Woo lasabu 10 - Bibeli do fee

¹ Bii cĩcĩ ŋa à dasi inɔ tuae nɔ à ku, à ya jɔ̀ ku bɛjɛi nɔ ku maa nu konkombi. Bɛɛbɛ mɔi kuce hai nɛ yaase akã á bɛjɛ bisii amanɛ do bɛɛrɛɛ.

² Lasabui ilu bisi í ya jɔ̀ ku ce mii jiida, amma ti nnyɛi í ya jɔ̀ ku ce laalɔi.

³ Bii nnyɛi í fita wa nɛ si kpãa si bɛi í kua yaase kpata kpata, á jɔ̀ inɛ ŋa a ni sũmui.

⁴ Bii idɔi inɛ ngboi ilɛɛ í kɔ̃ siɛ, maà tekĩ hai tengi bii ì wa, domi temuai í ya jɔ̀ inɛ ku fita hai si wahala nla nla.

⁵ Mii laalɔ mmu gɔ iyi ǹ yɛ si andunya má, nŋui í jɛ kurara iyi woo mu ilɛ gɔ í ce.

⁶ Í jɔ̀ à so nnyɛi ŋa à jilɛ ŋa si bi ku ce icɛ nla nla ŋa, nɔ ilu bɛɛrɛ ŋa à wa si bi ku ce icɛ hai nɛ bɛɛrɛ ŋa.

⁷ Ǹ yɛ aru ŋa à waa gũ acĩ ŋa nɔ amanlu ŋa à waa nɛ do kutɛ bɛi aru ŋa.

⁸ Inɛ iyi wa tu isa, bii kù ce laakai á na ku dasi. Inɛ iyi wa kɛkɛ idĩ, bii njo wa manji bɛ á yɔkɔ ku ŋɔɔ.

⁹ Inɛ iyi wa wu kuta á yɔkɔ ku ba kumɛɛ. Inɛ iyi wa la jĩi, mbiisi á yɔkɔ ku naa.

¹⁰ Inɛ iyi dagbaɛ kù dɔ̃ nɔ kù cangeɛ í gbe ku dasi gbugbãɛ fei ku bɛi ku bu jĩi. Amma inɛ iyi í nɛ bisi, mii fei á ceaa.

¹¹ Inɛ iyi wa sɛ̃ njo, bii njou í ŋɔɔ, aranfãanii yoomai í nɛ.

Ka jɔ̀ ide nkpɔ

¹² Idei ilu bisi í ya nɛ bɛɛrɛi. Amma idei nnyɛi í ya jɔ̀ ku ce nfe.

¹³ Ideɛ ŋa iyi í ya fɔ hai sinteɛ hee do iri ku kpaɛ fei ide hai nɛ yaase ŋai,

¹⁴ nɔ ci ya coko. Inɛ kãma kaa mà mii iyi á na ku ce, nɔ inɛ kãma kaa yɔkɔ ku sɔ̃ɔ mii iyi á na ku ce si anyiɛ.

¹⁵ Icɛi nnyɛi í ya gbɛɛjiɛi, nŋu iyi kù mà baa kpãa iyi á too ku bɔò inɔ ilu.

Idei ilaalu ŋa

¹⁶ Inɔ kufɔi á jɛ ti ilɛ bii ama keeke hai nɛ yaase gɔ í jɛ ilaalu nɔ akaweɛ ŋa waati kãma fei à ya maa jɛ jingau.

¹⁷ Amma inɔ didɔ̃i á jɛ ti ilɛ bii amai amanlu jiida gɔ í jɛ ilaalu nɔ akaweɛ ŋa à ya jɛ si waati iyi í jɔ ku ba a nɛ gbugbã. Nɔ a ci ya jɔ̀ atɛ̃ ku kpa ŋa.

¹⁸ Inɛ iyi í nɛ ika, kaakatai ileɛ í ya dasii nɔ ileɛ ku maa lɔ ijĩ.

¹⁹ Inɛ ŋa à ya ce sɔndai na inɔ didɔ̃, atɛ̃ vɛ̃ɛ mɔ í ya jɔ̀ kuwɛɛ nŋa ku dɔ̃, fiai í ya jɔ̀ a ba fei ndɛɛ.

²⁰ Maà ya sɔ irii ilaalu baa si lasabuɛ, nɔ i maà ya fɔ laalɔi amanlu gɔ baa ilaawa bi ku sũɛ, domi baa yɛi á yɔkɔ koo sisi ide iyi ì fɔ.