Woo lasabu 8 - Bibeli do fee

¹ Yooi í jɛ ilu laakai ntɔ ntɔ. Yooi á yɔkɔ ku sisi yaasei ide ŋau ihɛ̃. Ilu laakai, wajuɛ í ya sĩai, ci ya jɔ̀ zigii inɛ ku da.

Ilaalu ku jirima

² Bii ilaalu í na wooda, jɔ̀ i jirimaɛ na kuwã iyi Ilaaɔ̃ í ceaa.

³ Maà ya saasa i kɔ̀si woodaɛ. Maà ya maa mɔsi do laalɔ ku ce, domi bɛi í bi bɛɛbɛi á ce.

⁴ Si bɛi idei ilaalu í nɛ gbugbã í caa, inɛ kãma kaa yɔkɔ ku beeɛ mii iyi wa ce.

⁵ Inɛ iyi wa jirima woodai ilaalu, ci ya ce laalɔ. Ilu laakai í mà iyi mii fei í nɛ waatiɛi do ajɔi kiitiɛ.

⁶ Ntɔi, mii fei í nɛ waatiɛi do ajɔ si bii aa kiitia. Wahala nla gɔ í wɛɛa amanɛ.

⁷ Amanɛ kù mà mii iyi á na ku ce. Yooi á yɔkɔ ku sɔ̃ kpaasiɛ mii iyi á na ku ce.

⁸ Inɛ kãma kù nɛ gbugbã iyi á maa mu hundeɛ, nɔ inɛ kãma kaa yɔkɔ ku tale ajɔi ikuɛ. Kujabuɛ kaa nyaa, bɛɛbɛ mɔi laalɔ ku cei inɛ, kaa yɔkɔ ku nyaa si ajɔi kiiti.

Lasabu iyi à ce si kuwɛɛi amanɛ

⁹ Ǹ yɛ mii ŋau bɛ fei nɔ ǹ lasabu si mii iyi wa ce si andunya ihɛ̃. Inɛ iyi í wa antaii inɛ gɔ í ya tɛɛsɛɛi nɔ ku maa wahalaɛ.

¹⁰ Nɔ ǹ yɛ à si inɛ laalɔ ŋa do jirima. Inɛ ŋau à ya tako a bɔ kpasɛ̃i Ilaaɔ̃, nɔ inɛ ŋa à waa saabu ŋa si ilui Zeruzalɛmu, tengi bii à ce laalɔ nŋa wo. Iyi bɛ mɔ ngbɛi.

¹¹ Si bɛi a ci ya kpã woo ce laalɔ ŋa iju gbãa gbãa, ŋɔi í jɔ̀ amanɛ ŋa à ya maa bi laalɔ ku ce.

¹² Á yɔkɔ ku jɛ inɛ laalɔ í ce dulum fii cĩɔ nɔ kuwɛɛɛ í mɔsi wa koo. Do nŋu fei ǹ mà kãm kãm iyi inɛ ŋa iyi à mà bɛɛrɛi Ilaaɔ̃ aŋai aa wɛɛò inɔ didɔ̃ si na iyi í jɔ̀ à waa jirimaɛ.

¹³ Amma inɛ laalɔ kaa wɛɛò inɔ didɔ̃ pai. Kuwɛɛɛ si andunya ihɛ̃ á lɔi bɛi jĩjĩ nɔ á kui hai awaasũɛ, si na iyi í jɔ̀ kù mà bɛɛrɛi Ilaaɔ̃.

¹⁴ Mii gɔ wee má iyi yaasei ku gbɔɛ í gaabu. À waa kpã inɛ dee dee ŋa iju bɛi à nɛ a cea inɛ laalɔ ŋa, nɔ à waa cea inɛ laalɔ ŋa mii jiida bɛi à nɛ a cea inɛ dee dee ŋa. Nɔ ǹ ni má, iyi bɛ mɔ yaasei ku gbɔɛ í gaabu.

¹⁵ Ǹ fɔ ǹ ni inɔ didɔ̃ mii jiidai si na iyi í jɔ̀ nkãma kù gbea amanɛ má bii kù jɛ ku maa jɛ nɔ ku maa mɔ nɔ ku wɛɛò inɔ didɔ̃ si andunya ihɛ̃. Í sĩa amanɛ ku ce icɛɛ do inɔ didɔ̃ si ajɔ ŋa iyi Ilaaɔ̃ í muaa ku jɛò kuwɛɛɛ si andunya ihɛ̃.

¹⁶ Waati iyi ǹ dasi idɔ n ba n mà bɛi amanɛ á ce ku nɛ bisi, ǹ cɔ do laakai mii iyi wa ce si ilɛ, nɔ ǹ ba wee amanɛ wa wɔ njooi dasãò idũ.

¹⁷ Nɔ ǹ yɛ icɛ iyi Ilaaɔ̃ wa ce si andunya fei. Amanɛ á gbɛɛji si kudɛdɛɛ ŋa, amma a kaa mà yaaseɛ. Baa bii ilu bisi gɔ í ni nŋu í mà mii iyi Ilaaɔ̃ wa ce, kaa yɔkɔ ku mà yaaseɛ.