Zaaki 2 - Bibeli do fee

Maà ya cɔ bɛi amanɛ ŋa à reò njɛ do bɛɛrɛ

¹ Kpaasim ŋa, iŋɛ iyi ì dasi Lafɛ̃ɛ nwa Jesu Kirisi naanɛ, nŋu iyi í jɛ ilu amboe, i maà ya maa cɔ bɛi inɛ ŋa à reò njɛ do bɛɛrɛ ŋa.

² Yaase gɔ wee. Ilu fia gɔ iyi í nɛ ibɔ jiida do lɛlɛawɔi wura í naa si kutɔtɔɔ nŋɛ. To, wee ilu are gɔ mɔ í naa bɛ do ibɔ ku gaɛ.

³ Bii ì jirima ilu ibɔ jiidau ŋa nɔ ì ni ku buba si kitãi inɛ nla ŋa, nɔ ì sɔ̃ ilu areu mɔ ì ni ku leekĩ ihɔ̃, walakɔ ku buba ilɛ,

⁴ ì waa cɔ bɛi inɛ ŋa à reò njɛ do bɛɛrɛ ŋai. Nɔ ì waa kiiti inɛ ŋa mbɛ do lasabu iyi kù jɛ dee dee.

⁵ Iŋɛ baakɔɔm ŋa, i gbɔ. Inɛ ŋa iyi à jɛ ilu are si andunyau ihɛ̃i Ilaaɔ̃ í cica ku ba naanɛ nŋa ku la nɔ a baò bommaɛ iyi í wãò inɛ ŋa iyi à buu.

⁶ Amma iŋɛ, ì ya donda ilu are ŋaui. Wee ilu fia ŋaui à waa kpã ŋɛ iju nɔ aŋai à ya bɔò ŋɛ ile kiiti, mà iboi.

⁷ Aŋai à ya maa nya cɔɔi iri jiida iyi Ilaaɔ̃ í mu nŋɛ.

⁸ Kukɔi idei Ilaaɔ̃ í ni, bi inɛ mmu bɛi ì bi araɛ. Ntɔ ntɔ, mii jiidai ì waa ce bii ì waa too woodai bommai Ilaaɔ̃u bɛ ŋa.

⁹ Amma bii ì waa cɔ bɛi inɛ ŋa à reò njɛ do bɛɛrɛ ŋa, dulum nii ì waa ce ŋa nɔ woodai Ilaaɔ̃ á yɛ taale nŋɛ domi i kù waa jirimaɛ ŋa.

¹⁰ Ntɔ ntɔ, inɛ iyi wa jirima wooda ŋau nɔ í koosɛ baa si akã, í baa í jɛ ilu taalei si fei ndɛɛ.

¹¹ Inɛ iyi í ni, i maà ce sakara, nŋui í ni má, i maà kpa amanɛ. Na nŋu, baa bii i kù ce sakara, bii ì kpa amanɛ, ì kua woodai.

¹² Na nŋu, i ya fɔ ide nɔ i ya ce bɛi inɛ ŋa iyi wooda á kiiti. Woodau í ya nya inɛ.

¹³ Inɛ iyi kù nɛ araarei kpaasi, Ilaaɔ̃ á kiiti nŋu mɔi kaa ce araareɛ. Amma inɛ iyi í nɛ araarei kpaasi ŋa á jɛ igũ si ajɔi kiitiu.

Naanɛ ku dasi do icɛ ku ce

¹⁴ Kpaasim ŋa, riba yoomai amanɛ í nɛ bii í ni nŋu í jɛ woo dasi naanɛ nɔ kù waa ce kookoosuɛ. Naanɛu bɛ á faaba lafɛ̃ɛ?

¹⁵ Bii inɛ gɔ nŋɛ, inɛmɔkɔ walakɔ inaabo gɔ í nɛ arei jĩnɛ ku dasi, nɔ kù nɛ baa ijɛ iyi á jɛ,

¹⁶ nɔ inɛ gɔ nŋɛ ku ni, ka sukudɔ̃, i ya jɛ i yo, maà jɔ̀ tũtũ ku kpaɛ, bii kù muaa bukaatai mii iyi í nɛ, sukudɔ̃i mii wa niaa.

¹⁷ Bɛɛbɛ mɔi, naanɛ ku dasi iyi a kù waa yɛ kookoosuɛ, naanɛu ngbɛi.

¹⁸ Inɛ gɔ á yɔkɔ ku ni, inɛ ihɛ̃ í dasi naanɛ, inɛ ihɔ̃ mɔ wa ce kookoosuɛ. Amma amu an jɛaa n ni, nyisim naanɛ ku dasiɛ iyi kù jɛ do kookoosu, nɔ amu mɔ n nyisi naanɛ ku dasim do kookoosuɛ.

¹⁹ Kù jɛ ì dasi naanɛ iyi Ilaaɔ̃ akãi í wɛɛ? Í sĩa. Baa inɛi inɔɔko ŋa mɔ à mà bɛɛbɛ nɔ à waa yaya do njo.

²⁰ Amma awɔ iyi i kù nɛ laakai, ì bi n nyisiɛ iyi naanɛ ku dasii inɛ gɔ iyi kù waa ce kookoosuɛ, ngbɛi?

²¹ Bala nwa Aburahamu í jɛ dee dee si wajui Ilaaɔ̃ na kookoosuɛ iyi í ce, si bɛi í jɛsi nŋu ku saka amaɛ Izaaki ku ceaò Ilaaɔ̃ kuwee.

²² I kù yɛ naanɛ ku dasii Aburahamu njɛ do kookoosuɛ wa too njɛi ba. Naanɛ iyi í dasi í bàa í kɔ̃ na kookoosuɛ iyi wa ce.

²³ Bɛɛbɛi kukɔi idei Ilaaɔ̃u í ce iyi í ni, Aburahamu í dasi Ilaaɔ̃ naanɛ, nɔ do saabui naanɛu Aɔ̃ mɔ í kàa si inɛ dee dee. Nɔ à waa kpoo kpaasii Ilaaɔ̃.

²⁴ Debɛi amanɛ í ya jɛ dee dee si wajui Ilaaɔ̃i na saabui kookoosuɛ iyi wa ce, kù jɛ na naanɛ iyi í dasi nŋu akã.

²⁵ Bɛɛbɛ mɔi abo à ta icu iyi à ya kpe Rahabuu í ce. Í jɛ amanɛ dee dee si wajui Ilaaɔ̃ na kookoosuɛ ŋa si na iyi í jɔ̀ í gba inɛi Izirɛli woo bɛ ŋau si kpasɛ̃ɛ nɔ í nya ŋa do kpãa mmu.

²⁶ Ŋɔi í jɔ̀ à ni ara iyi kù nɛ hunde, ara ikui. Bɛɛbɛ mɔi naanɛ ku dasi iyi kù waa ce kookoosuɛ naanɛ ikui.