Woo lasabu 4 - Bibeli do fee

Mii ndii andunya ŋa iyi yaase nŋa ku gbɔ í gaabu má

¹ Si anyiɛ nɔ ǹ yɛ bɛi inɛ ŋa à ya maa taa njɛ gbugbã si andunya. Inɛ ŋa iyi à waa wahala à wasi ku kpata amma inɛ gɔ kaa lɛlɛ ŋa. Woo wahala ŋa ŋau aŋai à nɛ gbugbã à re í jɔ̀ baa inɛ kãma kaa yɔkɔ ku lɛlɛ ŋa.

² Nɔ ǹ yɛ iyi iku ŋa à wɛɛò inɔ didɔ̃ à re baa ilu hunde ŋa.

³ Nɔ inɛ iyi a kù bí titã í wɛɛò inɔ didɔ̃ í re aŋa fei domi kù yɛ mii laalɔ ŋa iyi wa ce si andunya ihɛ̃.

⁴ Nɔ ǹ yɛ icɛ iyi amanɛ ŋa à waa ce fei do himma nŋa fei à waa cooi do njɛ ku wã ku ba à re kpaasi nŋa ŋa. Nɔ nŋu mɔ má ngbɛi. Í yɛi bɛi amanɛ wa sɛi si fufu.

⁵ Nnyɛi iyi kù bi icɛ ku ce í ya kuò arii.

⁶ Amma inɛ ku nɛ keeke nɔ ku sĩmi í sĩa í re do iyi á nɛ nkpɔ nkpɔ nɔ ku maa wahala si icɛ ku maa sɛi si fufu.

⁷ Ǹ yɛ mii ngbɛ gɔ má si andunya ihɛ̃.

⁸ Inɛ gɔ í wɛɛ nŋu akãɛ, kù nɛ ama nɔ kù nɛ nyaanze kãma. Nɔ do nŋu fei icɛɛ kù nɛ kɔɔ nɔ amani ci ya tóo ajɔ kãma, baa do iyi í ya bee araɛ ide ku maa ni yooi nŋu wa cea icɛ nɔ nŋu í kɔ̀a arai nŋu ku jɛ ididɔ̃ɛ. Nŋu mɔ má ngbɛi nɔ inɔ kufɔ nla nlai.

⁹ Bii amanɛ minji í tɔtɔɔ wa ce icɛ í sĩa í re amanɛ akã, domi aa ya ba mii jiida si icɛ nŋa.

¹⁰ Ntɔ ntɔ bii inɛ akã í cuku, minjisiaɛu á dedeɛ. Amma inɔ kufɔi í jɛ ti inɛ iyi í wɛɛ nŋu akã, domi bii í cuku inɛ kãma kù wa bɛ iyi á dedeɛ.

¹¹ Bɛɛbɛ mɔi bii amanɛ minji wa sũ inya akã, tũtũ kaa kpa ŋa. Amma bii inɛ í wɛɛ nŋu akã bɛirei inya gbãa á ce ku naa siɛ.

¹² Ilu gbugbã á yɔkɔ ku kãmia inɛ akã, amma inɛ minji á nɔ nŋu mɔ. Ikũ mɛɛta iyi à tɔtɔɔ à ba, kudaɛ kaa faala.

¹³ Awaasũ ilu are iyi í nɛ bisi, í tia ilaalu mɔkɔ ngbo hai nɛ yaase iyi ci ya gbɔ ikɔi inɛ ŋa.

¹⁴ Á yɔkɔ ku jɛ awaasũu í fita hai ile piisɔ̃ɔ nɔ á na ku jɛ bomma do iyi à búu si are fei.

¹⁵ Nɔ ǹ yɛ inɛ ŋa iyi à wa si andunya fei à wa anyii awaasũ iyi á na ku jɛ bomma si agbɛi ilaaluu.

¹⁶ Nŋui wa cuaa zamaa nla nla gɔ iyi kù nɛ baa jia. Do nŋu fei inɛ ŋa iyi aa naa si anyiɛ a kaa nɛ kubiɛ. Nŋu mɔ ngbɛi. Í yɛi bɛi amanɛ wa sɛi si fufu.

Maà saasa i cea Ilaaɔ̃ kuwã

¹⁷ Bii ì lɔ inɔ kpasɛ̃i Ilaaɔ̃ i ya ce laakai. I ya koo nɔ i gbɔ ideɛ. Iyi bɛ í sĩa í re do iyi aa ce kuwee bɛi kuweei nnyɛi ŋa iyi a kù mà mà laalɔi à waa ce.