Woo bɛ ŋa 3 - Bibeli do fee

Wɛɛgɛ gɔ í ba iri

¹ Ŋɔi alɛ ajɔ nŋu gɔ zakai isɔ mɛɛta Piɛɛ do Zãa à waa bɔ kutɔɔ bantumai kpasɛ̃i Ilaaɔ̃.

² Ŋɔi à yɛ mɔkɔ gɔ bɛ iyi à bí do wɛɛgɛ. Ajɔ fei à ya na a jilɔɔi andɛi bantumai kpasɛ̃i Ilaaɔ̃ iyi à ya kpe andɛ Kusĩau, ku maa bara waati iyi inɛ ŋa à waa lɔ.

³ Iyi í yɛ Piɛɛ do Zãa à waa lɔ bantumai kpasɛ̃u ŋɔi í tɔɔ ŋa a mua nŋu ngɔgɔ.

⁴ Ŋɔi Piɛɛ do Zãa à kãsiɛ iju, nɔ Piɛɛ í ni, cɔ wa.

⁵ Ŋɔi í cɔ ŋa do laakai domi wa tamaaò ngɔgɔ si ŋa.

⁶ Amma Piɛɛ í sɔ̃ɔ í ni, n kù nɛ isɔ fũfũ hee má jɛ wura, amma iyi ǹ nɛ an muuɛ. Do irii Jesu Kirisi inɛi Nazarɛtiu, dede i nɛ.

⁷ Ŋɔi í mu awɔ njɛi mɔkɔu í dedeɛ. Bɛ gbakã, isɛi inɛɛu do ikɔ̃i isɛɛ ŋau í ce gbugbã.

⁸ Ŋɔi í fo í dingaa wa nɛ. Ŋɔi aŋaò ŋa fei à lɔ bantumai kpasɛ̃i Ilaaɔ̃ ajɔ, ŋɔi í fo í dingaa wa nɛ wa saabuò Ilaaɔ̃.

⁹ Ŋɔi inɛ fei í yɛ wa nɛ wa saabuò Ilaaɔ̃.

¹⁰ Si bɛi à mà iyi nŋui í ya tako ku maa buba andɛ Kusĩai bantumai kpasɛ̃i Ilaaɔ̃ ku maa barau, ŋɔi biti í mu aŋa fei nɔ ideu í to si ŋa.

Waazo iyi Piɛɛ í ce

¹¹ Ŋɔi mɔkɔ iyi í ba iriu kù jɛ kù nɛ hai bi Piɛɛ do Zãa. Aŋaò ŋa à wa ikpa akãi kpasɛ̃i Ilaaɔ̃ iyi à ya kpe bantumai Salomɔɔ. Nɔ inɛ ŋa iyi ideu í mu ŋa bitiu à sɛi à bɔ bi tu ŋa.

¹² Iyi Piɛɛ í yɛ ŋa ŋɔi í sɔ̃ ŋa í ni, iŋɛ inɛi Izirɛli ŋa, bɛirei í ce ì biti ì waa cɔ wa bɛɛbɛ ŋa. Ì tamaa bɛi gbugbã nwai walakɔ daa jiida nwai í jɔ̀ mɔkɔu wa nɛ ŋa?

¹³ Aburahamu do Izaaki do Zakɔbu aŋa iyi à jɛ bala nwa ŋau, Aɔ̃ Lafɛ̃ɛ nŋai í jɔ̀ Jesu woo ce icɛɛ í nɛ amboe. Iŋɛi ì muu ì na inɛ ngbo ŋa nɔ ì kɔ̀siɛ ŋa si wajui Pilati, baa do iyi Pilati wa bi ku jɔ̀ɔ wo.

¹⁴ Amma iŋɛi ì kɔ̀siɛ, nŋu iyi í jɛ Inɛ Kumá do Inɛ Dee Deeu nɔ ì tɔɔ Pilati ku jɔ̀ nŋɛ woo kpa inɛu si agbɛɛ ŋa.

¹⁵ Si bɛɛbɛ ì kpa inɛ iyi í jɛ irii kuwɛɛu ŋa. Amma Ilaaɔ̃ í jũu hai si balɛ, nɔ awa à yɔɔ.

¹⁶ Gbugbãi irii Jesui í jɔ̀ mɔkɔu ihɛ̃ í ba iri, na saabui naanɛ iyi í dasiɛ. Mɔkɔ iyi ì waa yɛ nɔ ì mà ŋau ihɛ̃, naanɛ iyi í dasi Jesuui í jɔ̀ í ba iri mam mam si wajui iŋɛ fei.

¹⁷ Nsɛi kpaasim ŋa, ǹ mà mii iyi ì cea Jesuu ŋa, ì cooi si ngɔgɔ hai mà ŋa, bɛɛbɛi do inɛ ngbo nŋɛ ŋa fei.

¹⁸ Ilaaɔ̃ í jɔ̀ walii ŋau fei à tako à fɔ ideɛ wo. Nɔ bɛɛbɛ mɔi bɛi à fɔu fei í kɔ̃. Ide iyi à fɔu nŋui í jɛ à ni, kù nɛ bɛi á ce iyi inɛ iyi Ilaaɔ̃ í cicau kù yɛ ijuukpã.

¹⁹ Na nŋu, i kpaasi idɔ nŋɛ i sinda si Ilaaɔ̃ ŋa ku ba ku kpa idei dulum du ŋɛ.

²⁰ Nɔ Ilaaɔ̃ ku mu nŋɛ kusĩmi jiida, nɔ ku bɛ Kirisi iyi í cicau wa ku jɛ tu ŋɛ, nŋu iyi í jɛ Jesuu.

²¹ Tilasii Jesu Kirisi ku maa wa lele hee awaati koo toò mii fei ku jɛ titɔ̃ si bɛi Ilaaɔ̃ í jɔ̀ walii kumáɛ ŋau à tako à fɔ wo.

²² Moizi inɛ akã nŋa í ni, Aɔ̃ Lafɛ̃ɛ nŋɛ á jɔ̀ walii gɔ ku fita hai si anini nŋɛ iyi á yɛ bɛi nŋu Moizi. Nɔ á sĩa i gbɔ mii iyi á sɔ̃ ŋɛ fei.

²³ Inɛ iyi kù waa too si idei waliiu fei aa nyaai hai si inɔi zamaai Ilaaɔ̃ a kpaa.

²⁴ Bɛɛbɛ mɔi Samuɛli do walii ŋa iyi à naa si anyiɛ, aŋa fei à tako à fɔ idei mii ŋa iyi wa ce nsɛiu ihɛ̃.

²⁵ Mii iyi walii ŋau à ni Ilaaɔ̃ á ceu, iŋɛi wa cea. Nŋui í jɛ akabuu iyi Ilaaɔ̃ í dĩ do bala nŋɛ ŋa si waati iyi í sɔ̃ Aburahamu í ni, hai si dimiɛi an jɔ̀ inɛi andunya fei ku ba kuwee.

²⁶ Bɛɛbɛi Ilaaɔ̃ í jɔ̀ woo ce icɛɛ í fita hai bi tu ŋɛ nɔ í bɔɔ wai ku ba ku wee nŋɛ ku ba iŋɛ fei i sinda i jɔ̀ laalɔ ku ce nŋɛ.