Woo bɛ ŋa 5 - Bibeli do fee

Idei Ananiasi do Safira

¹ Amma mɔkɔ gɔ í wɛɛ iyi à ya kpe Ananiasi, aboɛ mɔ à ya kpoo Safira. Mɔkɔu í ta iko nŋa gɔ,

² nɔ í jilɛ ikɔ akãi fiau ndɛɛ, iyi í gbeu mɔ í koo í na woo bɛ ŋau. Nɔ wee aboɛ í wɛɛò kumàsiɛ.

³ Iyi í na ŋa fiau ŋɔi Piɛɛ í beeɛ í ni, Ananiasi, bɛirei í ce ì jɔ̀ Seetam í lɔ si idɔɛ hee ì waa sɔa Hundei Ilaaɔ̃ ibo nɔ ì jɔ̀ bubui fiai ikou ndɛɛ.

⁴ Iko iyi ì tau awɔ si ì nɔɔ ba. Iyi ì taa ì tã, fiau kù jɛ titɛɛi? To, na mii í jɔ̀ ì ce dimii lasabuu ihɛ̃. Kù jɛ amanɛ ŋai ì sɔa ibo, Ilaaɔ̃i ì sɔa.

⁵ Iyi Ananiasi í gbɔ ideu gbakã ŋɔi í cuku tengi bɛ í ku. Ŋɔi inɛ ŋa iyi à gbɔ ideu fei njo í mu ŋa hee í caa.

⁶ Ŋɔi awaasũ ŋa à naa à wo ikuu do acɔ à koo à suu.

⁷ Si anyii isɔ mɛɛta má, ŋɔi aboɛ mɔ í lɔ wa. Wee kù mà mii iyi í ce mɔkɔi nŋu titã.

⁸ Ŋɔi Piɛɛ í beeɛ í ni, fia iyi mɔkɔɛ í naaò wau ihɛ̃, bɛɛbɛi ì ta iko nŋɛu ŋa? Ŋɔi Safira í jɛaa í ni, bɛɛ mbɛ.

⁹ Ŋɔi Piɛɛ í beeɛ í ni, bɛirei í ce iŋɛ minji fei ì ce anu akã i cɔ laakaii Hundei Aɔ̃ Lafɛ̃ɛ bɛɛbɛ ŋa. Cɔ, inɛ ŋa iyi à si mɔkɔɛ à wa andɛ koofa bɛ, aa si awɔ mɔ.

¹⁰ Bɛ gbakã ŋɔi abou mɔ í cuku í ku si wajui Piɛɛ bɛ. Ŋɔi awaasũ ŋau à lɔ bɛ à koo à ba í ku, ŋɔi à soo wa à naa à suu kɔkɔi mɔkɔɛ.

¹¹ Ŋɔi njo í mu inɛi igbɛi Jesu ŋau ntɔ ntɔ do inɛ ŋa iyi à gbɔ ideu fei.

Maamaake nkpɔ

¹² Ŋɔi woo bɛ ŋau à wasi maamaake do nyinda nkpɔ ku ce si inɛ ŋa. Nɔ woo dasi Jesu naanɛ ŋau à ya tɔtɔɔ bantumai Salomɔɔ.

¹³ Inɛ kãma kù bi ku lɔ inɔ nŋa do muafiti domi à waa ce njo, amma do nŋu fei à waa saabu ŋa ntɔ ntɔ.

¹⁴ Amma kukpɔi inɛ ŋa iyi à dasi Lafɛ̃ɛ Jesu naanɛ ntɔ ntɔ í kɔ̃ɔsi wa koo, hai inɛmɔkɔ do inaabo ŋa.

¹⁵ Ŋɔi inɛ ŋa à wasi ku naaò bɔ̃ɔ ŋa wa si kpãa ŋa. À ya naa a jilɛ ŋa si daayi ŋa do si sɛ̃ɛ ŋa ku ba bii Piɛɛ wa lɔ ayaɛ ku bii inɛ gɔ ŋa si inɔ nŋa.

¹⁶ Ŋɔi inɛ nkpɔ í wasi ku naaò bɔ̃ɔ ŋa wa do inɛ ŋa iyi à nɛ inɛi inɔɔko ŋa hai ilɛɛkoi Zeruzalɛmu ŋa, aŋa fei à nɔ à ba iri.

À kpã woo bɛ ŋau iju

¹⁷ Amma woo wee nlai Ilaaɔ̃u do inɛ ŋa iyi à wa si igbɛi Sadusi ŋa iyi à wa bi tɛɛu fei à dedeò igu si gãmɛi woo bɛ ŋau.

¹⁸ Ŋɔi à mu ŋa gbakã à dasi ŋa piisɔ̃ɔ.

¹⁹ Ŋɔi idũu amalekai Ilaaɔ̃ í naa í cĩ gamboi ile piisɔ̃ɔu í nya ŋa nɔ í sɔ̃ ŋa í ni,

²⁰ i bɔ bantumai kpasɛ̃i Ilaaɔ̃ i koo i leekĩ bɛ nɔ i sisia inɛ ŋa idei kuwɛɛ titɔ̃u fei ŋa.

²¹ Nɔ woo bɛ ŋau à gbɔ ideu. Amɛɛjuumá gbakã ŋɔi à bɔ bantumai kpasɛ̃i Ilaaɔ̃ bɛ à wasi ku kɔ inɛ ŋa si cio. Wee waati bɛɛbɛ woo wee nlai Ilaaɔ̃u do inɛɛ ŋau à tɔtɔɔ nɔ à kpe igbɛi woo kiiti ŋau do inɛ ngboi Izirɛli ŋa fei, à bɛi à bɛ woo degbe kpasɛ̃i Ilaaɔ̃ ŋau a koo a gbã woo bɛ ŋau wa hai ile piisɔ̃ɔ.

²² Amma iyi à to a kù yɛ woo bɛ ŋau ile piisɔ̃ɔ bɛ. Nɔ à nyi bi inɛ ngbo ŋau má à ni,

²³ iyi à to bɛ à ba ile piisɔ̃ɔu wa cĩmbo dim dim nɔ à ba woo degbe ŋau à waa leekĩ andɛ bɛ. Amma iyi à cĩ gambo ŋau a kù yɛ inɛ kãma ile bɛ.

²⁴ Iyi inɛ ngboi woo degbe kpasɛ̃i Ilaaɔ̃u do inɛ ngboi woo wee ŋau à gbɔ ideu, ŋɔi à biti a kù mà bɛi ideu á kpa iri.

²⁵ Ŋɔi inɛ gɔ í naa í sɔ̃ ŋa í ni, i gbɔ ŋa, inɛ ŋa iyi ì dasi piisɔ̃ɔ ŋau à wa bantumai kpasɛ̃i Ilaaɔ̃ à waa kɔ inɛ ŋa si cio.

²⁶ Ŋɔi inɛ ngboi woo degbe kpasɛ̃i Ilaaɔ̃u, nŋu do inɛɛ ŋa à koo à gbã ŋa à naaò ŋa wa bi inɛ ngbo ŋau. Amma kù jɛ do gbugbã domi à waa ce njo zamaau ku maà na ku ta aŋa kuta.

²⁷ Iyi à naaò ŋa wa à leekĩ ŋa si wajui igbɛi woo kiiti ŋau nɔ woo wee nlai Ilaaɔ̃u í sɔ̃ ŋa

²⁸ í ni, à kɔ̀ nŋɛ mam mam à ni i maà ya ce waazo do irii mɔkɔu má ŋa. Amma wee ì ce waazo nŋɛ ì waa koo ŋa hee ì kɔ inɛi Zeruzalɛmu ŋa fei si cio nŋɛ nɔ ì waa bi i dasi wa taalei ikui mɔkɔu ŋa.

²⁹ Ŋɔi Piɛɛ do woo bɛ kpaasiɛ ŋau à jɛ à ni, tilasi idei Ilaaɔ̃i aa ka jirima, kù jɛ ti amanɛ ŋa.

³⁰ Aɔ̃ Lafɛ̃ɛi bala nwa ŋai í jĩ Jesuu hai si balɛ, inɛ iyi ì kpakpa si jĩi ì kpaa ŋau.

³¹ Ŋɔi Ilaaɔ̃ í soo lele í jilɔɔ awɔ njɛɛ ku jɛ ilaalu do Woo faaba nɔ ku muaò inɛi Izirɛli ŋa kpãa a kpaasi idɔ ku ba ku kpa dulum du ŋa.

³² Awai à jɛ sɛɛdai mii ŋau bɛ, awa do Hundei Ilaaɔ̃ iyi Ilaaɔ̃ í mua inɛ ŋa iyi à waa jirimaɛ.

³³ Iyi à gbɔ ideu ŋɔi idɔ nŋa í kɔ̃ hee à waa bi a kpa ŋa.

³⁴ Amma inɛ akã nŋa iyi à ya kpe Gamaliɛli í dede í leekĩ si aninii woo kiiti ŋau í ni a nya woo bɛ ŋau wa titã. Gamaliɛliu Farisii wa jɛ do woo kɔ inɛ ŋa si wooda, nɔ í nɛ bɛɛrɛ ntɔ ntɔ bi inɛ fei.

³⁵ Ŋɔi í sɔ̃ inɛ ŋau í ni, iŋɛ inɛi Izirɛli ŋa, i laakai ŋa do mii iyi ì waa bi i cea inɛ ŋau.

³⁶ Kù kpɛ mɔm titã iyi mɔkɔ gɔ í naa ihɛ̃ à ya kpoo Tedasi nɔ í ya maa so araɛ lele bɛi inɛ nla gɔ nɔ amanɛ bɛi cĩɔ mɛɛ wa tooɛ. Amma à kpaa, nɔ mɔcɔɛ ŋau fei à fangaa, nɔ à gbɛjɛ ideɛ.

³⁷ Si anyiɛ, waati iyi à na à waa ce kuka, ŋɔi mɔkɔ gɔ mɔ í naa à ya kpoo Zudasi inɛi Galilee. Nŋu mɔ í jɔ̀ inɛ nkpɔ nkpɔ wa tooɛ. Amma à kpa nŋu mɔ nɔ inɛ ŋa iyi à waa tooɛu fei à fangaa.

³⁸ Na nŋu, bii í jɛ aa gbɔ idem ŋa, i jɔ̀ inɛ ŋau bɛ a nɛ ŋa. Bii í jɛ ideu do icɛ ŋa iyi à waa ceu hai bi amanɛ ŋai wa naa, á na ku kpa iri.

³⁹ Amma bii kuce nŋau hai bi Ilaaɔ̃i wa naa, i kaa yɔkɔ i kãmia ŋa ŋa. I ce laakai i maà ti i na i maa ba Ilaaɔ̃ ku ja ŋa. Nɔ à gbɔ ideɛ.

⁴⁰ Ŋɔi à kpe woo bɛ ŋau à cã ŋa do kpɔtɔɔ à ni a maà fɔ ide do irii Jesu má à bɛi à jɔ̀ ŋa.

⁴¹ Ŋɔi woo bɛ ŋau à nɛ hai bi igbɛi woo kiiti ŋau do inɔ didɔ̃ nla nla si na iyi í jɔ̀ Ilaaɔ̃ í ka ŋa si inɛ ŋa iyi à to a maa yaako ŋa na irii Jesu.

⁴² Ajɔ fei si bantumai kpasɛ̃i Ilaaɔ̃ do si inɔ kpasɛ̃ ŋa à ya maa ce waazoi laabaau jiidau nɔ a maa kɔ inɛ ŋa si cio waati kãma fei a maa ni Jesui í jɛ inɛ iyi Ilaaɔ̃ í cicau.