Woo lasabu 2 - Bibeli do fee

Inɔ didɔ̃i amanɛ ngbɛi

¹ Ŋɔi ǹ fɔ si idɔm ǹ ni, an jɔ̀ n ba inɔ didɔ̃ n dɛdɛ mii jiida ŋa. Nɔ wee nŋu mɔ má ngbɛi.

² Ǹ yɔɔ iyi anyí kù nɛ yaase, nɔ inɔ didɔ̃ mɔ kaa bukaata nwa.

³ Nɔ ǹ dasi idɔ n mɔ atɛ̃ vɛ̃ɛ n ba n nɛ inɔ didɔ̃, nɔ bisii idɔm nii ǹ jɔ̀ wa gbãm. Ǹ mɔ atɛ̃ vɛ̃ɛui hee ǹ sisiò kucei nnyɛi ŋa ku ba n mà mii iyi í sĩa amanɛ ku ya ce si kuwɛɛɛ si andunyau ihɛ̃.

Icɛ nla nlai amanɛ ngbɛi

⁴ Nɔ ǹ ce icɛ nla nla ŋa. Ǹ maa aram ile nkpɔ nkpɔ nɔ ǹ lɔ jĩi ndii rezɛ̃ɛ.

⁵ Nɔ ǹ ce lambo nkpɔ nkpɔ nɔ ǹ lɔ si jĩi dimi ikã ikã baa yooma fei iyi á so iso jiida.

⁶ Nɔ ǹ tua aram dimii fatama gɔ ŋa iyi an maa n fãsiò ama jĩi ŋau inyi.

⁷ Nɔ ǹ ra aru ŋa, inaabo do inɛmɔkɔ ŋa, nɔ à bí amu ŋa si inɔ kpasɛ̃m. Nɔ ǹ nɛ kɛtɛ gaa ŋa do angudã gaa ŋa í re baa ilaalu ŋa iyi à takom à wa Zeruzalɛmu wo.

⁸ Nɔ ǹ tɔtɔɔ isɔ fũfũ do wura ŋa do amanii ilaalu ŋa do ti kukpɛ̃i ilɛ ŋa. Ǹ so woo kɔ̃ iri ŋa, inɛmɔkɔ do inaabo ŋa, nɔ ǹ ba mii iyi inɛmɔkɔ ŋa à ya bi fei, waatɔ inaabo nkpɔ nkpɔ.

⁹ Nɔ ǹ nya iri í re ilaalu ŋa iyi à takom à wa Zeruzalɛmu wo, nɔ bisim nii wa gbãm.

¹⁰ Mii iyi ijum í yɛ iyi kɔdɛɛm í lɔ si fei do faayi iyi idɔm í bi fei, n kù kɔ̀a aram. Si icɛm ŋa iyi ǹ ce fei, ǹ ba si inɔ didɔ̃, nɔ nŋui í jɛ ikpɛ̃ iyi ǹ ba.

¹¹ Nɔ ǹ cɔ mii ŋa iyi ǹ ce fei do kookaai iyi ǹ ce ǹ bɛi ǹ ce ŋa, ŋɔi ǹ yɛ iyi mii ŋau bɛ fei ngbɛi. Í yɛi bɛi amanɛ wa sɛii si fufu. Ntɔ ntɔ icɛ iyi amanɛ wa ce si andunya ihɛ̃, kù nɛ aranfãani kãma.

Bisi do nnyɛi fei ngbɛi

¹² Ǹ dɛdɛ n mà aranfãani iyi bisi í nɛ nɔ nnyɛi do sũmu a kù nɔɔ. Mii ikã yoomai inɛ iyi á sãsi agbɛi ilaalu á ce má bii kù jɛ mii iyi à tako à ce tã.

¹³ Nɔ ǹ yɛ iyi bisi í nɛ aranfãani í re nnyɛi bɛi inya kumá mɔ í nɛ aranfãani í re ilu kuku.

¹⁴ Ilu bisi wa yɛ bii wa bɔ amma nnyɛi wa nɛi si ilu kuku. Do nŋu fei ǹ mà iyi mii akãi á ba ŋa.

¹⁵ Nɔ ǹ fɔ si idɔm ǹ ni, mii akãi á ba amu do nnyɛi. Bii bɛɛbɛi, aranfãani yoomai bisi nla nlam í nɛ. Nɔ iyi bɛ mɔ má ngbɛi.

¹⁶ A kaa ye gigii ilu bisi ku re nnyɛi, domi ilu bisi í ya kui bɛi nnyɛi mɔ í ya ku nɔ amanɛ ŋa à ya gbɛjɛ idei aŋa minji feii.

¹⁷ Nɔ ǹ cé kuwɛɛ, domi ǹ yɛ mii iyi wa ce si andunyau ihɛ̃ fei wahalai. Fei ndɛɛ ngbɛi. Í yɛi bɛi amanɛ wa sɛi si fufu.

¹⁸ Nɔ inɔm í fɔ si icɛ iyi ǹ ce do kookaai si andunyau ihɛ̃ fei si na iyi í jɔ̀ an jɔ̀a inɛ iyi á na ku sãsi agbɛm.

¹⁹ Nɔ inɛ kãma kù mà bii inɛ nŋu mɔ á nɛ bisi walakɔ ku jɛ nnyɛi. Do nŋu fei, nŋui á jɛ aranfãanii icɛm ŋau iyi ǹ ce do bisim si andunya. Nɔ nŋu mɔ má ngbɛi.

²⁰ Nɔ inɔm í fɔ ntɔ ntɔ si icɛ iyi ǹ ce si andunyau ihɛ̃ fei.

²¹ Á yɔkɔ ku jɛ inɛ gɔ í ce icɛɛ do bisi do kumà nɔ í ba wee nŋu á jɔ̀a inɛ gɔ aranfãaniɛ nɔ lafɛ̃ɛu kù ce icɛ kãma si bɛ. Nŋu bɛ mɔ má ngbɛi, nɔ wahala nla nlai.

²² Amanɛ wa ce icɛ kugaabu si andunya ihɛ̃. Amma aranfãani yoomai í ya ba si.

²³ Si kuwɛɛɛ fei icɛ iyi wa ce, inɔ kufɔ do wahalai í ya naa wa. Nɔ baa idũ laakaiɛ ci ya sũ. Iyi bɛ mɔ má ngbɛi.

²⁴ Mii iyi í jɛ jiida iyi í gbea amanɛ, nŋui í jɛ ku jɛ do ku mɔ nɔ ku nɛ inɔ didɔ̃ si icɛɛ. Nɔ ǹ yɛ iyi Ilaaɔ̃i á muaa didɔ̃u bɛ,

²⁵ domi inɛ kãma kaa jɛ nɔ kaa nɛ inɔ didɔ̃ bii kù jɛ Ilaaɔ̃i í naa.

²⁶ Do ntɔ inɛ iyi í jɛ jiida si wajui Ilaaɔ̃, nŋui Ilaaɔ̃ í ya na bisi do kumà do inɔ didɔ̃, amma í ya jɔ̀ ilu dulum ku ce icɛ nɔ ku ba amani ku na inɛ jiidau. Nɔ iyi bɛ mɔ ngbɛi. Í yɛi bɛi amanɛ wa sɛi si fufu.