Woo bɛ ŋa 7 - Bibeli do fee

Waazoi Etiɛni

¹ Ŋɔi woo wee nlai Ilaaɔ̃u í bee Etiɛni í ni, ideu ntɔi?

² Ŋɔi Etiɛni í jɛaa í ni, iŋɛ baam ŋa, iŋɛ Zuifu ŋa, i gbɔ iyi ǹ wa n fɔ. Waati iyi Aburahamu bala nwa í wa ilɛi Mezopotami, Ilaaɔ̃ ilu amboe í naa bi tɛɛ. Waati bɛɛbɛ, kù bɔ Harãa titã.

³ Ŋɔi Ilaaɔ̃ í sɔ̃ɔ í ni, jɔ̀ ilɛi ideɛ do nyaanzeɛ ŋa nɔ i bɔ ilɛ bii an nyisiɛ.

⁴ Ŋɔi Aburahamu í fita hai ilɛi inɛi Kaladee ŋa nɔ í koo í buba Harãa. Hai bɛ, si anyii ikui baaɛu ŋɔi Ilaaɔ̃ í jɔ̀ í naa ilɛ bii ì wa nsɛi ŋau ihɛ̃.

⁵ Waati bɛɛbɛ kù muaa bii kãma si ilɛu, baa bii á lesi kutɛ titã. Amma do iyi Aburahamu kù bí fei Ilaaɔ̃ í ceaa kuwã í ni nŋu á muaa ilɛu nɔ ku jɛ titɛɛ do ti amaɛ ŋa.

⁶ Ŋɔi Ilaaɔ̃ í sɔ̃ Aburahamu má í ni, tɔkuɛ ŋa aa wa si ilɛ mmu gɔ, bɛi aa mu ŋa a jɛ aru a wahala ŋa adɔ̃ cĩɔ mɛɛ.

⁷ Ilaaɔ̃ í nɔ í ni, amui an kiiti dimi iyi à mu ŋa aruu. Si anyii nŋu tɔkuɛ ŋau aa fita hai ilɛ bɛ a baa ilɛu ihɛ̃ bii aa tɔɔm.

⁸ Waati bɛɛbɛ Ilaaɔ̃ í na Aburahamu woodai bango ku dasi ku jɛ sɛɛdai akabuuɛ. Si anyiɛ ŋɔi Aburahamu í na í bí Izaaki nɔ í dasiɛ bango si ajɔ mɛɛjɔsiaɛ. Bɛɛbɛi Izaaki mɔ í cea Zakɔbu, nɔ Zakɔbu mɔ í cea ama maateejiɛ ŋa bɛɛbɛ, aŋa iyi à jɛ balai dimi maateejii Izirɛli ŋa.

⁹ Amai Zakɔbu ŋau à waa ba Zozɛfu ifɔ nŋa igu ku ce nɔ à muu à taa inɛ ŋa iyi à waa bɔ ilɛi Ezibiti. Amma Ilaaɔ̃ í wa anyiɛ,

¹⁰ ŋɔi í nyaa hai si wahalaɛ fei. Í muaa bisi nɔ í jɔ̀ í nɛ bɛɛrɛ bi Faraɔ̃ ilaalui Ezibitiu. Ŋɔi Faraɔ̃ í coo minjisiaɛ si ilɛu nɔ í jɔ̀ í jɛ inɛ ngboi kpasɛ̃ɛ má.

¹¹ Ŋɔi ari í naa si ilɛi Ezibiti do si ilɛi Kanaã fei, í kpã inɛ ŋa iju ntɔ ntɔ. Bala nwa ŋau a kù ba baa mii iyi aa jɛ.

¹² Ŋɔi Zakɔbu í gbɔ iyi ijɛ í wa ilɛi Ezibiti, nɔ í jɔ̀ amaɛ ŋau à ce isɛɛnɛ sinte à koo, aŋa iyi à jɛ bala nwa ŋa.

¹³ Iyi à koo bɛ isɛ gbeejisia ŋɔi Zozɛfu í tusɛ araɛ bi igbãɛ ŋau do ifɔɛ, nɔ Faraɔ̃ mɔ í tɔtɔɔ í màò ŋa.

¹⁴ Ŋɔi Zozɛfu í sɔ̃ ŋa í ni a koo a kpe Zakɔbu baai nŋu wa do nyaanzeɛ ŋa fei. Wee inɛ ŋau à wɛɛi amanɛ kitaò fɛɛwa do miiu.

¹⁵ Bɛɛbɛi Zakɔbu í bɔò Ezibiti. Bɛi í ku, bɛ mɔi amaɛ ŋa bala nwa ŋau à ku.

¹⁶ Nɔ à so iku nŋa à bɔò Sikɛmu à koo à si ŋa si balɛ iyi Aburahamu í tako í ra bi amai Hamɔɔ ŋau.

¹⁷ Ide iyi Ilaaɔ̃ í wãò Aburahamuu, iyi waatii kuceɛ í maai wa inɛ nwa ŋa à kpɔ à waa kɔ̃ɔsi si ilɛi Ezibitiu.

¹⁸ Si anyii adɔ̃ nkpɔ nkpɔ inɛ mmu gɔ í naa í jɛ bomma, inɛ nŋu kù mà Zozɛfu.

¹⁹ Nŋui í dĩ ijui inɛ nwa ŋa nɔ í ce nŋa laalɔ, nɔ í nyi í tilasi ŋa má a nyɔ ama kpɔtɔɔ nŋa ŋa a ku.

²⁰ Waati bɛɛbɛi à bí Moizi. Ama kpɔtɔɔi iyi í sĩa hee í caa. Ŋɔi à wòo bɛ si kpasɛ̃i baaɛ cukpa mɛɛta.

²¹ Iyi à koo à jilɔɔ, ŋɔi ama inaaboi Faraɔ̃ í so ndɛɛ í muu bɛi amai nŋu takaɛ.

²² Ŋɔi à kɔa Moizi si bisii inɛi Ezibiti ŋau fei nɔ í baa í jɛ ilu gbugbã si ide ku fɔ do si kuceɛ.

²³ Iyi Moizi í to adɔ̃ ciiji, ŋɔi í dasi idɔ nŋu koo cɔ inɛi Izirɛli ŋa dimiɛ ŋau.

²⁴ Ŋɔi í yɛ inɛi Ezibiti gɔ wa kpã inɛ akã nŋa iju, ŋɔi í bɔ inɛɛu ku faaba nɔ í cã inɛi Ezibitiu í kpaa.

²⁵ Í tamaa bɛi inɛi nŋu ŋa aa mà iyi Ilaaɔ̃ í bɛ nŋu wai nŋu ku na ku faaba ŋa, amma a kù mà.

²⁶ Iju kumáɛ ŋɔi Moizi í yɛ inɛi Izirɛli minji gɔ ŋa iyi à waa ja. Ŋɔi wa bi ku la ŋa, nɔ í ni, kpaasim ŋa, iŋɛ iyi ì jɛ nyaanze akã ŋa, na mii í ce ì waa wahala njɛ bɛɛbɛ ŋa.

²⁷ Ŋɔi inɛ iyi wa wahala kpaasiɛu í tale Moizi í ni, yooi í ceɛ inɛ ngbo i na i kiiti nwa.

²⁸ Ì waa bi i kpa amu mɔ bɛi ì kpa inɛi Ezibitiu anai?

²⁹ Iyi Moizi í gbɔ ideu ŋɔi í sa í nɛ ilɛi Madiãa í koo wa jɛ inɛ njoo bɛ. Bɛi í so abo nɔ í bí ama inɛmɔkɔ minji.

³⁰ Si anyii adɔ̃ ciiji ŋɔi ajɔ nŋu gɔ amaleka gɔ í naa bi tɛɛ si gbaau kɔkɔi iri kutai Sinai. Amalekau í naai si ama wua tũtũ gɔ iyi ina í wa siɛ amma kù waa jo.

³¹ Iyi Moizi í yɔɔ ŋɔi í biti. Nɔ í sɛkɛɛ siɛ í bɔ ku cɔɔ, ŋɔi í gbɔ ide ku fɔi Aɔ̃ Lafɛ̃ɛ wa ni,

³² amui ǹ jɛ Ilaaɔ̃, Lafɛ̃ɛi Aburahamu do Izaaki do Zakɔbu, balaɛ ŋa. Ŋɔi Moizi í yaya do njo, kù waa bi inyau ku cɔ má.

³³ Ŋɔi Aɔ̃ Lafɛ̃ɛ í sɔ̃ɔ í ni, bɔ baataɛ bɛ, domi inya bii ì waa leekĩu bɛ inya kumái.

³⁴ Ǹ yɛ wahalai inɛm ŋa iyi à wa ilɛi Ezibiti. Ǹ gbɔ kukpata nŋa, nɔ ǹ kita wa na n faaba ŋa. To, nsɛi, naa wa, n bɛɛ Ezibiti.

³⁵ Moiziu, iyi inɛi Izirɛli ŋa à kɔ̀si wo nɔ à nia, yooi í ceɛ inɛ ngbo woo kiiti, nŋui Ilaaɔ̃ í bɛ ku jɛ inɛ ngbo woo faaba nŋa do sobii amaleka iyi í naa bi tɛɛ si ama wuau.

³⁶ Moiziu nŋui í nya inɛi Izirɛli ŋa hai ilɛi Ezibiti nɔ í ce nyinda ŋa do maamaake ŋa si ilɛu do si Tenku Nkpau do si gbaa adɔ̃ ciiji.

³⁷ Moizi takaɛ í nyi í sɔ̃ inɛi Izirɛli ŋau má í ni, Ilaaɔ̃ á bɛ si ŋɛ walii wa bɛi amu, iyi á jɛ inɛ akã nŋɛ.

³⁸ Moizii í tako í wa bii inɛi Izirɛli ŋau à tɔtɔɔ si gbaau. Nŋui í wa afei bala nwa ŋa do amaleka iyi í baa ide ku fɔ si iri kutai Sinaiu. Nɔ hai bi tɛɛi í gba idei kuwɛɛ í na wa.

³⁹ Amma bala nwa ŋau a kù waa bi ideɛ ku gbɔ. À kɔ̀siɛ à waa bi a nyi ikpa ilɛi Ezibiti má.

⁴⁰ Ŋɔi í jɔ̀ à sɔ̃ Arɔ̃ɔ à ni, ce nwa iwɛ̃ iyi á cua nwa si kpãa domi Moiziu iyi í nya wa wa hai ilɛi Ezibiti a kù mà mii iyi í coo.

⁴¹ Ŋɔi à ce iwɛ̃ gɔ iyi í jɔ ama kɛtɛ, nɔ inɔ nŋa í dɔ̃ na icɛi awɔ nŋau nɔ à ceaa kuwee.

⁴² Na nŋu, Ilaaɔ̃ í fa araɛ hai bi tu ŋa nɔ í jɔ̀ à waa tɔɔ inunu do cukpa do leleaɔ̃ ŋa. Ide nŋui à kɔ si tiai walii ŋau à ni, Ilaaɔ̃ í ni, iŋɛ inɛi Izirɛli ŋa, amui í cea dimii kuwee ikã ikã adɔ̃ ciiji si gbaau ihɛ̃ ŋa?

⁴³ Aawo, iwɛ̃ ŋa iyi iŋɛ taka nŋɛ ì ce ŋai ì cea kuwee ŋa. Ilei acɔi iwɛ̃ Molɔkui ì ya maa so ŋa do leleaɔ̃i iwɛ̃ Refãa. Na ŋɔi í jɔ̀ an jɔ̀ a mu ŋɛ a nɛò ŋɛ hee ilɛi Babilɔni.

⁴⁴ Nɔ Etiɛni í ni má, bala nwa ŋau à nɛ ilei acɔ iyi í jɛ bi kuko do Ilaaɔ̃ si gbaau, nŋui wa nyisi iyi Ilaaɔ̃ í wɛɛ do aŋa. Moizi í cooi bɛi Ilaaɔ̃ í nyisiɛ í ni ku coou.

⁴⁵ Ilei acɔu, bala nwa ŋa iyi à naa si anyii inɛ sinte ŋau, aŋa do Zozue woo cua nŋa à soo à nɛò wa ilɛu ihɛ̃. Ilɛu Ilaaɔ̃i í lele dimi ŋa iyi à tako à wa si wo. Nɔ ilei acɔu í wa ihɛ̃ hee waatii ilaalu Davidi.

⁴⁶ Davidi í ba didɔ̃i Ilaaɔ̃, nɔ í tɔɔɛ ku jɔ̀ nŋu ku maa ile tengi bii tɔkui Zakɔbu ŋa aa ya gulɛaa.

⁴⁷ Amma Salomɔɔi í maa ileu.

⁴⁸ Do nŋu fei, Ilaaɔ̃ nŋu iyi í wa hee lele, ci ya wa si ile iyi amanɛ ŋa à ma. Bɛɛbɛi walii gɔ í tako í fɔ wo í ni,

⁴⁹ Ilaaɔ̃ í ni, lelei í jɛ kitãi bommam, nɔ ilɛi í jɛ bi ku lesi isɛm. Debɛi, dimii ile yoomai aa yɔkɔ i maam ŋa. Mà iwoi inya í wa bii an ya n sĩmi.

⁵⁰ Kù jɛ amui ǹ ce fei ndɛɛ?

⁵¹ Nɔ Etiɛni í ni má, iŋɛ inɛ kugaabu ŋai, idɔ nŋɛ do itĩ nŋɛ fei í le. Ì ya maa kɔ̀si Hundei Ilaaɔ̃ ŋai waati kãma fei. Iŋɛ mɔ ì waa ce bɛi bala nŋɛ ŋa à tako à ce wo.

⁵² Walii yooma ŋai bala nŋɛ ŋa a kù kpã iju. À kpa hee do inɛ ŋa iyi à fɔ kunaai Inɛ Dee Deeu, inɛ iyi iŋɛ taka nŋɛ ì zambaɛ si nsɛi ì kpaa ŋau.

⁵³ Iŋɛ iyi do saabui amaleka ŋau, Ilaaɔ̃ í na ŋɛ woodaɛ, i kù too si woodau ŋa.

Etiɛni í ku

⁵⁴ Iyi inɛ ŋau à gbɔ ideu ŋɔi idɔ nŋa í kɔ̃ si Etiɛni hee à waa ŋɔ amaawɔ nŋa ŋa.

⁵⁵ Amma Etiɛni í kɔ̃ò Hundei Ilaaɔ̃ nɔ í cɔ lele, ŋɔi í yɛ amboei Ilaaɔ̃ nɔ í yɛ Jesu mɔ wa leekĩ do ikpa awɔ njɛɛ.

⁵⁶ Ŋɔi í ni, i gbɔ ŋa, ǹ yɛ lele í cĩ nɔ Amai Amanɛ wa leekĩ do ikpa awɔ njɛi Ilaaɔ̃.

⁵⁷ Amma à dĩ itĩ nŋa à bɛi à dɔ̃ anu nla nla nɔ à sɛi ajɔ à koo à wo siɛ.

⁵⁸ Ŋɔi à faa hai inɔ ilu à koo à nyɔɔ ku ba a taa kuta a kpaa. Ŋɔi inɛ ŋa iyi à tako à máa ideu à bɔ kumboo nŋa ŋa à jɔ̀a awaasũ gɔ bɛ à ya kpoo Sɔlu.

⁵⁹ Si bɛi à waa ta Etiɛni kutau ŋɔi Etiɛni í ce kutɔɔ í ni, Lafɛ̃ɛ Jesu, gba hundem.

⁶⁰ Ŋɔi í cuku í gulɛ wa dɔ̃ anu hee lele wa ni, Lafɛ̃ɛ, maà mu ŋa do dulum nɔu ihɛ̃. Iyi í fɔ bɛɛbɛ í tã nɔ í ku.