Woo kiiti ŋa 3 - Bibeli do fee

¹ Aɔ̃ Lafɛ̃ɛ í jɔ̀ dimi ŋau bɛi ku cɔò laakaii inɛi Izirɛli ŋa iyi a kù mà igũi Kanaã ŋau fei.

² Aɔ̃ Lafɛ̃ɛ í bi dimii inɛi Izirɛli ŋa iyi à dede wa ŋau mɔ a mà bɛi à ya ce igũ, iyi í re mɔm aŋa iyi a kù màa wo tako.

³ Inɛ ŋa iyi à gbe si ilɛu, ilaalu miiui inɛi Filisi ŋaui do inɛi Kanaã ŋau fei do inɛi Sidɔ̃ɔ ŋa do inɛi Hɛvi ŋa iyi à wa bi iri kutai Libãau, hai bi iri kutai Baali-Hɛɛmɔɔu hee ku bɔ Lebo-Amati.

⁴ Dimi ŋau bɛi Aɔ̃ Lafɛ̃ɛ á so ku cɔò laakaii inɛi Izirɛli ŋau ku ba ku mà bii í jɛ aa jirima wooda ŋa iyi í jɔ̀ Moizi í jilɛa bala nŋa ŋau.

⁵ Nɔ inɛi Izirɛli ŋau à wa si inɔi inɛi Kanaã ŋa do inɛi Hɛti ŋa do inɛi Amɔre ŋa do inɛi Ferɛzi ŋa do inɛi Hɛvi ŋa do inɛi Zebusi ŋa.

⁶ Nɔ à so ama inaabo nŋa ŋa à ce abo, nɔ aŋa mɔ à ya na ŋa ama inaabo nŋa ŋa a gba abɔdɔ̃, nɔ à ya maa tɔɔ iwɛ̃ nŋa ŋa.

Otiniɛli

⁷ Inɛi Izirɛli ŋa à cea Aɔ̃ Lafɛ̃ɛ nŋa mii iyi kù dɔ̃aa si, à gbɛjɛ ideɛ nɔ à waa tɔɔ iwɛ̃ Baali do Asera ŋa.

⁸ Ŋɔi idɔɔkɔ̃i Aɔ̃ Lafɛ̃ɛ í dede si ŋa, nɔ í so ŋa í daa Kusãa-Risataimu ilaalui Mezopotami si awɔ. Nɔ í mu ŋa aru à ceaa icɛ adɔ̃ mɛɛjɔ.

⁹ Ŋɔi inɛi Izirɛli ŋau à dɔ̃ anu si Aɔ̃ Lafɛ̃ɛ à tɔɔɛ ku na ku faaba aŋa, nɔ Aɔ̃ Lafɛ̃ɛ í bɛ nŋa Otiniɛli wa. Otiniɛli amai Kenazi ifɔi Kalɛbui.

¹⁰ Nɔ hundei Aɔ̃ Lafɛ̃ɛ í naa siɛ í jɔ̀ í jɛ woo kiitii inɛi Izirɛli ŋau. Nɔ í bɔ igũ nɔ Aɔ̃ Lafɛ̃ɛ í jɔ̀ í jɛ Kusãa-Risataimu ilaalui Mezopotamiu igũ.

¹¹ Nɔ ilɛu í nɛ laakai ku sũ adɔ̃ ciiji. Si anyiɛ Otiniɛli amai Kenaziu í bɛi í ku.

Ehudu

¹² Inɛi Izirɛli ŋau à nyi à cea Aɔ̃ Lafɛ̃ɛ mii iyi kù dɔ̃aa si má. Nɔ Aɔ̃ Lafɛ̃ɛ í mua Egolɔ̃ɔ ilaalui Moabuu gbugbã si ŋa si na iyi í jɔ̀ à ce mii iyi kù dɔ̃aa si.

¹³ Ŋɔi Egolɔ̃ɔ í dĩ tɔɔsi do inɛi Amɔɔ ŋa do inɛi Amalɛki ŋa nɔ à bɔ igũ si inɛi Izirɛli ŋau, nɔ à kãmia ŋa à gba ilu ku nɛ kpakpa ŋau.

¹⁴ Nɔ inɛi Izirɛli ŋa à baa à jɛ arui ilaalu Egolɔ̃ɔ adɔ̃ maatũ do mɛɛta.

¹⁵ Ŋɔi à nyi à dɔ̃ anu si Aɔ̃ Lafɛ̃ɛ má à tɔɔɛ ku na ku faaba aŋa. Nɔ Aɔ̃ Lafɛ̃ɛ í bɛ nŋa Ehudu canga iyi wa jɛ amai Gera hai si dimii Bɛnzamɛɛ ku naa ku faaba ŋa. Inɛi Izirɛli ŋau à bɛ Ehudu koo cea Egolɔ̃ɔ ilaalui Moabuu amua ŋa.

¹⁶ Ŋɔi Ehudu í ce taakuba andɛ minji gɔ, kusɔɛ í to agbãawɔ akã, nɔ í sɔkɛɛ si kpakaɛ í singaɛ si lɛlɛi jĩnɛɛ ŋa do ikpa gonta njɛɛ.

¹⁷ Nɔ í bɔ amuau ku na Egolɔ̃ɔ. Wee Egolɔ̃ɔ kaato nla nlai.

¹⁸ Waati iyi Ehudu í naa amuau í tã, ŋɔi nŋu do inɛ ŋa iyi à so amuau wa à sinda à waa nɛ.

¹⁹ Iyi à to Giligali bi kuta ŋa iyi à jɛ iwɛ̃ ŋau, ŋɔi Ehudu í sinda í nyi wa í koo í sɔ̃ ilaaluu í ni, ilaalu, ǹ nɛ idei asii gɔ ǹ wa n bi n sɔ̃ɛ. Ŋɔi ilaaluu í ni ku coko nɔ inɛ ŋa iyi à wa kɔkɔɛ ŋa fei à fita.

²⁰ Wee wa bubai hee lele inɔ ilaawa ku tũ iyi à cea nŋu akãu. Ŋɔi Ehudu í tɛkɛɛ siɛ nɔ í sɔ̃ɔ í ni, ide iyi ǹ wa n bi n sɔ̃ɛu hai bi Ilaaɔ̃i wa naa. Nɔ ilaaluu í dede wa hai si kitã bii wa bubau.

²¹ Nɔ do awɔ canga Ehudu í nya taakuba iyi í wa si gonta njɛɛu í gũ ilaaluu si inɔ.

²² Isɔi taakubau í lɔ, nɔ akpau mɔ í mile siɛ nɔ ikpo í bii isɔi taakubau, domi Ehudu kù nya taakubau hai si caakaɛu.

²³ Si anyiɛ ŋɔi Ehudu í cĩmbo gamboi ile kugboka ŋau nɔ í sɔkɔ siɛ í bɛi í fita do anyii ileu.

²⁴ Waati iyi í fita í nɛ, ŋɔi woo ce icɛi ilaalu ŋau à koo à cɔ nɔ à ba wee gambo ŋau fei wa cĩmbo, ŋɔi à ni, á jɛ wa ce angule ilaawa lele ku tũu bɛ titãi.

²⁵ Nɔ à degbeɛ hee í kpɛ í caa, nɔ kù cĩ gambo ŋau. Si bɛi à yɛ kù waa cĩ gambo ŋau, ŋɔi à so kilee nɔ aŋa taka nŋa à cũu à bɛi à ba wee lafɛ̃ɛ nŋa í ku wa sũ ilɛ bɛ.

²⁶ Waati iyi aŋa à waa degbe ilaaluu ku cĩ ileu, waati bɛɛbɛ fei Ehudu njɛ í sa tã. Nɔ í lɔ kutai iwɛ̃ ŋau hee í to ikpa Seira.

²⁷ Iyi í to Seira bɛ gbakã í fã kuui si ilɛi iri kutai Efaraimu ŋau í tɔtɔɔ inɛi Izirɛli ŋau, nɔ wa cua nŋa à waa kitaò wa hai antaii iri kuta ŋau.

²⁸ Ŋɔi í sɔ̃ ŋa í ni, i toom wa ŋa domi Aɔ̃ Lafɛ̃ɛ í da nŋɛ inɛi Moabu mbɛɛ nŋɛ ŋau si awɔ. Nɔ à tooɛ à kita wa à na à da adakuai idoi Zuudɛ̃ɛ si tengii ilɛi Moabu, nɔ a ci ya jɔ̀ inɛ kãma kù kua idou.

²⁹ Si waati nŋu bɛ inɛi Moabu ŋa iyi à kpa à to amanɛ dubu mɛɛwa (10.000). Inɛ ŋa iyi à kpa ŋau fei, kaasãanɛ ŋai nɔ à nɛ wɔɔkɔ, baa akã nŋa kù fita si.

³⁰ Hai waati bɛɛbɛi inɛi Moabu ŋau à sinti ku sũa inɛi Izirɛli ŋa iri ilɛ, nɔ ilɛu í nɛ laakai ku sũ adɔ̃ cinɛ (80).

Samgaa

³¹ Si anyii Ehudu nɔ Samgaa amai Anati í tɛkɛ siɛ, nɔ í kpa inɛi Filisi ŋau aŋa cĩɔ mɛɛfa (600) do isɔ gɔ iyi à ya gũò kɛtɛ iyi kù waa jɛ ku nɛ. Nŋu mɔ í faaba inɛi Izirɛli ŋa.