Woo lasabu 5 - Bibeli do fee

¹ Maà fɔ ide do saasa nɔ i maà ya saasa i cea Ilaaɔ̃ kuwã, domi Ilaaɔ̃ í wa lele nɔ awɔ mɔ ilɛi ì wa. Debɛi, jɔ̀ ide nkpɔ ku fɔ.

² Do ntɔ, si bɛi inɛ iyi wa lasabuò mii nkpɔ í ya ce ala laalɔ, bɛɛbɛ mɔi inɛ iyi wa fɔ ide nkpɔ, á na ku fɔ ide hai nɛ yaase.

³ Bii ì cea Ilaaɔ̃ kuwã, jɔ̀ ku kɔ̃ gbãa gbãa, domi Ilaaɔ̃ kù bi kucei nnyɛi ŋa. Na nŋu, jɔ̀ i kɔ̃ kuwã iyi ì ceu.

⁴ Í tia i maà cea Ilaaɔ̃ kuwã do iyi aa ceaa nɔ i kaa kɔ̃ɔ.

⁵ Maà jɔ̀ gɛlɛɛ ku dasiɛ dulum. Nɔ i maà ce kuwã iyi á jɔ̀ i nyi bi woo weeu má i ni, bii ǹ mà wo, domi idɔi Ilaaɔ̃ á kɔ̃ na ide ŋa iyi ì fɔ, nɔ ku bɛjɛ icɛɛ ŋa iyi ì ce fei.

⁶ Nɔ bi nnyɛi ŋa kuwã kù nɛ bɛɛrɛ ku re ide nkpɔ nkpɔ do ala nkpɔ, amma awɔ ilu bisi, jɔ̀ i mà bɛɛrɛi Ilaaɔ̃.

Gbugbã ku ta

⁷ Maà jɔ̀ ku muɛ biti bii ì yɛ à waa taa ilu are gbugbã si ilɛ gɔ nɔ à kɔ̀ɔ ntɔ. Woo taa gbugbãu mɔ í nɛ inɛ ngbo nɔ inɛ ngbo ŋau à ya bii anyii njɛi, nɔ aŋa fei à nɛ inɛ iyi í wa antai nŋai.

⁸ Á nɛa inɛ fei aranfãani bii í jɛ ilaalu í ya sobi kãma ŋa ku ba icɛi iko nŋa ku bɔ waju.

Amani ku nɛ ngbɛi

⁹ Inɛ iyi í bi fia, fia ci ya too, nɔ inɛ iyi í bi amani nkpɔ nkpɔ ci ya jɛ aranfãaniɛ. Iyi bɛ mɔ má ngbɛi.

¹⁰ Bɛi amani í kpɔ í to, bɛɛbɛ mɔi woo jɛɛ ŋa à ya kpɔ. Nɔ aranfãani yoomai ilu amaniu í nɛ bii kù jɛ ku maa cɔɔ.

¹¹ Kãma í ya gbɔ ididɔ̃i njoo bii í jɛ í yo walakɔ bii kù jɛ kù yo. Amma amanii ilu fia ci ya jɔ̀ ku sĩ njoo.

¹² Nɔ ǹ yɛ wahala gɔ iyi wa ce si andunya ihɛ̃ má. Inɛ gɔ í jilɛa araɛ amani iyi í na í jɛaa wahala,

¹³ domi í bɛjɛ amaniu si wũa hai nɛ yaase ŋa nɔ nkãma kù gbeaa má iyi á jɔ̀a amaɛ.

¹⁴ Si bɛi à búu wa basĩ, basĩi á sinda ku nɛ si ilɛ. Nɔ si icɛɛ ŋa iyi í ce fei, kaa ba nkãma iyi á mu ku bɔò.

¹⁵ Iyi bɛ mɔ má wahala gɔi, domi bɛi í naa, bɛɛbɛi wa nɛ. Aranfãani yoomai í ba. Icɛ iyi í ce fei í jɛ ngbɛ.

¹⁶ Iyi í re mɔm, inɔ kufɔ do wahala do ara ku ro à jɔ̀ í jɛ kuwɛɛɛ fei bɛi inɛ iyi wa nɛ si ilu kuku.

¹⁷ Na nŋu, iyi ǹ yɛ wee. Í sĩaa amanɛ ku jɛ nɔ ku mɔ nɔ ku wɛɛò inɔ didɔ̃ na aranfãanii icɛɛ si waatii kuwɛɛɛ iyi Ilaaɔ̃ í naa, domi iyi bɛi í jɛ ikpɛ̃ɛ.

¹⁸ Bɛɛbɛ mɔi bii Ilaaɔ̃ í mua inɛ gɔ amani nɔ í jɔ̀ wa ceò bɛi í bi nɔ wa jɛ aranfãaniɛ, nɔ í wɛɛò inɔ didɔ̃ na irii icɛɛ, iyi bɛ mɔ amuai Ilaaɔ̃i.

¹⁹ Inɛɛu ci ya lasabu si gãmɛi kuwɛɛɛ, si na iyi í jɔ̀ Ilaaɔ̃ í jɔ̀ í kɔ̃ do inɔ didɔ̃.