Woo lasabu 9 - Bibeli do fee

¹ Si mii ŋau bɛ fei, iyi ǹ lasabu, mii iyi ǹ yɛ wee. Kuwɛɛi inɛ dee dee ŋa do ilu bisi ŋa do kuce nŋa fei í wa si awɔi Ilaaɔ̃. A kaa yɔkɔ a mà bii Ilaaɔ̃ á dasi ŋa wahala walakɔ ku ce nŋa jiida, amma fei ndɛɛ á yɔkɔ ku ce.

² Golo akãi á cã inɛ fei hai inɛ dee dee hee do inɛ laalɔ fei, hai inɛ jiida iyi í maaju hee do inɛ iyi kù maaju, hai inɛ iyi í ya ce kuwee hee do inɛ iyi ci ya ce kuwee, hai inɛ iyi í ya ce jiida hee do inɛ iyi í ya ce dulum, hai inɛ iyi í ya cea Ilaaɔ̃ kuwã hee ku koo si inɛ iyi í ya ce njoi ku cea Ilaaɔ̃ kuwã.

³ Ntɔ ntɔ, golo akãi á cã inɛ fei. Goloui í jɛ iku. Nɔ iyi í re mɔm, laalɔi í ya maa kɔ̃ si idɔi amanɛ ŋa do lasabu hai nɛ yaase si kuwɛɛ nŋa fei a bɛi a ku. Iyi bɛi í jɛ wahala iyi wa ce si andunya.

⁴ Amma inɛ iyi í wɛɛ si hunde í nɛ kpãa ku cɔ, si bɛi mɔndau ihɛ̃ wa fɔ í ni, aja njaawɛ í tia muusu nla iku.

⁵ Ilu hunde ŋa à mà iyi ntɔ ntɔ aŋa aa ku, amma iku ŋa a kù mà nkãma. Nɔ a kù nɛ riba kãma. Nɔ mɔm à gbɛjɛ ide nŋa.

⁶ Kubi nŋa do inɛ ku cé nŋa do kɔdɛɛ nŋa fei í kpa iri mbɛ. Nɔ baa nŋa kù wa si mii iyi wa ce si andunya ihɛ̃ má.

⁷ Na nŋu, jɔ̀ i jɛ sɔndaɛ nɔ i mɔ vɛ̃ɛɛ do inɔ didɔ̃, domi Ilaaɔ̃ í saabu si icɛɛ tã.

⁸ Nɔ waati kãma fei i ya dasi ibɔ fũfũi jingauɛ nɔ i ya jɔ́ si iriɛ ikpo i nyisiò inɔ didɔ̃ɛ.

⁹ Si waatii kuwɛɛ kusii iyi Ilaaɔ̃ í muuɛ si andunya ihɛ̃, jɔ̀ i wɛɛò inɔ didɔ̃ do aboɛ, nŋu iyi ì bi, domi iyi í jɛ ikpɛ̃ɛ mbɛ si kuwɛɛ do si icɛ iyi ì waa ce si andunya ihɛ̃.

¹⁰ Nɔ mii iyi ì nɛ ku ce fei, coo do gbugbãɛ, domi icɛ do lasabu ku ce si ngɔgɔ do kumà do bisi kãma kaa wɛɛ bi kuwai iku ŋa tengi bii ì waa bɔ.

Kù jɛ waati kãma feii bisi í nɛ aranfãani

¹¹ Mii ŋa iyi ǹ yɛ si andunya ihɛ̃ wee má. Kù jɛ waati kãma feii inɛ ŋa iyi à gbãa à re à ya tako à sɛi à to si gaasai are, nɔ kù jɛ ilu wɔɔkɔ ŋai à ya jɛ igũ. Kù jɛ waati kãma feii ilu bisi ŋa à ya ba fiai icɛ nŋa iyi aa maa wɛɛò, nɔ kù jɛ ilu laakai ŋai à ya jɛ ilu amani. Kù nɔ kù jɛ woo nɛ kumà ŋai inɛ ŋa à ya mà bɛɛrɛ nŋa. Waati si bii inɛ í wa do tengi bii í wa fei, laalɔ walakɔ jiida á yɔkɔ ku baa.

¹² Iyi í re mɔm, amanɛ kù mà ajɔi ikuɛ. Iku í ya naa si amanɛi ku zambaɛ bɛi à ya zamba cɛ̃ɛ ŋa do taao do bɛi taa í ya zamba yɛi ŋa.

Á sĩa inɛ ku nɛ bisi do iyi á jɛ nnyɛi

¹³ Mii mmu gɔ iyi ǹ yɛ si andunya ihɛ̃ iyi í to sim wee si icɛ iyi bisi í ya ce.

¹⁴ Ilu keeke gɔ í wɛɛ do amanɛ nyankuti iyi í wa inɔɛ, nɔ ilaalu ilu gbugbã gɔ í naa igũ siɛ. Nɔ soogeɛ ŋa à kaako iluu nɔ à ma mii nla gɔ iyi á sobi ŋa a kuaò bindii iluu.

¹⁵ Si inɔ iluu ilu are gɔ í wa bɛ iyi í nɛ bisi nɔ do bisiɛ í faabaò iluu, amma inɛ kãma kù ye gigiɛ si anyii igũu.

¹⁶ Na ŋɔi í jɔ̀ amu ǹ ni, í tia i nɛ bisi do iyi aa jɛ ilu gbugbã, amma do nŋu fei a ci ya saalu bisii ilu are, nɔ ide ŋa iyi wa fɔ a ci ya desi itĩ.

¹⁷ Do nŋu fei í tia i gbɔ idei ilu bisi iyi wa fɔ ide do laakai ku sũ do iyi aa gbɔ kulai ilaalu iyi wa ba hai nɛ yaase ŋa ide ku fɔ.

¹⁸ Bisi í tia jĩnɛi igũ ŋa, amma ilu dulum akã í ya bɛjɛ mii jiida nkpɔ.