Woo kiiti ŋa 2 - Bibeli do fee

Aɔ̃ Lafɛ̃ɛ í yɛ taalei inɛɛ ŋa

¹ Amalekai Aɔ̃ Lafɛ̃ɛu í dede wa hai Giligali í bɔ Bokimu, nɔ í sɔ̃ inɛi Izirɛli ŋau í ni, amui ǹ fitaò ŋɛ wa hai ilɛi Ezibiti, nɔ ǹ naaò ŋɛ wa si ilɛ iyi ǹ wãò bala nŋɛ ŋa do kugbasi ǹ ni an mu nŋau. Nɔ ǹ sɔ̃ ŋa ǹ ni n kaa n fũ akabuu iyi awaò ŋa à dĩu pai.

² Nɔ ǹ sɔ̃ iŋɛ mɔ ǹ ni i maà dĩ akabuu do inɛi ilɛ ŋau ihɛ̃, nɔ ǹ sɔ̃ ŋɛ má ǹ ni i lɛgɛ bi kuwee nŋa ŋa. Amma i kù gbɔ idem ŋa. Bɛirei í ce ì ce bɛɛbɛ ŋa.

³ Na ŋɔi í jɔ̀ ǹ ni n kaa n lele inɛ ŋau hai si waju nŋɛ má. Amma kɔkɔ nŋɛ bɛi aa maa wa, nɔ iwɛ̃ nŋa ŋau a jɛ nŋɛ bɛi cɛkũm.

⁴ Waati iyi amalekai Aɔ̃ Lafɛ̃ɛu í sɔ̃ inɛi Izirɛli ŋa ide ŋau í tã, ŋɔi à dɔ̃ anu hee lele à kpata.

⁵ Ŋɔi à sɔ inyau Bokimu, waatɔ woo kpata ŋa, nɔ à cea Aɔ̃ Lafɛ̃ɛ kuwee ŋa tengi bɛ.

Ikui Zozue

⁶ Ŋɔi Zozue í ni zamaau ku nɛ. Nɔ inɛi Izirɛli ŋau inɛ fei í koo í buba si ilɛ iyi à naa í jɛ tubuɛ.

⁷ Inɛ ŋau à tɔɔ Aɔ̃ Lafɛ̃ɛi si kuwɛɛi Zozue fei do si waatii kuwɛɛi inɛ ngbo ŋa iyi aŋaò Zozue ŋa à wɛɛ wo, aŋa iyi à yɛ mii nla ŋa iyi Aɔ̃ Lafɛ̃ɛ í cea inɛi Izirɛli ŋau.

⁸ Zozue amai Nunu, woo ce icɛi Aɔ̃ Lafɛ̃ɛ í ba adɔ̃ cĩɔ do mɛɛwa í bɛi í ku.

⁹ Nɔ à suu Timuna-Herɛsi si ilɛ iyi í ba si ikpɛ̃u si iri kutai Efaraimu ŋa do ikpa awɔ njɛi kpãai inunui iri kutai Gaasi.

¹⁰ Inɛ ŋa iyi à jɛ saaɛ ŋa si waati bɛɛbɛu fei à ku. Inɛ ŋa iyi à na à dede si anyi nŋa ŋau a kù mà Aɔ̃ Lafɛ̃ɛ hee má jɛ icɛ ŋa iyi í cea inɛi Izirɛli ŋau wo.

Zamaau í fũsi Aɔ̃ Lafɛ̃ɛ awɔ

¹¹ Inɛi Izirɛli ŋau à ce mii iyi kù dɔ̃a Aɔ̃ Lafɛ̃ɛ si. À lɔsi iwɛ̃ ŋa iyi à ya kpe Baali ku tɔɔ.

¹² À fũsi Aɔ̃ Lafɛ̃ɛi bala nŋa ŋau awɔ, nŋu iyi í nya ŋa wa hai ilɛi Ezibiti, nɔ à waa tɔɔ iwɛ̃i inɛ ŋa iyi à wa bi tu ŋa ŋau. À ya maa gulɛ nŋa nɔ à ya maa dede idɔɔkɔ̃i Aɔ̃ Lafɛ̃ɛ.

¹³ À fũsi Aɔ̃ Lafɛ̃ɛ awɔ, nɔ à koo à waa tɔɔ iwɛ̃ Baali do iwɛ̃ Asitaate.

¹⁴ Ŋɔi idɔɔkɔ̃i Aɔ̃ Lafɛ̃ɛ í dede si inɛi Izirɛli ŋau nɔ í jɔ̀ mbɛɛ ŋa iyi à waa kaako ŋa ŋau à kãmia ŋa à ko mii ndu ŋa ŋa, nɔ a kaa yɔkɔ a kɔ̀ ide si waju nŋa.

¹⁵ Waati iyi à bɔ igũ fei Aɔ̃ Lafɛ̃ɛ í ya jɔ̀ à jɛ ŋa igũi nɔ à wɛɛò inɔ kufɔ nla nla, domi bɛɛbɛi í tako í sɔ̃ ŋa wo do kugbasi.

¹⁶ Ŋɔi Aɔ̃ Lafɛ̃ɛ í jilɛ nŋa woo kiiti ŋa iyi aa faaba ŋa hai si awɔi woo ko mii ndu ŋa ŋau.

¹⁷ Amma a kù waa jirima baa woo kiiti nŋa ŋau, domi à ya koo a gulɛ a maa tɔɔ iwɛ̃ ŋa. Do yaase bɛɛbɛi à yaa gbãa gbãa hai si kpãa iyi bala nŋa ŋa à toou. Bala nŋa ŋau ngu ŋa à jirima woodai Aɔ̃ Lafɛ̃ɛ. Amma aŋa a kù ce bɛɛbɛ.

¹⁸ Waati iyi Aɔ̃ Lafɛ̃ɛ í jilɛ nŋa woo kiiti wa fei, nŋu takaɛi í ya wɛɛ do woo kiitiu nɔ ku nya inɛi Izirɛli ŋa hai si awɔi mbɛɛ nŋa ŋau si waatii kuwɛɛi woo kiitiu fei. Ntɔ ntɔ Aɔ̃ Lafɛ̃ɛ í ya ce araare nŋai waati iyi à waa weeweaò ijuukpãi woo ta nŋa gbugbã ŋau fei.

¹⁹ Amma bii woo kiitiu í ku, laalɔ ku ce nŋa í ya nyi ku la ku re baa ti bala nŋa ŋau mái. À ya nyi a koo a gulɛ a maa tɔɔ iwɛ̃ ŋa mái. A ci ya jɔ̀ laalɔ ku ce nŋa hee má jɛ idɔ ku le nŋa.

Aɔ̃ Lafɛ̃ɛ wa cɔ laakaii inɛi Izirɛli ŋa

²⁰ Ŋɔi idɔɔkɔ̃i Aɔ̃ Lafɛ̃ɛ í dede si inɛi Izirɛli ŋa, nɔ í ni, si bɛi inɛ ŋau ihɛ̃ a kù jirima akabuu iyi amu do bala nŋa ŋau à dĩ, nɔ a kù jirima idem,

²¹ amu mɔ n kaa n lele dimi ŋa iyi Zozue í jɔ̀ waati iyi í kuu baa akã nŋa.

²² Si bɛɛbɛi an cɔ laakaii inɛi Izirɛli ŋa n ba n mà bii í jɛ a kaa ce laakai a sinda a too si idem bɛi bala nŋa ŋa à ceu.

²³ Nɔ Aɔ̃ Lafɛ̃ɛ í jɔ̀ dimi ŋau sɛ̃ɛ, aŋa iyi kù daa Zozue si awɔu, nɔ kù waa saasaò ku lele ŋa.