Woo bɛ ŋa 22 - Bibeli do fee

¹ Í ni, iŋɛ kpaasim ŋa do baam ŋa, i gbɔ iyi ǹ nɛ ku sɔ̃ ŋɛ n kɔò aram.

² Iyi à gbɔ wa ba aŋa ide ku fɔ do feei Ebɛɛ ŋɔi à mu ara nŋa sɛ̃ɛ í re baa bɛi à tako à mu ara nŋa wo. Ŋɔi Pɔlu í sɔ̃ ŋa í ni,

³ amu Zuifui, à bím nii Taasi si ilɛi Silisi, amma Zeruzalɛmu ihɛ̃i à bíím. Gamaliɛlii í kɔm si cio, nŋui í kɔm si woodai bala nwa ŋa sãa sãa, nɔ ǹ nɛ himma si icɛi Ilaaɔ̃ si bɛi iŋɛ fei ì wɛɛò nnyi ŋa.

⁴ Ǹ kpã woo too kpãai Jesu ŋa iju jiida jiida hee ǹ kpa gɔgɔ ŋa. Ǹ mu inaabo ŋa do inɛmɔkɔ ŋa ǹ dĩ ŋa ǹ dasi ŋa piisɔ̃ɔ.

⁵ Woo wee nlai Ilaaɔ̃u do igbɛi inɛ ngbo ŋau fei aa yɔkɔ a jɛ sɛɛdam. Hai si awɔ nŋai ǹ gba tia iyi à kɔa Zuifu kpaasi ŋa iyi à wa Damasi. Nɔ ǹ bɔ bɛ ku ba n mu woo dasi Jesu naanɛ ŋa iyi à wa bɛu n dĩ ŋa nɔ n naaò ŋa wa Zeruzalɛmu n jɔ̀ a kpã ŋa iju.

Pɔlu wa sɔ̃ ŋa bɛi nŋu í kpaasi idɔ

⁶ Ŋɔi Pɔlu í sɔ̃ ŋa má í ni, si bɛi ǹ wa n koo nɔ ǹ maai Damasi zakai dasãu si kpãau gbakã ŋɔi inya kumá nla gɔ í naa sim hai lele í biim piu.

⁷ Ŋɔi ǹ cuku ilɛ nɔ ǹ gbɔ ide ku fɔ gɔ wa kpem wa ni, Sɔlu, Sɔlu, na mii í ce ì waa kpãm iju.

⁸ Ŋɔi ǹ bee ǹ ni, awɔi yoo Lafɛ̃ɛ. Ŋɔi í ni, amui Jesu inɛi Nazarɛti, amu iyi ì ya maa kpã ijuu.

⁹ Inɛ ŋa iyi à waa toom ŋau à yɛ inya kumáu amma a kù gbɔ imui inɛ iyi wa bam ide ku fɔu.

¹⁰ Nɔ ǹ beeɛ ǹ ni, Lafɛ̃ɛ, bɛirei an ce. Ŋɔi í ni, dede i bɔ Damasi. Bɛi aa sɔ̃ɛ mii iyi Ilaaɔ̃ í bi i ce fei.

¹¹ Kulai inya kumáu í jɔ̀ ǹ fɛɛju. Na nŋu, kpaasim ŋa à mu awɔm nii à toò Damasi.

¹² Wee mɔkɔ gɔ í wa bɛ à ya kpoo Ananiasi, í mà bɛɛrɛi Ilaaɔ̃ nɔ wa too woodai Moizi. Zuifu ŋa iyi à wa ilu bɛ fei à waa jɛ sɛɛda jiidaɛ.

¹³ Ŋɔi í naa bi tom nɔ í ni, Sɔlu kpaasim, yɛ ilu. Tengi bɛ gbakã ijum í cĩ nɔ ǹ yɔɔ.

¹⁴ Nɔ í ni má, Ilaaɔ̃ Lafɛ̃ɛi bala nwa ŋai í cicaɛ ku ba i mà idɔɔbiɛ nɔ i yɛ Jesu Inɛ Dee Deeu, nɔ i gbɔ idei gɛlɛɛ.

¹⁵ Awɔi aa jɛ sɛɛdaɛ i sɔ̃ inɛ fei mii iyi ì yɛ do iyi ì gbɔ.

¹⁶ Nsɛi, maà jɔ̀ ku kpɛ má. Dede i kpe irii Aɔ̃ Lafɛ̃ɛ, i jɔ̀ a dasiɛò inyi ku ba i wɛ i má hai si dulum dɛɛ ŋa.

Pɔlu wa sisi bɛi Lafɛ̃ɛ í bɛ nŋu bi dimi mmu ŋa

¹⁷ Pɔlu í ni má, iyi ǹ nyi Zeruzalɛmu ŋɔi ajɔ nŋu gɔ ǹ wa n ce kutɔɔ kpasɛ̃i Ilaaɔ̃ nɔ ǹ ce kuyɛ.

¹⁸ Si kuyɛm nɔu ǹ yɛ Lafɛ̃ɛ Jesu nɔ í sɔ̃m í ni n ce ńya n fita hai Zeruzalɛmu domi inɛ ŋau a kaa gba ide iyi ǹ wa n sisi na irii nŋuu.

¹⁹ Nɔ ǹ ni, Lafɛ̃ɛ, ngu ŋa à mà sãa sãa iyi ǹ ya n bɔ ile bii à ya ce kutɔtɔɔ ŋa n mu inɛ ŋa iyi à dasiɛ naanɛ n cã ŋa nɔ n dasi ŋa piisɔ̃ɔ.

²⁰ Nɔ à mà si ajɔ iyi à kpa Etiɛni woo jɛ sɛɛdaɛu, amu takam ǹ wa bɛ ǹ jɛsi a kpaa. Amui ǹ cɔa inɛ ŋa iyi à kpaa ŋau jĩnɛ nŋa ŋa mɔm.

²¹ Amma Lafɛ̃ɛ í sɔ̃m í ni n koo, domi hee jĩijĩ bi dimi mmu ŋai nŋu á bɛm.

Pɔlu do inɛ ngboi igũi Romu

²² Inɛ ŋau à waa desi idei Pɔlu itĩ hee í fɔ ide ŋau bɛ. Amma waati iyi à gbɔ í ni Ilaaɔ̃ í bɛ nŋu bi dimi mmu ŋa, ŋɔi aŋa fei à lɔsi ku dɔ̃ anu à waa ni, i kpaa. Dimii lafɛ̃ɛ kù sĩa ku maa wɛɛ.

²³ Idɔɔkɔ̃ nŋa í jɔ̀ à waa dɔ̃ anu nɔ à bɔ ibɔ nŋa ŋa à nyɔɔ, nɔ à waa dede ilùlù lele.

²⁴ Ŋɔi inɛ ngboi igũi Romuu í ni a bɔò Pɔlu inɔ ile nɔ a tɛaa kpɔtɔɔ ku ba ku fɔ ntɔ. Í ni bɛɛbɛi si na iyi í jɔ̀ wa bi ku mà na mii í jɔ̀ zamaau wa dɔ̃ siɛ anu.

²⁵ Iyi à dĩ Pɔlu à waa bi a cãa ŋɔi í bee inɛ ngboi sooge ŋa iyi í wa bɛu í ni, ì nɛ kpãa i cã inɛi Romu titã i bɛi i ceaa kiiti?

²⁶ Iyi inɛ ngboi sooge ŋau í gbɔ ideu ŋɔi í koo í sɔ̃ inɛ ngboi igũu í ni, bɛirei aa ce. Mɔkɔu inɛi Romui.

²⁷ Ŋɔi inɛ ngboi igũu í naa bi Pɔlu í beeɛ í ni, awɔ inɛi Romui? Nɔ Pɔlu í ni, oo.

²⁸ Ŋɔi inɛ ngboi igũu í ni, amu ǹ sã fiai jiida jiida ǹ bɛi ǹ jɛò inɛi Romu. Ŋɔi Pɔlu í jɛaa í ni, amu, bɛɛbɛi à bím.

²⁹ Ŋɔi gbakã inɛ ŋa iyi à waa bi a cãau à jɔ̀ɔ, domi njo í mu baa inɛ ngboi igũu takaɛ do iyi í gbɔ Pɔlu takaɛ inɛi Romui nɔ wee nŋu í jɔ̀ à dũu do sesee tã.

À bɔò Pɔlu bi igbɛi woo kiiti ŋa

³⁰ Inɛ ngboi igũu í bi nŋu ku mà kãm kãm mii iyi í jɔ̀ Zuifu ŋau à waa yɛ taalei Pɔlu. Na ŋɔi í jɔ̀ iju kumáɛ í jɔ̀ à fũu, nɔ í ni inɛ ngboi woo weei Ilaaɔ̃ ŋa do igbɛi woo kiiti ŋau fei a tɔtɔɔ wa. Nɔ í bɔò Pɔlu waju nŋa.