Woo lasabu 1 - Bibeli do fee

Mii fei ngbɛi

¹ Ide iyi amu woo lasabuò yaasei andunya, ilaalu iyi í wa Zeruzalɛmu si dimii Davidi ǹ fɔ wee.

² Ǹ ni, ngbɛi ngbɛi, mii fei ngbɛi.

³ Amanɛ wa ce icɛ kugaabu si andunya ihɛ̃. Amma aranfãani yoomai í ya ba si.

⁴ Inɛ ŋa à ya maa ku nɔ inɛ mmu ŋa à ya sãsi agbɛ nŋa wa, amma andunya á maa wɛɛ hee do ajɔ fei.

⁵ Bɛɛbɛi inunu í ya la, nɔ ku lɔ, nɔ ku maa saasaò ku nyi hai bii í ya la wa.

⁶ Fufu mɔ í ya dede hai awɔ njɛi kpãai inunu nɔ ku sinda ku bɔ awɔ cangai kpãai inunu, nɔ bɛɛbɛi í ya maa ce waati kãma fei.

⁷ Inyii ido fei í cã wa bɔ inɔ tenku, amma tenkuu kaa kɔ̃ ajɔ kãma. Nɔ inyii ido ŋau à kɔ̀ à wasi ku koo hee nsɛi.

⁸ Nɔ mii ŋau bɛ fei à ya gbɛɛji wai hee í kpeeò ku fɔ. Ilu ku cɔ ci ya to iju, nɔ ide ku gbɔ mɔ ci ya to itĩ.

⁹ Nkãma kù jɛ mii titɔ̃ si andunyau ihɛ̃, domi iyi í tako í wɛɛ wo, á na ku wɛɛ má, nɔ mii iyi í tako í ce wo, nŋu mɔi á na ku ce má.

¹⁰ Bii inɛ gɔ í yɛ mii gɔ í ni titɔ̃i, ka mà iyi í tako í wɛɛ wo hai ku kpɛ.

¹¹ A kaa ka ye gigii mii ndii tako. Nɔ baa mii iyi á na ku ce si anyi nwa, inɛ ŋa aa gbɛjɛ ideɛ.

Bisii amanɛ ngbɛi

¹² Amu woo lasabuò yaasei andunya ǹ jɛ bommai Izirɛli si ilui Zeruzalɛmu.

¹³ Ǹ dasi idɔ n cɔ do laakai mii iyi wa ce si andunya n ba n mà yaaseɛ. Amma icɛ kugaabu gɔi iyi Ilaaɔ̃ í jilɛa amanɛ ŋa.

¹⁴ Ǹ yɛ mii iyi wa ce si andunya fei nɔ ǹ ba wee ngbɛi. Í yɛi bɛi amanɛ wa sɛi si fufu.

¹⁵ Mii iyi í ká, a kaa yɔkɔ a tɔɔ má, nɔ mii iyi kù wɛɛ a kaa yɔkɔ a kàa.

¹⁶ Nɔ ǹ fɔ si idɔm ǹ ni, ǹ nɛ bisi ǹ re ilaalu ŋa iyi à tako à cuaam wa fei si ilui Zeruzalɛmu. Nɔ do ntɔ, bisim do kumàm í la.

¹⁷ Nɔ ǹ dasi idɔ n ba n mà yaasei bisi ku nɛ do yaasei nnyɛi ku jɛ. Nɔ ǹ yɛ iyi bɛ mɔ í yɛi bɛi amanɛ wa sɛi si fufu.

¹⁸ Ntɔ ntɔ, bii inɛ í nɛ bisi nla nla, bɛɛbɛ mɔi inɔ kufɔɛ á la, nɔ inɛ iyi wa kɔ̃ɔsi kumàɛ, bɛɛbɛ mɔi wahalaɛ á kɔ̃ɔsi.