Zaaki 1 - Bibeli do fee

Zaaki í ce ŋa fɔɔ

¹ Amui Zaaki woo ce icɛi Ilaaɔ̃ do ti Lafɛ̃ɛ Jesu Kirisi. Ǹ ce dimii Zuifu maateeji ŋa iyi à fangaa si andunya fei fɔɔ.

Naanɛ do bisi

² Kpaasim ŋa, dimii laakai ku cɔ iyi á naa si ŋɛ fei i ya jɔ̀ ku jɛ nŋɛ inɔ didɔ̃ nla nla,

³ domi ì mà ŋa, bii Ilaaɔ̃ wa cɔ laakaii naanɛ ku dasi nŋɛ nɔ i kù mɔngɔ ŋa á bí nŋɛ temua.

⁴ Amma i jɔ̀ temua nŋɛu ku ce icɛɛ sãa sãa ku ba i jɛ inɛ ŋa iyi à jĩa nɔ à kɔ̃, nɔ nkãma kù gaizia ŋɛ má.

⁵ Do nŋu fei bii bisi í na wa gaizia inɛ akã nŋɛ gɔ, ku tɔɔ Ilaaɔ̃, nŋu iyi í ya mua inɛ fei do inɔ akã hai nɛ kugbagba.

⁶ Amma lafɛ̃ɛ ku ce kutɔɔ do naanɛ, ku maà sika sika, domi inɛ iyi wa sika sika í yɛi bɛi inyii tenku iyi fufu wa yaya bii fei.

⁷ Inɛ dimi bɛɛbɛ ku maà tamaa mà nŋu á ba ngɔgɔ hai bi Lafɛ̃ɛ,

⁸ domi í jɛ ilu idɔ minji iyi kù waa too kpãa akã si kuwɛɛɛ.

Are do fia ku nɛ

⁹ Ilu are woo dasi Jesu naanɛ ku tɔɔ fufu si na iyi í jɔ̀ Ilaaɔ̃ í soo lele.

¹⁰ Ilu fia mɔ ku tɔɔ fufu na irii kukayeɛ domi á na ku lɔ bɛi kokoi jĩi.

¹¹ Bɛi inunu í ya dede do inya gbãa nɔ ku jo wua ku gbɛ, nɔ kokou ku cuku kusĩaɛ ku tã, bɛɛbɛ mɔi ilu fia á na ku wɔ́ bɛi kokoi jĩi si aninii icɛɛ.

Laakaii inɛ ku cɔ do kulɛlɛ

¹² Ilu inɔ didɔ̃i inɛ iyi í yɔkɔ í leekĩ dim dim si waati iyi Ilaaɔ̃ wa cɔ laakaiɛ, domi si anyii laakai ku cɔu á ba ribai kuwɛɛ hai tã iyi Aɔ̃ Lafɛ̃ɛ í wãò inɛ ŋa iyi à buu.

¹³ Bii à waa lɛlɛ inɛ gɔ do laalɔ ku maà ti ku ni Ilaaɔ̃i wa lɛlɛ nŋu. A ci ya lɛlɛ Ilaaɔ̃ do laalɔ, bɛɛbɛ mɔi nŋu takaɛ ci ya lɛlɛ inɛ gɔ do laalɔ.

¹⁴ Amma waati iyi binɛi inɛ í faa í muu, nŋu bɛi í jɛ kulɛlɛ.

¹⁵ Si anyiɛ, bii binɛu í na í la, dulum nii á bía. Bii dulum nɔu í ce icɛ siɛ í tã nɔ ku bía iku.

¹⁶ Baakɔɔm ŋa, i maà lɛlɛ ara nŋɛ.

¹⁷ Amua jiida do amua kusĩa baa yooma fei hai lelei Aɔ̃i í ya naa. Wa naai hai bi Ilaaɔ̃ Baaba, nŋu iyi í ce inya kumái lele ŋa. Ilaaɔ̃ ci ya kpaasi nɔ ilu kuku kù wa siɛ.

¹⁸ Si idɔɔbiɛ, í bí wa isɛ gbeejisia do saabui ide ntɔɛ ku ba hai si inɛ ŋa iyi í taka fei ka jɛ bɛi amaajɛ sinte ŋa iyi à jɛ tɛɛ.

Kugbɔ do kuce

¹⁹ Baakɔɔm ŋa, ì mà ideu ihɛ̃ tã ŋa. Na nŋu, í sĩa inɛ fei ku ya saku ku gbɔò ide, nɔ ku maà ya saasaò ide ku fɔ, nɔ idɔɛ ku maà ya kɔ̃ gbãa gbãa.

²⁰ Kù sĩa idɔi inɛ ku ya kɔ̃ gbãa gbãa domi kù jɛ do idɔɔkɔ̃i amanɛ á ceò mii iyi í jɛ dee dee si wajui Ilaaɔ̃.

²¹ Na nŋu, i nyɔ andi mii iyi í jɛ riisi do laalɔ fei ŋa. Nɔ i gba ide iyi Ilaaɔ̃ wa gbɛ̃ si idɔ nŋɛ ŋa do ara kukaye, domi ideui á yɔkɔ ku faaba ŋɛ.

²² I maà jɔ̀ i leekĩò ide ku gbɔ nŋu akã, amma i ya ceò icɛ ŋa. Bii kù jɛ bɛɛbɛ, ì waa dĩ ijui ara nŋɛ ŋai.

²³ Ntɔ ntɔ, inɛ iyi í gbɔ ideu nɔ kù waa ceò icɛ, í yɛi bɛi mɔkɔ gɔ iyi wa cɔ araɛ si digi.

²⁴ Iyi í cɔ digiu í tã nɔ í sinda wa nɛ, tengi bɛ gbakã nɔ í gbɛjɛ bɛi araɛ í yɛ.

²⁵ Amma inɛ iyi á jɛ ilu inɔ didɔ̃ si mii iyi wa ce fei nŋui í jɛ inɛ iyi wa cio wooda do laakai nɔ wa jirimaɛ do temua. Nɔ bii í gbɔ ideu ci ya gbɛjɛɛ nsɛi nsɛi amma í ya ceò icɛi. Lafɛ̃ɛ á jɛ ilu inɔ didɔ̃i si na iyi í jɔ̀ woodau í jɛ dee dee nɔ á nya inɛ.

²⁶ Inɛ iyi wa tamaa nŋu wa too kpãai Ilaaɔ̃ nɔ kù waa nɔ amɛɛ, lafɛ̃ɛ wa sɔa araɛ iboi. Kpãai Ilaaɔ̃ ku tooɛ ngbɛi.

²⁷ Kpãai Ilaaɔ̃ ku too iyi í má nɔ kù nɛ riisi kãma iyi Ilaaɔ̃ Baaba í jilɔɔ si í jɛ ntɔ, nŋui í jɛ inɛ ku ya ce araarei kɔyɔ ŋa do jaaɔ̃ ŋa iyi à waa wahala, nɔ ku mà araɛ ku mu si laalɔ yaamɔi andunya.