Woo bɛ ŋa 24 - Bibeli do fee

Zuifu* ŋa à má Pɔlu ide

¹ Iyi í ce ajɔ miiu ŋɔi Ananiasi woo wee nlai Ilaaɔ̃u í bɔ Sezaree nŋu do inɛ ngbo gɔ ŋa do woo mà wooda gɔ iyi à ya kpe Tɛɛtulu. Ŋɔi à bɔ bi Felisi ilu ilɛu à koo à waa fɔ taalei Pɔlu.

² Ŋɔi à kpe Pɔlu wa nɔ Tɛɛtulu í lɔsi ide ku fɔ wa yɛò taaleɛ wa ni, awɔ Felisi ilu bɛɛrɛ nla, à nɛ laakai ku sũ ntɔ ntɔ do baakaɛ. Ilu ku yɛ jiidaɛ í jɔ̀ ì kpaasi mii nkpɔ na aranfãanii ilɛ nwa.

³ À jɛsi mii iyi ì waa ce fei bii fei si waati kãma fei do saabu jiida.

⁴ A kù bi ka kpa waatiɛ amma à waa tɔɔɛ i cɔ wa do iju jiida nɔ i gbɔ ide keeke iyi à nɛu ihɛ̃.

⁵ À yɛ iyi mɔkɔu ihɛ̃ ilu naanaui, nɔ í nɛ kòsi si aninii Zuifu ŋa si andunyau ihɛ̃ fei. Nŋui í jɛ inɛ ngboi kpãai Aɔ̃ ku tɔɔ gɔ iyi à ya kpe ti inɛi Nazarɛti ŋa.

⁶ Í dɛ kpãa mɔm ku riisiò kpasɛ̃i Ilaaɔ̃u. Nŋui í jɔ̀ à muu. [À bi ka kiitiɛ do wooda nwa.

⁷ Amma Lisiasi inɛ ngboi igũu í naa í gbaa hai si awɔ nwa do gbugbã.

⁸ Nɔ í ni woo yɛ taaleɛ ŋau a naa bi tɛɛ.] Awɔ takaɛ beeɛ ide, aa yɔkɔ i gbɔ ntɔi ideu si bii í jɔ̀ à waa yɛ taaleɛu.

⁹ Iyi Tɛɛtulu í fɔ bɛɛbɛ í tã nɔ Zuifu ŋa iyi à wa bɛu fei à ni ideu ntɔi.

Pɔlu í kɔò araɛ si wajui Felisi

¹⁰ Ŋɔi Felisi ilu ilɛu í tosi Pɔlu awɔ í ni ku fɔ ideɛ. Ŋɔi Pɔlu í ni, ǹ mà iyi awɔi ì jɛ woo ce kiitii ilɛu ihɛ̃ hai ku kpɛ. Na nŋu, an kɔò aram do laakai ku sũ.

¹¹ Bii ì bee aa sɔ̃ɛ iyi kù re ajɔ maateeji wa iyi ǹ bɔ Zeruzalɛmu Ilaaɔ̃ ku gulɛa.

¹² Inɛ kãma kù yɛm bii ǹ wa n ce kakɔɔ do inɛ gɔ titã hee má jɛ n kòsi ŋa ija si kpasɛ̃i Ilaaɔ̃ walakɔ ile bii à ya ce kutɔtɔɔ ŋa walakɔ si inɔ iluu.

¹³ Ide iyi à waa mám nɔu bɛ nsɛi, nkãma kù wɛɛ iyi wa nyisi iyi ntɔi.

¹⁴ Amma ide akãi an jɛsi si wajuɛ, ǹ wa n tɔɔ Ilaaɔ̃ Lafɛ̃ɛi bala nwa ŋa do kpãa iyi inɛ ihɛ̃ ŋa à waa ni iboi. Do nŋu fei, ǹ wa n jirima woodai Moizi ŋau do tiai walii ŋau fei.

¹⁵ Ǹ dasi naanɛ iyi Ilaaɔ̃ á jĩ amanɛ jiida ŋa do amanɛ laalɔ ŋa hai si balɛ, bɛi aŋa mɔ à dasi naanɛ.

¹⁶ Nŋui í jɔ̀ amu mɔ ǹ wa n hanya ajɔ fei ku ba idɔm ku maà yɛ taalem si wajui Ilaaɔ̃ do si wajui inɛ ŋa.

¹⁷ Adɔ̃ nkpɔ nkpɔi í lɔ n kù bɔ Zeruzalɛmu. Si ajɔ gbeejiu ihɛ̃i ǹ koo bɛ ǹ bɔ ku sobi inɛi ilɛm ŋa do fia nɔ n cea Ilaaɔ̃ amua.

¹⁸ Si nŋui à bam kpasɛ̃i Ilaaɔ̃ bɛ ǹ wa n ce bukii ara ku maaju. Zamaa kãma kù wa bɛ, ija ku kòsi mɔ kù wa bɛ.

¹⁹ Amma Zuifui ilɛi Azii gɔ ŋa à wa bɛ. Á sĩa aŋa taka nŋa a naa a jɛ sɛɛda si wajuɛ bii í jɛ à yɛ sim taale gɔ.

²⁰ Walakɔ jɔ̀ inɛ ŋau ihɛ̃ a fɔ taale iyi à yɛ sim si waati iyi à leekĩm si wajui igbɛi woo kiiti ŋau.

²¹ A kù yɛ taalem si nkãma bii kù jɛ si ide akãu ihɛ̃ iyi ǹ fɔ hee lele ǹ ni, nnyi ì waa kiitim ŋai si na iyi í jɔ̀ ǹ dasi naanɛ iyi iku ŋa aa na a jĩ hai si balɛ.

²² Wee Felisi í mà yaasei kpãai woo dasi Jesu naanɛ ŋa sãa sãa, ŋɔi í sɔ̃ Zuifu ŋau í ni, waati iyi Lisiasi inɛ ngboi igũu á to wa, ajɔ nŋui an wũa ide nŋɛu.

²³ Nɔ í sɔ̃ inɛ ngboi sooge ŋau í ni ku mu Pɔlu titã, amma ku jɔ̀ ku nɛ araɛ keeke nɔ kú ya jɔ̀ kpaasiɛ ŋa a ya naa a cɔɔ nɔ a máa gbɔaa.

Pɔlu í wa wajui Felisi do Dusila

²⁴ Iyi waati í lɔ keeke ŋɔi Felisi í naa do Dusila aboɛ. Abou Zuifui. Ŋɔi í ni a koo a kpe Pɔlu wa. Iyi í to wa nɔ à waa desiɛ itĩ si bɛi wa fɔ idei naanɛ ku dasi si Jesu Kirisi.

²⁵ Amma si bɛi Pɔlu wa sisi nŋa idei dee dee ku jɛ do idei ara ku mu do kiiti iyi wa naa, zigii Felisi í da nɔ í ni, aa yɔkɔ i nɛ titã. Bii ǹ ba faya an kpeɛ má.

²⁶ Wee wa bi Pɔlu ku mua nŋu fiai. Ŋɔi í ce í ya maa kpoo kpaa kpaa aŋaò a maa fɔ ide.

²⁷ Iyi í ce bɛi adɔ̃ minji ŋɔi Pɔsiu Fesitu í na í sãsi agbɛi Felisi. Wee Felisi í jɔ̀ Pɔlu ile piisɔ̃ɔ bɛi si na iyi í jɔ̀ wa bi nŋu ku nɛ bɛɛrɛ bi Zuifu ŋau.