Woo lasabu 7 - Bibeli do fee

¹ Iri jiida í tia tuae jiida, nɔ ajɔi iku í tia ajɔi kubí.

² Í tia i bɔ inɔ kpasɛ̃ bii iku í ce do iyi aa bɔ inɔ kpasɛ̃ bii à waa ce jingau, domi inɛ fei á kui nɔ í sĩa inɛ fei ku maa ye gigiɛ.

³ Inɔ kufɔ í tia inɔ didɔ̃. Baa bii waju nwa wa bɛjɛ á jɔ̀ idɔ nwa ku nɛ laakai ku sũ.

⁴ Idɔi ilu bisi í ya wai bii iku í ce amma idɔi nnyɛi í ya wai bii inɔ didɔ̃ í wa.

⁵ Í tia i gbɔ ilu laakai ku maa gbagba siɛ do iyi aa gbɔ nnyɛi ku maa cĩɛ.

⁶ Anyii nnyɛi í yɛi bɛi anu ku dɔ̃i jĩi ndii agũ iyi à waa tɛkɛò caka. Nŋu mɔ ngbɛi.

⁷ Bii inɛ gɔ wa taa inɛ ŋa gbugbã, á jɔ̀ ilu laakai ku sinda nnyɛii, nɔ amua á yɔkɔ ku sinda idɔi amanɛ.

⁸ Iri ku kpai ngɔgɔ í tia sinteɛ. Í tia i jɛ ilu temua do iyi aa jɛ ilu faau.

⁹ Maà ya jɔ̀ idɔɛ ku saasa ku kɔ̃ domi nnyɛi ŋai idɔ nŋa í ya kɔ̃ gbãa gbãa.

¹⁰ Maà bee ide i ni, na mii í ce kuwɛɛi tako í tia ti nsɛi. Ntɔ ntɔ, laakai ku nɛɛ, kaa jɔ̀ i maa bee ide bɛɛbɛ.

¹¹ Bisi mɔ mii jiidai bɛi tubu, nɔ í ya nɛa amanɛ aranfãani.

¹² Bisi á yɔkɔ ku bii anyii amanɛ bɛi fia, nɔ í nɛ aranfãani iyi á jɔ̀ ilu bisiu ku maa wɛɛ.

¹³ Cɔ mii iyi Ilaaɔ̃ í taka fei do laakai. Inɛ kãma kaa yɔkɔ ku tɛ mii iyi Ilaaɔ̃ í ka.

¹⁴ Si waatii ididɔ̃, jɔ̀ i wɛɛò inɔ didɔ̃, si waatii wahala, jɔ̀ i lasabu. Ilaaɔ̃i í ce waati minji ŋau fei bɛɛbɛ. Do yaase bɛɛbɛ, amanɛ kaa mà mii iyi á na ku ce.

¹⁵ Si kuwɛɛ ngbɛ ngbɛ iyi ǹ ce, ǹ yɛ iyi mii fei á yɔkɔ ku ce. Inɛ dee dee á yɔkɔ ku ku si dee dee ku jɛɛ, nɔ inɛ laalɔ á yɔkɔ ku wɛɛ ku kpɛ si laalɔ ku ceɛ.

¹⁶ Maà jɛ inɛ dee dee hee ku caa nɔ i maà nyisi iyi ì nɛ bisi ì re inɛ fei. Na mii í jɔ̀ aa ce nfei araɛ.

¹⁷ Maà jɛ ilu inɔ kukã hee ku caa walakɔ nnyɛi bii i kù bi i kú gbãa gbãa.

¹⁸ Á sĩa i ceò ikɔ minji ŋau bɛ icɛ, domi inɛ iyi wa jirima Ilaaɔ̃ í ya ba ku fita si mii feii.

¹⁹ Bisi í ya jɔ̀ ilu bisi ku nɛ gbugbã ku re ilaalu mɛɛwa ŋa iyi à waa mu ilu akã.

²⁰ Ntɔi, si andunyau ihɛ̃, inɛ dee dee kãma gɔ kù wɛɛ iyi wa ce jiida nɔ ci ya ce dulum ajɔ kãma.

²¹ Maà ya saalu ide iyi inɛ ŋa à waa ni fei. Á yɔkɔ ku jɛ aa na i gbɔ woo ce icɛɛ wa ceekpeɛ.

²² Jɔ̀ i ye gigi iyi awɔ takaɛ mɔ ì ceekpe inɛ gɔ ŋa.

²³ Ǹ cɔ mii ŋau ihɛ̃ fei do bisi. Ǹ fɔ si idɔm ǹ ni, an jɛ ilu bisi amma n kù yɔkɔ.

²⁴ Mii iyi í wɛɛ fei í la nɔ í jĩisa í caa hee í jɔ̀ inɛ kãma kaa mà yaaseɛ kpata kpata.

²⁵ Ǹ dasi idɔ n cɔ do laakai nɔ n lasabu si ku ba n mà bisi do ntɔi mii ŋau, nɔ n ba n mà iyi laalɔ ku ce do nnyɛi ku jɛ kù nɛ yaase.

²⁶ Nɔ ǹ yɛ inaabo gɔ iyi í yɛ bɛi cɛkũm iyi í ya naaò inɔ kufɔ wa ku re iku. Idɔɛ í yɛi bɛi taao, awɔɛ ŋa mɔ bɛi ikũ ku kpati amanɛ. Inɛ iyi daaɛ í sĩaa Ilaaɔ̃ si í ya saai, amma ilu dulum í ya dasi awɔɛi.

²⁷ Mii iyi ǹ ba mbɛ, amu woo lasabuò yaasei andunya, si bɛi ǹ cɔ mii ŋau akã akã n ba n màò ntɔ nŋa.

²⁸ Ǹ wa n dɛdɛ hai ku kpɛ nɔ n kù ba yaasei mii ŋau. Si inɔi inɛmɔkɔ dubu ǹ ba akã, [iyi daaɛ í sĩaa Ilaaɔ̃ si,] amma si inɔi inaabo ŋa n kù ba baa akã.

²⁹ Si mii ŋau bɛ fei mii iyi ǹ yɛ nŋu akãi í jɛ iyi Ilaaɔ̃ í ce amanɛi dee dee, amma amanɛ kù bi bɛɛbɛ.