Woo lasabu 12 - Bibeli do fee

¹ Ye gigii Ilaaɔ̃ woo takaɛ si awaasũ ku jɛɛ hee ajɔi wahala ŋa a maa naa, si waati bii aa ni i kù nɛ inɔ didɔ̃ má.

² Si waatii agboɛ, aa wai si ilu kuku bɛi inunu í ya naaò ilu kuku wa bii í lɔ walakɔ bɛi si waati bii cukpa do leleaɔ̃ ŋa a kù má inya. Á yɛ má bɛi ijĩ í ya dũ baa bii ijĩ í wɔ tã.

³ Si waati nŋu bɛi woo degbe kpasɛ̃ ŋa aa ya maa yaya, nɔ ilu gbugbã ŋa mɔ a kɔmba nɔ woo lɔlɔ ŋa a leekĩ icɛ nŋa si na iyi í jɔ̀ a kù kpɔ, nɔ inɛ ŋa iyi à waa cɔ do fɛrɛnti a kaa yɛ ilu má.

⁴ Gambo minji ŋau aa cĩmbo, nɔ ibai alɔ kaa fita má. Kukpatai yɛi gɔ á jɔ̀ amanɛ ku jĩ, nɔ a kaa gbɔ iri ku kɔ̃i inaabo ŋa má.

⁵ Aa ce njoi mii iyi í wa lele, nɔ zigiida á wa si kpãa, jĩi ndii amandi á ya da koko fũfũ, nɔ kɛtɛngbo kaa yɔkɔ ku fo má, nɔ jĩnɛi ayɛ kaa ya dɔ̃a si má. Ntɔ ntɔ, inɛ fei wa bɔ kɔɔi kuwɛɛɛ nɔ woo kpata akũ ŋa à wa si kpãa tã.

⁶ Jɔ̀ i ye gigii Ilaaɔ̃ hee kuwɛɛɛ ku maa kpa iri. Á yɛi bɛi seseei isɔ fũfũ í da walakɔ bɛi jɛɛi wura iyi í cuku í lɛgɛ, walakɔ bɛi bɔɔdo iyi í lɛgɛ kɔkɔi isɔ̃ walakɔ bɛi ikũi gooka iyi í da nɔ í jɔ̀ gookau í dasi inɔ lɔgɔ.

⁷ Waati bɛɛbɛi arai amanɛ á nyi si ilɛ hai bii í fita wa, nɔ hunde iyi Ilaaɔ̃ í muaa ku sinda ku nyi bi Ilaaɔ̃.

⁸ Amu woo lasabuò yaasei andunya ǹ ni, ngbɛi ngbɛi, mii fei ngbɛi.

Iri ku kpai ideu

⁹ Iyi í gbe má, nŋui í jɛ iyi woo lasabuò yaasei andunyau í nɛ laakai nɔ kù gbɛɛjiò inɛ ŋa ku kɔsi mii iyi í mà. Si anyiɛ í tɔtɔɔ mɔnda nkpɔ nkpɔ iyi nŋu takaɛ í cɔ do laakai nɔ í lasabu si.

¹⁰ Nɔ í dasi idɔ nŋu ku ba ide didɔ̃ ŋa nɔ ku kɔ ide ntɔ ŋau dee dee si bɛi í jɔ.

¹¹ Idei ilu bisi ŋa í yɛi bɛi golo ku gbe anu iyi í ya jɔ̀ kɛtɛ ku nɛ dee dee. Ide ŋau aa gɛɛ inɛi bɛi kɛkɛ bii à ya so mɛɛmu ŋau í ya gɛɛ ŋa. Ide ŋau hai bi woo degbe akãi wa naa.

¹² Awɔ amam, iyi í gbei í jɛ i jɔ̀ i ce laakai si ide ŋau ihɛ̃. A kaa ka tã bii à waa kɔ tiai ide ŋau. Nɔ cio nkpɔ nkpɔ ku ce í ya gbɛɛji arai.

¹³ Ka sotĩ ka gbɔ iri ku kpai ideu. Mii iyi amanɛ í nɛ ku ce, nŋui í jɛ ku mà bɛɛrɛi Ilaaɔ̃ nɔ ku jirima woodaɛ ŋa,

¹⁴ domi Ilaaɔ̃ á kiiti wa si mii jiida do laalɔ ŋa iyi à ce fei, hee do iyi à ce si asii fei.