Woo lasabu 3 - Bibeli do fee

Mii fei do awaatiɛi

¹ Mii fei do awaatiɛi si andunya ihɛ̃.

² Waati í wɛɛ si bii à ya bí inɛ, nɔ waati í wɛɛ si bii amanɛ á ku. Waatii ku gbɛ̃ í wɛɛi nɔ waatii ku da í wɛɛi.

³ Waatii inɛ ku kpa í wɛɛi nɔ waati iyi aa jɔ̀ inɛ ku ba iri í wɛɛi. Waatii ku lɛgɛ í wɛɛi nɔ waatii ku ma í wɛɛi.

⁴ Waatii ku kpata í wɛɛi nɔ waatii ku nyaanyi í wɛɛi. Waatii ku kakaa í wɛɛi nɔ waatii ku jojo í wɛɛi.

⁵ Waatii kuta ku fangaa í wɛɛi nɔ waatii kutɔtɔɔɛ í wɛɛi. Waatii inɛ ku baabaa í wɛɛi, nɔ waati iyi a kaa baabaa inɛ í wɛɛi.

⁶ Waatii ku dɛdɛ í wɛɛi nɔ waatii ku kua í wɛɛi. Waatii mii ŋa ku jilɛ í wɛɛi nɔ waatii mii ŋa ku nyɔ í wɛɛi.

⁷ Waatii acɔ ku ga í wɛɛi nɔ waatii acɔ ku sɔ í wɛɛi. Waatii ku coko í wɛɛi nɔ waatii ide ku fɔ í wɛɛi.

⁸ Waatii kubi í wɛɛi nɔ waatii ku cé í wɛɛi. Waatii igũ í wɛɛi nɔ waatii laakai ku sũ í wɛɛi.

⁹ Aranfãani yoomai amanɛ á ba si icɛ iyi wa ce.

¹⁰ Ǹ yɛ icɛ iyi Ilaaɔ̃ í dasi amanɛ ŋa.

¹¹ Í ya ce mii fei jiidai si waatiɛ, nɔ mɔm í daa amanɛ si lasabui waati sisɔ. Do nŋu fei, amanɛ kaa yɔkɔ ku mà icɛ iyi Ilaaɔ̃ wa ce hai sinte hee ku bɔ kɔɔɛ.

¹² Mii iyi í jɛ jiida iyi í gbea amanɛ nŋui í jɛ ku wɛɛò inɔ didɔ̃ nɔ ku ya ce jiida si kuwɛɛɛ fei,

¹³ waatɔ amanɛ ku ya jɛ, nɔ ku ya mɔ, nɔ ku ya wɛɛò inɔ didɔ̃ na aranfãanii icɛɛ, iyi bɛ ŋa fei, amuai Ilaaɔ̃i.

¹⁴ Ǹ mà iyi mii iyi Ilaaɔ̃ í ce fei á wɛɛi hee do ajɔ fei, nɔ inɛ kãma kaa yɔkɔ ku kɔ̃ɔsi ngɔgɔ walakɔ ku nya ngɔgɔ hai si antaiɛ má. Ilaaɔ̃ í ce bɛɛbɛi ku ba amanɛ ŋa a jirimaɛ.

¹⁵ Mii iyi wa ce nsɛi fei do iyi á na ku ce í tako í ce wo tã si waati iyi í lɔ. Ilaaɔ̃ í bi ka dɛdɛ mii iyi wa manji.

Ikui á kpa irii mii fei

¹⁶ Iyi ǹ yɛ si andunya ihɛ̃ má wee. Ǹ yɛ bi ku ce kiiti iboi í ya gba agbɛi ntɔ.

¹⁷ Nɔ ǹ fɔ si idɔm ǹ ni, Ilaaɔ̃ á kiiti inɛ ŋa iyi à waa ce jiida do inɛ ŋa iyi à waa ce laalɔ, domi mii fei í nɛ waatiɛi, nɔ mii fei í nɛ bii aa cooi.

¹⁸ Ǹ fɔ si idɔm si gãmɛi amanɛ ŋa ǹ ni, Ilaaɔ̃ á cɔ laakai nŋa a ba a mà iyi aŋa a kù tia mɛɛmu ŋa.

¹⁹ Amanɛ do mɛɛmu ŋa fei iri ku kpa nŋa dimi akãi, aŋa fei à ya kui. Aŋa fei ami dimi akãi à nɛ nɔ amanɛ kù re mɛɛmu baa keeke, domi fei ndɛɛ ngbɛi.

²⁰ Aŋa fei inya akãi à waa bɔ. Aŋa fei hai si ilɛi à waa naa nɔ si ilɛi aa nyi má.

²¹ Inɛ kãma kaa yɔkɔ ku mà iyi hundei amanɛ á bɔ lele nɔ ti mɛɛmu ŋa mɔ ku gbe si ilɛ.

²² Nɔ ǹ yɛ iyi nkãma kù gbea amanɛ má, bii kù jɛ ku wɛɛò inɔ didɔ̃ na aranfãanii icɛɛ, domi iyi bɛi í jɛ ikpɛ̃ɛ. Nɔ ntɔi, domi inɛ kãma kaa jɔ̀ ku nyi wa mà ku na ku yɛ mii iyi á na ku ce si anyiɛ.