Woo lasabu 11 - Bibeli do fee

Amanɛ kù mà mii iyi á ce ala

¹ Bii i kù nyɔɔ do waju, i ci ya tasiɛ.

² I ya cea inɛ nkpɔ amua domi i kù mà wahala iyi á na ku baɛ si andunya.

³ Bii ijĩ í dũ í we mango, ijĩu í ya wɔi. Do cingaa bii jĩi í cukuò bɛi í ya wa.

⁴ Inɛ iyi wa cɔ fufu kaa gbɛ̃, nɔ inɛ iyi wa cɔ kudũi ijĩ kaa da amaajɛɛ ŋa.

⁵ Si bɛi amanɛ kù mà hai bii fufu wa naa nɔ kù mà bɛi asĩ í ya ce ku ce si inɔi inaabo, bɛɛbɛ mɔi kù mà icɛi Ilaaɔ̃ nŋu iyi wa ce mii fei.

⁶ Na nŋu, i ya gbɛ̃ hai daakɔ nɔ i maà leekĩ icɛu hee alɛ koo lɛò, domi i kù mà icɛ yoomai á jɛ jiida walakɔ bii aa na i ba aranfãani si icɛɛ fei.

⁷ Mii jiidai bii amanɛ wa yɛ inya kumá, bɛɛbɛ mɔi bii wa yɛ inunu í sĩa.

⁸ Na nŋu, bii hundei inɛ í sɔ si andunya á sĩa ku wɛɛò inɔ didɔ̃ si adɔ̃ iyi í ce fei. Nɔ á sĩa ku ye gigi iyi ajɔi wahala ŋa aa kpɔ, domi mii iyi á na ku ce fei, ngbɛi.

Ye gigii Ilaaɔ̃ si awaasũ ku jɛɛ

⁹ Awɔ awaasũ, wɛɛò inɔ didɔ̃ waati iyi ì waa jɛ awaasũ. Ce mii iyi á dɔ̃ɛ si nɔ i jɛ awaasũɛ bɛi ì bi. Amma jɔ̀ i mà iyi Ilaaɔ̃ á na ku kiitiɛ si mii ŋa iyi ì ce fei.

¹⁰ Maà lasabu si mii ŋa iyi á jɔ̀ inɔɛ ku fɔ nɔ i maà jɔ̀ bɔ̃ɔ ku ganjiɛ i nɛ inɔ didɔ̃, domi awaasũ do gbugbã fei à ya lɔi bɛi fufu.