Woo kiiti ŋa 1 - Bibeli do fee

Inɛi Izirɛli ŋa à buba ilɛi Kanaã

¹ Si anyii ikui Zozue, inɛi Izirɛli ŋau à bee Aɔ̃ Lafɛ̃ɛ à ni, si inɔi dimi ikã ikã nwa ŋau dimi yoomai á tako ku koo si inɛi Kanaã ŋau.

² Nɔ Aɔ̃ Lafɛ̃ɛ í jɛ nŋa í ni, dimii Zudaai á tako ku koo, aŋai ǹ daa ilɛu si awɔ.

³ Nɔ dimii Zudaa ŋa à sɔ̃ inɛ ŋa iyi à jɛ tɔkui Simeɔ̃ igbãi Zudaa à ni, i naa wa awaɛ ŋa ka koo si ilɛ iyi à na awa inɛi Zudaa ŋau kaa jɛ inɛi Kanaã ŋau igũ. Bɛɛbɛ mɔi awa mɔ aa ka naa ka sì ŋɛ si ilɛ iyi á na ku jɛ tu ŋɛ. Nɔ inɛ ŋa iyi à jɛ dimii Simeɔ̃u à sì inɛi dimii Zudaa ŋau.

⁴ Ŋɔi dimii Zudaa í koo nɔ Aɔ̃ Lafɛ̃ɛ í da nŋa inɛi Kanaã ŋau do inɛi Ferɛzi ŋa si awɔ, nɔ à kpa inɛmɔkɔ dubu mɛɛwa (10.000) si ilui Bezɛki.

⁵ Nɔ si iluu bɛ à ba ilaalu Adoni-Bezɛki nɔ à baa igũ ku ce. Ŋɔi à jɛ inɛi Kanaã ŋau do inɛi Ferɛzi ŋau igũ.

⁶ Ŋɔi ilaalu Adoni-Bezɛki wa sa, amma à leleɛ à koo à muu, nɔ à bu amaawɔ ngboɛ ŋa do amaasɛ ngboɛ ŋa.

⁷ Ŋɔi Adoni-Bezɛki í ni, ilaalu kitaò fɛɛwai à bu amaawɔ ngbo nŋa do amaasɛ ngbo nŋa ŋa nɔ à ya maa ko buubuui ijɛ iyi wa cuku hai si taabum. Ilaaɔ̃i í sãam mii iyi ǹ ce. Ŋɔi à bɔòɛ Zeruzalɛmu nɔ í ku bɛ.

⁸ Inɛi Zudaa ŋau à koo si ilui Zeruzalɛmu, ŋɔi à jɛ inɛɛ ŋa igũ, à kpa ŋa nɔ à jo iluu.

⁹ Si anyiɛ nɔ à nyi à koo si inɛi Kanaã ŋa iyi à wa antaii iri kutau do iyi à wa lɔɔma do iyi à wa ikpa awɔ cangai kpãai inunu.

¹⁰ Si anyiɛ nɔ à koo si inɛi Kanaã ŋa iyi à wa Eborɔ̃ɔ iyi à ya tako à kpe Kiria-Aaba, nɔ à jɛ dimii Sesai do Ahimaa do Talimai igũ.

¹¹ Hai bɛ nɔ à koo si inɛi ilui Debii ŋau igũ. Debiiui à ya tako à kpe Kiria-Sefɛɛ.

¹² Nɔ Kalɛbu í ni inɛ iyi í yɔkɔ í jɛ ilui Kiria-Sefɛɛ igũ, nŋu á na lafɛ̃ɛ ama inaaboi nŋu Akisau ku gbaa abɔdɔ̃.

¹³ Ŋɔi Otiniɛli amai Kenazi iyi wa jɛ ifɔi Kalɛbuu í jɛ inɛ ŋau igũ nɔ Kalɛbu í so ama inaaboɛu í naa í gbaa abɔdɔ̃.

¹⁴ Waati iyi Akisa í to bi Otiniɛli nɔ í sɔ̃ɔ í ni koo tɔɔ baai nŋu ilɛ. Ŋɔi à koo. Iyi à to bɛ, ŋɔi abou í kita hai si antaii gbankɛlɛɛu. Iyi Kalɛbu í yɔɔ gbakã ŋɔi í beeɛ í ni, mii ì bi.

¹⁵ Nɔ í jɛaa í ni, ceem amua, domi ilɛ iyi ì nam ikpa awɔ cangai kpãai inunuu bɛ kù nɛ mandi. Nam inya iyi í nɛ inyi. Nɔ Kalɛbu í naa inya iyi í nɛ isɔ̃ ŋa si iri kuta do si lɔɔmaɛ.

¹⁶ Keni iyi í jɛ anai Moiziu, tɔkuɛ ŋa à dede hai ilu ku nɛ jĩi ndii kpakpa ŋau do tɔkui Zudaa ŋau nɔ à bɔ si gbaai Zudaa do ikpa awɔ cangai kpãai inunu ikpa Aradi à koo à buba si inɔi inɛi ilu ŋau.

¹⁷ Inɛi Zudaa ŋa à sì inɛi Simeɔ̃ ŋa à koo si inɛi Kanaã ŋa iyi à wa Sefatiu. Ŋɔi à lɛgɛ iluu mam mam nɔ à sɔɔ Ɔɔma. Yaaseɛi í jɛ bomma.

¹⁸ Inɛi Zudaa ŋau à nyi à jɛ ilɛi Gaza do iluɛ ŋa igũ má, do ilɛi Asikalɔ̃ɔ do iluɛ ŋa do ilɛi Ekorɔ̃ɔ do iluɛ ŋa fei.

¹⁹ Aɔ̃ Lafɛ̃ɛ í wɛɛ do inɛi Zudaa ŋa, ŋɔi í jɔ̀ à jɛ inɛi iri kuta ŋau igũ, amma a kù yɔkɔ a kù lele inɛ ŋa iyi à wa lɔɔma ŋau domi inɛ nŋu ŋau à nɛ sarɛtii igũ ŋa iyi à ce do isɔ.

²⁰ Nɔ à na Kalɛbu ilui Eborɔ̃ɔ si bɛi Moizi í tako í fɔu, nɔ Kalɛbu í lele tɔku mɛɛtai Anaku ŋa iyi à wa bɛu.

²¹ Tɔkui Bɛnzamɛɛ ŋa a kù yɔkɔ a kù lele inɛi Zebusi ŋa iyi à wa Zeruzalɛmuu, nɔ inɛ nŋu ŋau à wa bɛ baa nsɛi do tɔkui Bɛnzamɛɛ ŋau.

²² Tɔkui Zozɛfu ŋa à koo si inɛi Betɛli ŋa, nɔ Aɔ̃ Lafɛ̃ɛ í wɛɛ do ŋa.

²³ Sinte titã tɔkui Zozɛfu ŋau à bɛ inɛ gɔ ŋai a koo a cɔ yaasei iluu wa. Iluu Luzii à ya tako à kpoo wo.

²⁴ Ŋɔi inɛ ŋa iyi à bɔ iluu ku cɔ wau à yɛ inɛ gɔ í fita wa hai bɛ nɔ à sɔ̃ɔ à ni, nyisi wa hai do bii aa ka lɔò inɔ iluu nɔ ka ceɛ jiida.

²⁵ Nɔ inɛɛu í nyisi ŋa hai do bii aa ba a lɔò inɔ iluu. Ŋɔi à lɔ nɔ à kpa inɛi ilu ŋau, amma à jɔ̀ inɛ iyi í nyisi ŋa hai do bii aa lɔò nŋu do nyaanzeɛ ŋa fei à nɛ.

²⁶ Nɔ inɛɛu í nɛ ilɛi inɛi Hɛti ŋa í koo í ce ilu bɛ, nɔ í sɔɔ Luzi, nɔ bɛɛbɛ mɔi à ya kpoo hee ku baa nnyi.

²⁷ Inɛi Manasee ŋau a kù lele inɛi ilui Bɛti-Seãa ŋa do inɛi ilui Tanaku ŋa do inɛi Dɔɔ ŋa do inɛi Yibileamu ŋa do inɛi Mɛgido ŋa do inɛi ilu ŋa iyi à wa kɔkɔ nŋa ŋau fei. Nɔ inɛi Kanaã ŋau à wɛɛ nŋa si ilɛu bɛ.

²⁸ Waati iyi inɛi Izirɛli ŋau à na à ba gbugbã à kɔ̃ɔsi, à dasi inɛi Kanaã ŋau icɛi arui, amma a kù yɔkɔ a kù lele ŋa.

²⁹ Inɛi Efaraimu ŋau a kù yɔkɔ a kù lele inɛi ilɛi Kanaã ŋa iyi à wa ilui Gezɛɛ, nɔ à wa inɔ nŋa bɛ.

³⁰ Inɛi Zabulɔ̃ɔ ŋau a kù yɔkɔ a kù lele inɛi ilui Kitirɔ̃ɔ do inɛi ilui Nahaloli ŋa. Nɔ inɛi Kanaã ŋa à wa inɔi inɛi Zabulɔ̃ɔ ŋau, amma à dasi ŋa icɛi aru.

³¹ Inɛi Azɛɛ ŋau a kù lele inɛi ilui Ako ŋa do inɛi Sidɔ̃ɔ ŋa do inɛi Alabu ŋa do inɛi Akuzibu ŋa do inɛi Heliba ŋa do inɛi Afiki ŋa do inɛi Rehobu ŋa.

³² Na ŋɔi í ce à buba si ilɛu si inɔi inɛi Kanaã ŋau.

³³ Inɛi Nɛfitali ŋau mɔ a kù lele inɛi ilɛi Kanaã ŋa iyi à wa ilui Bɛti-Semɛsi do inɛ ŋa iyi à wa ilui Bɛti-Ana. Aŋa mɔ à wa inɔ nŋa bɛ nɔ à dasi ŋa icɛi aru.

³⁴ Inɛi Amɔre ŋau à lele tɔkui Dãa ŋau à nɛ hee si ilɛi iri kuta ŋau, a kù jɔ̀ a kù kita wa si lɔɔmau.

³⁵ Ŋɔi inɛi Amɔre ŋau à waa wɛɛ nŋa ilui Ha-Hɛrɛsi bɛ do ilui Ayalɔ̃ɔ do ilui Salibimu. Amma waati iyi tɔkui Zozɛfu ŋau à na à ba gbugbã à kɔ̃ɔsi, à dasi ŋa icɛi aru.

³⁶ Kɔɔi ilɛi inɛi Amɔre ŋau í wai hai geetei Akarabimu do hai Sela hee ku bɔ do waju bɛ.