɛ ì ce kaato bɛi angudã iyi aa bɔò asɔ laga ŋa.

⁶ Ì yɛ taalei inɛ dee dee ŋa ì kpa ŋa ŋa, a kù nɔ a kù kɔ̀ò ara nŋa.

Temua do kutɔɔ

⁷ Kpaasim ŋa, iŋɛ fei i yɔkɔ temua ŋa hee Lafɛ̃ɛ koo nyiò wa má. I cɔ bɛi woo logoo i ya temua ku maa cɔ ilɛɛ hee amaajɛɛ koo jĩaò. Temuai í ya ce ku yɛò ijĩ sinte hee do ti ankãanyiɛ fei.

⁸ Iŋɛ mɔ i yɔkɔ temua ŋa, i jɔ̀ idɔ nŋɛ ku leekĩ dim dim ŋa, domi kunaai Lafɛ̃ɛ í maai wa mbɛ.

⁹ Iŋɛ kpaasim ŋa, i maà ya yɛ taalei njɛ ŋa ku ba Ilaaɔ̃ mɔ ku maà na ku yɛ taale nŋɛ. Woo kiiti wee wa to wa, wa bi ku lɔ wa.

¹⁰ Iŋɛ kpaasim ŋa, i ye gigii walii ŋa iyi à fɔ ide wo do irii Lafɛ̃ɛ. I sìsì temua nŋa iyi à ce si ijuukpã nŋa.

¹¹ Aa ka yɔkɔ ka ni ilu inɔ didɔ̃ ŋai domi ngu ŋa à yɔkɔ temua. Ì gbɔ temuai Zɔɔbu ŋa, nɔ ì mà mii iyi Aɔ̃ Lafɛ̃ɛ ilu araare si jiida ku jɛɛ í ceaa ŋa si anyii wahalaɛ.

¹² Iŋɛ kpaasim ŋa, iyi í re mɔm, i maà ya ce kugbasi do lele ŋa walakɔ do ilɛ walakɔ do ide mmu gɔ. Bii ntɔi, i ni ntɔi, bii ibo mɔi i ni iboi, ku ba i maà na i dasi kiitii Ilaaɔ̃ ŋa.

¹³ Wahala í ba inɛ gɔ nŋɛi? Ku ce kutɔɔ. Inɔi inɛ gɔ nŋɛ wa dɔ̃i? Ku saabu Ilaaɔ̃ do iri ku kɔ̃.

¹⁴ Inɛ akã nŋɛ wa ce bɔ̃ɔi? Ku kpe inɛ ngboi igbɛi inɛi Jesu ŋa, aŋai aa jɔaa ikpo si iri do irii Lafɛ̃ɛ nɔ a ceaa kutɔɔ.

¹⁵ Kutɔɔ do naanɛu á faaba bɔ̃ɔu. Aɔ̃ Lafɛ̃ɛ á muaa baani, bii í nɔ í ce dulum nii á kpa idei dulum dɛɛ.

¹⁶ Na nŋu, iŋɛ fei i ce tuubai dulum du ŋɛ si wajui njɛ ŋa nɔ i ya cea njɛ kutɔɔ ŋa ku ba i ba iri ŋa. Kutɔɔi inɛ dee dee í nɛ gbugbã nla nla.

¹⁷ Elii amanɛi bɛi awa mɔ. Í ce kutɔɔ ntɔ ntɔ ijĩ ku maà wɔ, ijĩu í nɔ í leekĩ zakai adɔ̃ mɛɛta do cukpa mɛɛfa.

¹⁸ Si anyii nŋu nɔ í ce kutɔɔ má nɔ Ilaaɔ̃ í jɔ̀ ijĩ í wɔ nɔ í jɔ̀ ijɛ í fita si ilɛ.

¹⁹ Iŋɛ kpaasim ŋa, bii inɛ gɔ nŋɛ í jĩò ntɔ nɔ kpaasi gɔ í baaɛ wa si kpãai ntɔ,

²⁰ i mà ŋa, inɛ iyi í baaò ilu dulum wa hai si kpãa laalɔ bii í wa wo, í faaba hundei ilu dulum nɔui hai si kpãai iku, nɔ Ilaaɔ̃ á kpa dulum nkpɔ nkpɔɛ ŋau.