Woo lasabu 6 - Bibeli do fee

¹ Ǹ yɛ mii laalɔ gɔ má iyi wa wahala amanɛ ŋa ntɔ ntɔ si andunya ihɛ̃.

² Inɛ gɔ í wɛɛ iyi Ilaaɔ̃ í muaa amani nkpɔ nkpɔ nɔ í jɔ̀ í nɛ bɛɛrɛ nɔ mii iyi í bi kãma kù waa gaiziaɛ. Amma Ilaaɔ̃ kaa jɔ̀ ku ceò bɛi í bi. Inɛ njoo gɔi á na ku jɛ aranfãaniɛ. Iyi bɛ mɔ ngbɛi nɔ mii laalɔ gɔi.

³ Bii inɛ gɔ í nɛ ama cĩɔ nɔ kuwɛɛɛ í kpɛ si ilɛ ihɛ̃ nɔ kukpɔi adɔ̃ɛ wa mɔsi wa koo, aranfãani yoomai í nɛ bii kù ba inɔ didɔ̃ nɔ a kù suu dee dee si bɛi í jɔ. Si lasabum asĩ iyi í nya á wɛɛò inɔ didɔ̃ ku roo

⁴ domi asĩu í naai si ngbɛ nɔ í sinda í nyi má si ilu kuku nɔ inɛ kãma kaa kpe iriɛ má.

⁵ Nɔ mɔm kù yɛ andunya do iju nɔ kù mà nkãma si kuwɛɛ. Kusĩmiɛ á re ti mɔkɔu bɛ,

⁶ baa bii mɔkɔu í ce kuwɛɛɛ zakai adɔ̃ dubu ikɔ minji nɔ kù nɛ inɔ didɔ̃. Ntɔ ntɔ inɛ fei á kui.

⁷ Icɛi amanɛ fei na gɛlɛɛi. Do nŋu fei caakaɛ ci ya kɔ̃.

⁸ Aranfãani yoomai ilu bisi í nɛ í reò nnyɛi. Nɔ aranfãani yoomai ilu are iyi í mà araɛ ku mu í nɛ si kuwɛɛ.

⁹ Í tia amanɛ ku wɛɛò inɔ didɔ̃ si mii iyi í nɛ do iyi á jɔ̀ kɔdɛɛɛ ku maa faa. Iyi bɛ mɔ ngbɛi. Í yɛi bɛi amanɛ wa sɛi si fufu.

Ikɔi bisi

¹⁰ Mii iyi í wɛɛ fei, à màa tã hai ku kpɛ, nɔ à mà bɛi amanɛ í yɛ. Kaa yɔkɔ ku kakɔɔ inɛ iyi í roo.

¹¹ Ide nkpɔ ci ya nɛ yaase. Aranfãani yoomai amanɛ á ba si.

¹² Kuwɛɛi amanɛ kù sɔ. Yooi á mà mii iyi í sĩa amanɛ ku ce si kuwɛɛɛ iyi wa lɔ bɛi jĩjĩ. Yooi á yɔkɔ ku sɔ̃ɔ mii iyi á na ku ce si anyiɛ.