Woo bɛ ŋa 25 - Bibeli do fee

Pɔlu í so kiitiɛ í daa ilaalu nlai Romu si awɔ

¹ Iyi Fesitu í to wa Sezaree, si ajɔ mɛɛsiaɛ í bɔ Zeruzalɛmu.

² Ŋɔi inɛ ngboi woo weei Ilaaɔ̃ ŋau do Zuifu inɛ ngbo ŋau à koo à má Pɔlu ide bi Fesitu.

³ Nɔ à waa tɔɔɛ suuru ntɔ ntɔ ku ba kú jɔ̀ Pɔlu ku naa Zeruzalɛmu. À waa bi Pɔlu ku naa Zeruzalɛmui si na iyi í jɔ̀ à dĩ zamba nŋa aŋa a ba a kpaa kpãa.

⁴ Amma Fesitu í jɛ nŋa í ni Pɔlu í wa ile piisɔ̃ɔi Sezaree nɔ nŋu takai nŋu kaa kpɛtɛ ku nyi bɛ.

⁵ Na nŋu, í ni a jɔ̀ nŋu do inɛ ngbo nŋa ŋa a koo bɛ nɔ bii í jɛ í ce taale gɔi a fɔ.

⁶ Fesitu kù re ajɔ mɛɛjɔ walakɔ ajɔ mɛɛwa si inɔ nŋa nɔ í nyi Sezaree má. Iju kumáɛ nɔ í bɔ ile bi ku ce kiiti nɔ í ni a naaò Pɔlu wa.

⁷ Iyi Pɔlu í to wa ŋɔi Zuifu ŋa iyi à naa hai Zeruzalɛmu à kaakoɛ à waa máa ide laalɔ kugaabu nkpɔ nkpɔ amma nkãma kù wɛɛ iyi wa nyisi iyi ide nŋau ntɔi.

⁸ Ŋɔi Pɔlu wa kɔò araɛ í ni, n kù ce kurara gɔ si woodai Zuifu ŋa hee má jɛ si kpasɛ̃i Ilaaɔ̃ hee má jɛ bi ilaalu nlai Romu.

⁹ Amma Fesitu wa bi nŋu ku nɛ bɛɛrɛ bi Zuifu ŋau. Na ŋɔi í jɔ̀ í bee Pɔlu í ni, ì bi i bɔ Zeruzalɛmu a ceɛ kiiti si wajum na irii ideu ihɛ̃?

¹⁰ Ŋɔi Pɔlu í ni, aawo. Bi ku kiitii ilaalu nlai Romui ǹ wa ihɛ̃, ihɛ̃i á sĩa a kiitim. N kù cea Zuifu ŋa kurara kãma, nɔ awɔ takaɛ ì waa nɛ kumàsiɛ sãa sãa.

¹¹ Bii ǹ ce kurara walakɔ daa gɔ iyi í to a kpam n kaa n kɔ̀. Amma ide ŋa iyi à waa yɛ taalem siu ihɛ̃, bii kù jɛ ntɔ inɛ gɔ kaa yɔkɔ ku dasim awɔ. Na nŋu, ǹ so kiitim ǹ daa ilaalu nlau takaɛ si awɔ.

¹² Iyi Fesitu do inɛɛ ŋa à busi njɛ à tã, ŋɔi í sɔ̃ Pɔlu í ni, si bɛi ì so kiitiɛ ì daa ilaalu nlau si awɔ, bi tɛɛi aa bɔ.

À bɔò Pɔlu si wajui Agiripa do Berenisi

¹³ Iyi waati í lɔ keeke má, ŋɔi ilaalu Agiripa do wecĩɛ Berenisi à naa Sezaree Fesitu ku ce fɔɔ.

¹⁴ Si bɛi à waa kpɛ bɛ ŋɔi Fesitu í sɔ̃ ilaaluu idei Pɔlu í ni, inɛ gɔ í wa ihɛ̃, Felisi í jɔ̀ à dasiɛ piisɔ̃ɔ.

¹⁵ Iyi ǹ bɔ Zeruzalɛmu ŋɔi inɛ ngboi woo weei Ilaaɔ̃ ŋau do inɛ ngboi Zuifu ŋau à naaò ideɛ wa bi tom. Nɔ à tɔɔm n yɛ taaleɛ ku ba aŋa a kpaa.

¹⁶ Amma ǹ jɛ nŋa ǹ ni inɛi Romu ŋa a ci ya jɔ̀ a kpa inɛ bii kù jɛ à kiitiɛ. À ya muaa waatii nŋu do woo yɛ taaleɛ ŋau a fɔ ide titã gɛlɛò gɛlɛ.

¹⁷ Ŋɔi aŋa fei à naa ilu ihɛ̃. Si bɛi n kù bi ku kpɛ má, ŋɔi iju kumáɛ ǹ kpe ŋa bi ku ce kiiti nɔ ǹ ni a gbã Pɔlu wa.

¹⁸ Ŋɔi woo yɛ taaleɛ ŋau à dede siɛ amma a kù yɛ taaleɛ si ide laalɔ gɔ bɛi ǹ wa n tamaau.

¹⁹ Idei kutɔɔi aŋa taka nŋai à waa ce si kakɔɔ, do idei mɔkɔ gɔ iyi í ku à ya kpoo Jesu. Amma Pɔlu í ni dim dim mɔkɔu í wɛɛ.

²⁰ Amu ǹ biti bɛirei an kiiti ideu ihɛ̃. Na ŋɔi í jɔ̀ ǹ bee Pɔlu bii í bi n koo n ceaa kiitii ideu Zeruzalɛmu.

²¹ Amma í so kiitiɛu í na ilaalu nlau. Nɔ ǹ ni a dasiɛ piisɔ̃ɔ má titã hee n maa n jɔ̀ a kooòɛ bi tɛɛ.

²² Ŋɔi Agiripa í sɔ̃ Fesitu í ni, amu takam ǹ bi n gbɔ ide hai si gɛlɛi mɔkɔu. Ŋɔi Fesitu í ni, ala aa gbɔɔ.

²³ Ŋɔi iju kumáɛ Agiripa do Berenisi à naa bi ku ce kiitiu do jirima jiida, ŋɔi inɛ ngboi sooge ŋa do ilu bɛɛrɛi ilu ŋau à too ŋa wa. Ŋɔi Fesitu í ni a naaò Pɔlu wa, nɔ à naaɛ wa.

²⁴ Iyi Pɔlu í to wa ŋɔi Fesitu í ni, to, awɔ ilaalu Agiripa do iŋɛ iyi ì wa ihɛ̃ fei ŋa, Pɔluu wee. Na iriɛi Zuifu ŋau fei à naa bi tom waati iyi ǹ bɔ Zeruzalɛmu, nɔ à nyi wa bi tom ihɛ̃ má, à waa la à ni kù sĩa a jɔ̀ɔ si hunde.

²⁵ Amu n kù yɛ siɛ taale kãma iyi í to a kpaa. Amma si bɛi nŋu takaɛ í so kiitiu í daa ilaalu nlau si awɔ ŋɔi í ce ǹ ni an jɔ̀ a kooɛ bi tɛɛ.

²⁶ Do nŋu fei, n kù yɛ siɛ ide baa icu akã iyi an ceaò ilaalu nlau tia. Na ŋɔi í jɔ̀ ǹ naaɛ wa si wajui iŋɛ fei. Iyi í re mɔm ǹ naaɛ wai si wajui awɔ ilaalu Agiripa, i cɔ yaasei ideu ku ba n ba iyi an kɔ.

²⁷ Kù nɛɛm yaase n jɔ̀ a kooa inɛi piisɔ̃ɔ gɔ nɔ n kù sisiaa taale gɔ iyi í ce.