Woo bɛ ŋa 19 - Bibeli do fee

Pɔlu í bɔ Efɛɛzu

¹ Waati iyi Apolo í wa Kɔrɛnti Pɔlu í too kpãa iyi wa bɔ ikpa iri kuta ŋau nɔ í to Efɛɛzu. Ŋɔi í ba inɛ gɔ ŋa iyi à waa too kpãai Jesu bɛ.

² Ŋɔi í bee ŋa í ni, i kù ba Hundei Ilaaɔ̃ titã hai waati iyi ì dasi naanɛ ŋa? Ŋɔi à jɛaa à ni, aawo. A kù gbɔ mà Hundei Ilaaɔ̃ í wɛɛ mɔm.

³ Ŋɔi Pɔlu í bee ŋa má í ni, debɛi, inyi ku dasi yoomai à ce nŋɛ. Ŋɔi à jɛaa à ni, inyi ku dasii Zãai.

⁴ Ŋɔi Pɔlu í sɔ̃ ŋa í ni, inɛ ŋa iyi à kpaasi idɔ, aŋai Zãa í dasi inyi. Nɔ Zãa í ya sɔ̃ inɛ ŋai ku ni a dasi Jesu naanɛ, nŋu iyi á na ku naa si anyii nŋu.

⁵ Iyi à gbɔ idei Pɔluu ŋɔi à ce inyi ku dasi do irii Lafɛ̃ɛ Jesu.

⁶ Ŋɔi Pɔlu í le nŋa awɔ si iri nɔ Hundei Ilaaɔ̃ í naa si ŋa ŋɔi à waa fɔ ide do fee mmu ŋa nɔ à ce walii.

⁷ Inɛ ŋau à to zakai aŋa maateeji.

⁸ Si anyii nŋu, Pɔlu í bɔ ile bii Zuifu ŋa à ya ce kutɔtɔɔu wa waazo idei bommai Ilaaɔ̃ do naanɛ nɔ í ce bɛɛbɛ zakai cukpa mɛɛta, nɔ aŋaò ŋa à wasi ku busi njɛ nɔ í wasi ku lɛlɛ ŋa ku ba a dasi naanɛ.

⁹ Amma inɛ gɔ ŋa à lele idɔ nŋa à kɔ̀ ku dasi naanɛ, nɔ à nyi à waa fɔ ide laalɔ má si kpãai idei Lafɛ̃ɛ si wajui inɛi igbɛ ŋau. Na ŋɔi í jɔ̀ Pɔlu í tɛkɛɛ hai bi tu ŋa, nŋu do inɛ ŋa iyi à waa too kpãai Jesuu. Í ya maa kɔ ŋa si cio ajɔ fei si ile cioi inɛ gɔ iyi à ya kpe Tianusi.

¹⁰ Bɛɛbɛi í ce adɔ̃ minji hee inɛ ŋa iyi à wa ilɛi Azii fei, hai Zuifu ŋa do hai jɛ Zuifu ŋa, à gbɔò idei Lafɛ̃ɛ Jesu.

Idei ama inɛmɔkɔi Seva ŋa

¹¹ Ilaaɔ̃ í mua Pɔlu gbugbã ku ceò maamaake nla ŋa.

¹² Na ŋɔi í jɔ̀ jaaɛ iyi í lu araɛ fei, bii à so à lea bɔ̃ɔ ŋa si ara à ya ba irii. Inɛ ŋa mɔ iyi à nɛ inɛi inɔɔko ŋa, bii à lu ŋaò, inɛi inɔɔko ŋau à ya fitai.

^13-14 Zuifu gɔ ŋa à ya maa dabii bii fei a maa nya inɛi inɔɔkoi inɛ ŋa. Si inɔ nŋa gɔgɔ nŋa ŋa à dasi idɔ a kpe irii Lafɛ̃ɛ Jesu a nyaò inɛi inɔɔkoi inɛ gɔ ŋa. Zuifu inɛ ngboi woo weei Ilaaɔ̃ gɔ iyi à ya kpe Seva, ama inɛmɔkɔ mɛɛjeɛ ŋai à waa bi a ce bɛɛbɛ. Ajɔ nŋu gɔ à sɔ̃ inɛi inɔɔkoi inɛ gɔ à ni, do irii Jesu iyi Pɔlu wa waazou, fita.

¹⁵ Amma inɛi inɔɔkoi inɛɛu í ni, ǹ mà Jesu nɔ ǹ mà Pɔlu, amma yooi iŋɛ mɔ ì jɛ.

¹⁶ Ŋɔi mɔkɔ iyi í nɛ inɛi inɔɔkou í fo í bata ŋa nɔ í kãmia ŋa í cã ŋa í mɛɛ ŋa ntɔ ntɔ hee aŋa fei à sa hai kpasɛ̃ɛ basĩ.

¹⁷ Ŋɔi inɛi Efɛɛzu ŋa hai Zuifu do Gɛrɛki ŋa fei à gbɔ ideu, nɔ njo í mu ŋa, nɔ irii Lafɛ̃ɛ Jesu í nɛ bɛɛrɛ ntɔ ntɔ.

¹⁸ Ŋɔi woo dasi Jesu naanɛ nkpɔ í naa í tuuba si bantuma. À fɔ mii iyi aŋa à ya ce wo.

¹⁹ Inɛ ŋa iyi à ya tako a maa ce dobu dobu wo aŋa nkpɔ nkpɔi à naaò tia nŋa ŋa iyi à ya maa ceò dobu dobuu wa à naa à joo si wajui zamaa. Inɛ gɔ í ce dooi fiai tia ŋau, nɔ à ba wee jiaɛ í to zakai kpɛkɛlɛi isɔ fũfũ dubu ciitaa.

²⁰ Bɛɛbɛi gbugbãi Aɔ̃ Lafɛ̃ɛ í jɔ̀ idei Jesu wa fangaa bii fei do gbugbã.

Ijai Efɛɛzu

²¹ Iyi nŋu ŋau í ce í tã, ŋɔi Pɔlu í dasi idɔ nŋu ku too do ilɛi Masedɔni do si ilɛi Gɛrɛsi nŋu ku bɔ Zeruzalɛmu. Í ni bii nŋu í to bɛ, tilasii nŋu ku bɔ Romu mɔ.

²² Ŋɔi í bɛ Timɔtee do Erasitu, aŋa iyi à waa sobiɛ si icɛu ikpa Masedɔni, amma nŋu takaɛ í kpɛ keeke má ilɛi Azii bɛ.

²³ Waati bɛɛbɛ wahala nla gɔ í dede Efɛɛzu bɛ na kpãai idei Jesu.

²⁴ Gbɛdɛ woo cã isɔ fũfũ gɔ í wa bɛ à ya kpoo Demɛtiusi. Í ya ce mii ŋa iyi à jɔ ilei iwɛ̃ nŋa Aritemi. Nɔ woo ce icɛ dimi bɛɛbɛ ŋa fei à ya ba si amanii jiida.

²⁵ Ŋɔi í tɔtɔɔ woo ce icɛ ŋa do gbɛdɛ mmuɛ gɔ ŋa má í ni, i kù mà ŋa iyi si icɛu ihɛ̃i à waa ba si amani?

²⁶ Iŋɛ taka nŋɛ ì waa yɔɔ ŋa, ì nɔ ì waa gbɔ ŋa mii iyi Pɔlu wa ce. Wa ni kù jɛ iwɛ̃ ŋa iyi amanɛ ŋa à ce do awɔ nŋai aa tɔɔ. Nɔ í yɔkɔ í kãmia inɛ nkpɔ nkpɔ, kù nɔ kù jɛ baa Efɛɛzu ihɛ̃ nŋu akã, do si ilu nkpɔi ilɛi Azii feii.

²⁷ Á na ku jɔ̀ icɛ nwa ku ba iri sãmi. Si anyiɛ á nyi ku jɔ̀ a kaa saalu baa ilei iwɛ̃ nwa Aritemi, nɔ bɛɛrɛ nlaɛ á na ku tã, iwɛ̃ iyi inɛi Azii ŋa do inɛi andunya fei wa tɔɔ.

²⁸ Iyi à gbɔ ideu ŋɔi idɔ nŋa í kɔ̃, nɔ à wasi ku dɔ̃ anu hee lele à waa ni, iwɛ̃ nwa Aritemi nwa í la.

²⁹ Ŋɔi hoya hoya í dede si iluu fei nɔ do anu akã inɛ ŋa à fo à bata Gayusi do Aritaaki à mu ŋa à bɔò ŋa bii à ya cɛiu. Inɛ ŋau inɛi Masedɔni ŋai, aŋai à waa si Pɔlu si isɛɛnɛu. Nɔ inɛ nkpɔ í sɛi í bɔ bɛ.

³⁰ Pɔlu wa bi ku bɔ bi zamaau amma kpaasi woo too kpãai Jesu ŋau à kɔ̀.

³¹ Nɔ hee do akawei ilɛi bɛ ŋa gɔgɔ ŋa iyi à jɛ kpaasiɛ ŋau aŋa mɔ à bɛ ama wa à ni a koo a tɔɔɛ suuru ku maà naa ile bɛ.

³² Ile bɛi aŋa fei à waa dɔ̃ anu à wasi ku fɔ ide nŋa ikã ikã. Inɛ nkpɔ nŋa kù mà na mii í ce à tɔtɔɔ bɛ mɔm.

³³ Ŋɔi Zuifu gɔ ŋa à sisia Alesandu yaasei ideu nɔ à tale siɛ wajui zamaau. Ŋɔi Alesandu í ni a coko do awɔ nɔ wa bi ku sɔ̃ ŋa ideu do yaaseɛ.

³⁴ Amma waati iyi à mà iyi nŋu mɔ Zuifui, aŋa fei à wasi ku dɔ̃ anu hee zakai isɔ minji à waa ni, iwɛ̃ nwa Aritemi í la.

³⁵ Si anyiɛ ŋɔi woo kɔ tiai ilu nŋau í jɔ̀ à coko nɔ í ni, iŋɛ inɛi Efɛɛzu ŋa, yooi kù mà iyi ilu nwai ilei Aritemi ilu bɛɛrɛu í wa, awai à nɔ à waa ceaa icɛ. Nɔ ì mà ŋa hai lelei mii iyi í jɔɔu í cuku wa.

³⁶ Inɛ gɔ kaa yɔkɔ ku jã ideu. Na nŋu, i mu ara nŋɛ ŋa i maà ce ngɔgɔ do saasa.

³⁷ Inɛ ŋa iyi ì naaò wa nsɛi ŋau ihɛ̃ ŋa a kù ce ilei mii ndii ilei iwɛ̃ nwa ŋa a kù nɔ a kù fɔ laalɔɛ.

³⁸ Na nŋu, bii Demɛtiusi do gbɛdɛ ŋa iyi à wa bi tɛɛ ŋau à nɛ ide gɔ do inɛ gɔi à jilɛ ajɔ ŋa iyi à ya ce kiiti do woo ce kiiti ŋa, i jɔ̀ ŋa a ce ide nŋa bɛ.

³⁹ Nɔ bii ì nɛ ide gɔ si antaiɛ má ŋa, aa yɔkɔ i wũaɛ bi inɛ ngboi woo ce kiiti ŋa.

⁴⁰ Aa yɔkɔ a yɛ taale nwa a ni awai à dede ija si idei nnyiu ihɛ̃ domi kù nɛ yaase. Bɛi à bee wa yaasei ideu a kaa ka ba iyi aa ka fɔ mɔm. Iyi í fɔ bɛɛbɛ í tã ŋɔi í jɔ̀ zamaau í fangaa.