Woo bɛ ŋa 28 - Bibeli do fee

Pɔlu í wa Malitu

¹ Iyi awa fei à to gũngũm bɛ baani à mà iyi inyau Malitui à ya kpoo.

² Inɛi Malitu ŋau à mu wa do kubi jiida. À ko nwa ina nla nla awa fei à naa à nyia si na iyi í jɔ̀ ijĩ wa wɔ nɔ tũtũ wa ce.

³ Ŋɔi Pɔlu í so jĩi kambo í dasi ina. Asee njo wukuku gɔ í wa si bɛ. Iyi í gbɔ inya gbãa ŋɔi í fita í wenwee si awɔɛ.

⁴ Iyi inɛi ilu ŋau à yɛ njou si awɔi Pɔlu ŋɔi à sɔ̃ njɛ à waa ni, kãm kãm mɔkɔu ihɛ̃ woo kpa inɛi. Baa do iyi í fita hai si wahalai inyiu ihɛ̃ fei, iwɛ̃ ŋa aa kiitiɛ nɔ a kaa jɔ̀ ku wɛɛ.

⁵ Amma Pɔlu í gbugbã njou si ina kù nɔ kù gbɔ ara kuro kãma.

⁶ Ŋɔi inɛ ŋau à waa cɔɔ mà araɛ á na ku wu walakɔ mà á na ku ku. Amma à kpɛ bɛ nɔ nkãma kù ce nɔ à kpaasi ide à ni inɛɛu ihɛ̃ iwɛ̃ nla nla gɔi.

⁷ Wee kɔkɔi inyau kpasɛ̃i mɔkɔ gɔ í wa bɛ, mɔkɔui í jɛ inɛ ngboi gũngũm nɔu, à ya kpoo Pubilusi. Í gba wai jiida jiida à ce ajɔ mɛɛta si kpasɛ̃ɛ.

⁸ Wee baaɛ kù waa nɛ baani, wa ce ara gbãa do bambannu. Ŋɔi Pɔlu í bɔ ile bii wa sũu í koo í ceaa kutɔɔ í le siɛ awɔ nɔ í ba iri.

⁹ Si anyii nŋu, à naaò bɔ̃ɔ mmu gɔ ŋa wa má nɔ à ba iri.

¹⁰ Ŋɔi inɛ ŋau à jirima wa ntɔ ntɔ. Iyi awaati í to à waa bi ka nɛ ŋɔi andi bukaatai mii iyi à bi fei inɛ ŋau à mu nwa.

Pɔlu í to Romu

¹¹ Cukpa mɛɛtai à ce bɛ à bɛi à lɔ akɔi inyii Alesandii gɔ à nɛ. Nŋu mɔ gũngũm bɛi í leekĩ sukui kpaau. Akɔu í nɛ nyindai iwɛ̃ Sika ŋa.

¹² Nɔ à to ilu gɔ iyi à ya kpe Sirakusi nɔ à sũ bɛ idũ mɛɛta.

¹³ Si anyiɛ ŋɔi à dede hai bɛ má à bɔ Rezio. Iju kumáɛ nɔ fufu gɔ í dede wa hai ikpa awɔ cangai kpãai inunu wa tale wa í jɔ̀ à to Puzɔli si ajɔ minjisiaɛ.

¹⁴ Ŋɔi à yɛ kpaasi woo dasi Jesu naanɛ gɔ ŋa bɛ nɔ à ni ka ce azuma akã bi ti aŋa. Bɛɛbɛi isɛɛnɛ nwau í ce à bɛi à toò Romu.

¹⁵ Ŋɔi kpaasi woo dasi Jesu naanɛ ŋa iyi à wa Romuu à gbɔ baau nwa nɔ à naa kuko nwa hee kɔkɔi ajai Apiusi. Nɔ inɛ gɔ ŋa mɔ à kò wa bi ku sɔi inɛ njoo ŋa iyi à ya kpe Ile Mɛɛta. Iyi Pɔlu í yɛ ŋa ŋɔi laakaiɛ í sũ í wasi Ilaaɔ̃ ku saabu.

¹⁶ Iyi à to Romu ŋɔi à jɔ̀ Pɔlu í nɛ ileɛ ikã. Nɔ sooge gɔ í ya maa degbeɛ.

Pɔlu í ce waazo Romu

¹⁷ Iyi í ce ajɔ mɛɛta ŋɔi Pɔlu í kpe inɛ ngboi Zuifui Romu ŋau. Iyi à tɔtɔɔ à tã ŋɔi í ni, iŋɛ kpaasim ŋa, Zuifu ŋa iyi à wa Zeruzalɛmu à mum à koo à na inɛi Romu ŋa n kù bɛi n kù raraa zamaau si nkãma, n kù nɔ n kù kɔ̀si dedembai bala nwa ŋa.

¹⁸ Inɛi Romu ŋau à cɔ yaasei ideu nɔ à bi a jɔ̀m domi a kù yɛ sim kurara kãma iyi í to a kpam.

¹⁹ Amma Zuifu ŋau a kù jɛ ideu ŋɔi í ce ǹ so kiitiu ǹ daa ilaalu nlai Romu si awɔ, baa do iyi n kù bi n yɛ taalei dimim ŋa.

²⁰ Na ŋɔi í jɔ̀ ǹ tɔtɔɔ ŋɛ n sɔ̃ ŋɛ do yaaseɛ. Inɛ ŋa à daam si kpɛmkpɛm nii na inɛ iyi inɛi Izirɛli ŋa à waa cɔ kpãaɛu.

²¹ Ŋɔi à sɔ̃ɔ à ni, a kù yɛ tia kãma iyi à ce wa hai ilɛi Zudee na irii ideɛ, a kù nɔ a kù yɛ inɛ kãma iyi í naaò ide laalɔ wa hai bɛ na iriɛ.

²² Amma awa taka nwa à bi ka gbɔ iyi í wa idɔɛ, domi à mà bii feii à ya maa fɔ laalɔi kpãa iyi ì waa toou.

²³ Nɔ à jilɛ ajɔ iyi aa nyi wa bi tɛɛ má. Iyi ajɔu í to inɛ nkpɔi í naa ile bii í wau. Ŋɔi í ce nŋa waazo hai daakɔ hee alɛ í koo í lɛò. Wa sisi nŋa yaasei bommai Ilaaɔ̃ nɔ wa tusɛ nŋa yaasei idei Jesu hai si woodai Moizi do si tiai walii ŋau ku ba a jɛsi.

²⁴ Ŋɔi inɛ gɔ ŋa à jɛ ideu, amma inɛ gɔ ŋa a kù jɛsi.

²⁵ Si bɛi a kù gbɔsi njɛ, ŋɔi à fita hai bi Pɔlu. Waati iyi à waa bi a nɛ ŋɔi Pɔlu í fɔ ide gɔ í ni, hai tako Hundei Ilaaɔ̃ í nɛ ntɔ waati iyi í jɔ̀ walii Ezai í sɔ̃ bala nŋɛ ŋa ide gɔ.

²⁶ Í ni, bɔ bi inɛ ŋau bɛ i sɔ̃ ŋa i ni, aa ya de itĩ do laakai ŋa amma i kaa gbɔ yaasei ide kãma ŋa. Aa ya cɔ ilu ŋa jiida jiida amma i kaa yɛ ŋa.

²⁷ Ntɔ ntɔ, idɔi inɛ ŋau kù nɛ biti. À dĩ itĩ nŋa ku ba a maà gbɔ ide. Nɔ à bii iju nŋa Ku ba a maà yɛ ilu. Bɛɛbɛi à ce ku ba idɔ nŋa ku maà mà ngɔgɔ nɔ a maà na a sinda wa bi tom n jɔ̀ a ba iri.

²⁸ Ŋɔi Pɔlu í sɔ̃ ŋa má í ni, na nŋu, i mà ŋa iyi Ilaaɔ̃ í jɔ̀ idei faabaɛ í bɔ bi dimi mmu ŋa. Aŋai aa gbɔɔ. [

²⁹ Iyi Pɔlu í fɔ ideu bɛɛbɛ í tã ŋɔi Zuifu ŋau à dede à waa ce kakɔɔ ntɔ ntɔ à waa nɛò.]

³⁰ Adɔ̃ minjii Pɔlu í ce si ile iyi í hayau. Nɔ inɛ ŋa iyi à bɔ ku cɔɔ fei í ba ŋa faaji ku ce do inɔ didɔ̃.

³¹ Wa waazo idei bommai Ilaaɔ̃ nɔ wa kɔ nŋa si idei Lafɛ̃ɛ Jesu Kirisi do wɔɔkɔ nɔ inɛ kãma kù ganjiɛ.