Woo bɛ ŋa 15 - Bibeli do fee

À ce kutɔtɔɔ Zeruzalɛmu*

¹ Ŋɔi inɛ gɔ ŋa à naa Antiɔsi bɛ. Inɛ ŋau à naai hai ilɛi Zudee, nɔ à waa sɔ̃ kpaasi woo dasi Jesu naanɛ ŋau à ni, i kaa ba faaba ŋa bii a kù dasi ŋɛ bango si bɛi woodai Moizi wa fɔ.

² Iyi Pɔlu do Baanabasi à gbɔ bɛɛbɛ ŋɔi à ba ŋa kakɔɔ ku ce jiida jiida si ideu. Ŋɔi woo dasi Jesu naanɛ ŋau à cica Pɔlu do Baanabasi do inɛ gɔ ŋa hai ilui Antiɔsi bɛ à bɛ ŋa Zeruzalɛmu bi woo bɛ ŋau do inɛ ngbo ŋau na irii ideu.

³ Pɔlu ŋa à dasi kpãa à waa nɛ nɔ inɛi igbɛi Jesu ŋau à koo à leekĩ nŋa. Ŋɔi à ce isɛɛnɛ nŋa à koo à lɔ ilɛi Fenisi do ilɛi Samari nɔ à wasi ku sisia kpaasi woo dasi naanɛ ŋau bɛi hai jɛ Zuifu ŋa mɔ à sinda idɔ nŋa si Jesu. Ŋɔi laabaaui ideu í jɔ̀ inɔi aŋa fei í dɔ̃ ntɔ ntɔ.

⁴ Iyi à to Zeruzalɛmu, ŋɔi inɛi igbɛi Jesu ŋau do woo bɛ ŋau do inɛ ngbo ŋau à gba ŋa do inɔ didɔ̃. Ŋɔi Pɔlu do Baanabasi à sisi nŋa mii iyi Ilaaɔ̃ í ce fei na icɛi aŋa.

⁵ Amma Farisi gɔ ŋa iyi à dasi Jesu naanɛ à dede à ni, tilasii a dasi hai jɛ Zuifu ŋa iyi à dasi Jesu naanɛu fei bango nɔ a sɔ̃ ŋa a too woodai Moizi.

⁶ Ŋɔi woo bɛ ŋau do inɛ ngbo ŋau à tɔtɔɔ a wũa ideu.

⁷ Si bɛi à waa fa ideu ŋɔi Piɛɛ í dede í ni, iŋɛ kpaasim ŋa, ì mà ŋa iyi hai ku kpɛ Ilaaɔ̃ í nyam hai si inɔ nŋɛ ku ba n koo n sisia hai jɛ Zuifu ŋa mɔ laabaau jiidau ku ba aŋa mɔ a dasi naanɛ.

⁸ Nɔ Ilaaɔ̃, nŋu iyi í mà idɔi inɛ fei, í mu nŋa Hundeɛ bɛi í mua awa mɔ ku ba ku nyisi iyi nŋu í gba ŋa.

⁹ Kù ce nkãma iyi í jɛ ikã si gãmɛ nŋa do awa. Í jɔ̀ idɔ nŋa í má na naanɛ iyi à dasiɛ bɛi í cea awa mɔ.

¹⁰ Debɛi, na mii í ce ì waa cã idɔi Ilaaɔ̃ nsɛi ŋa, ì waa bi i kãa hai jɛ Zuifu ŋa iyi à waa too kpãai Jesuu aso iyi bala nwa ŋa do awa taka nwa à mɔngɔ ku so.

¹¹ À mà iyi na didɔ̃i Lafɛ̃ɛ Jesui awa à baò faaba, nɔ bɛɛbɛ mɔi baa do hai jɛ Zuifu ŋau mɔ.

¹² Ŋɔi inɛ ŋau fei à coko à waa desi Pɔlu do Baanabasi itĩ waati iyi à waa sisi nŋa yaasei maamaake ŋa iyi Ilaaɔ̃ í jɔ̀ aŋa à ce fei si wajui hai jɛ Zuifu ŋau.

¹³ Iyi à fɔ ide à tã ŋɔi Zaaki mɔ í so ide í ni, iŋɛ kpaasim ŋa, i gbɔ iyi ǹ wa n fɔ.

¹⁴ Simɔɔ í sisi nŋɛ bɛi Ilaaɔ̃ í ce hai sinte í cicaò inɛ gɔ ŋa hai si inɔi dimi mmu ŋau a kpe ŋa inɛɛ ŋa.

¹⁵ Nɔ ideu í jɛ akã do ti walii ŋau si bɛi kukɔi idei Ilaaɔ̃ í ni,

¹⁶ amu Ilaaɔ̃, waati bɛɛbɛi an nyi wa, nɔ n teese ilei Davidi iyi í cuku. An dede ile kúkúú, nɔ n maa má,

¹⁷ ku ba inɛ ŋa iyi a kù jɛ inɛi kpasɛ̃u fei a dɛdɛ amu Aɔ̃ Lafɛ̃ɛ. Aŋai à jɛ inɛ ŋa iyi à jɛ titom hai si dimi mmu ŋa.

¹⁸ Bɛɛbɛi amu Aɔ̃ Lafɛ̃ɛ ǹ fɔ, amu iyi ǹ jɔ̀ à mà mii ŋau ihɛ̃ hai ku kpɛ.

¹⁹ Nɔ Zaaki í ni má, na nŋu, si kuyɛm, kù sĩa a sɔ̃ hai jɛ Zuifu ŋa iyi à sinda idɔ nŋa si Ilaaɔ̃u wooda kugaabu ŋa.

²⁰ Amma ka ce nŋa tia ka sɔ̃ ŋa a maà ya jɛ ijɛi kuwee, nɔ a maà ya tɔtɔɔ sɛ̃ɛ do inaabo mmu gɔ walakɔ inaabo mɔ do mɔkɔ mmu gɔ, a maà ya ŋɔ iŋai mɛɛmu iyi a kù saka, nɔ a maà ya jɛi njɛi iŋa.

²¹ Hai tako, si ilu fei à ya cio woodai Moizi ile bii Zuifu ŋa à ya ce kutɔtɔɔ si ajɔi kusĩmi fei nɔ a waazo ideɛ.

À sambaa hai jɛ Zuifu woo dasi Jesu naanɛ ŋau tia

²² Iyi Zaaki í fɔ bɛɛbɛ í tã ŋɔi woo bɛ ŋau do inɛ ngbo ŋau do inɛi igbɛ ŋau fei à yɛ iyi í sĩa aŋa a cica inɛ gɔ ŋa hai si inɔi aŋa a bɛ ŋa Antiɔsi do Pɔlu do Baanabasi ajɔ. Ŋɔi à cica Silasi do Zudu iyi à ya kpe Baasaba má, aŋa iyi à nɛ bɛɛrɛ si inɔi kpaasi woo dasi Jesu naanɛ ŋau.

²³ Ŋɔi à ni a kooò tiau. Si tiau à ni, Awa woo bɛ ŋa do inɛ ngbo ŋau, awa woo dasi naanɛ kpaasi nŋɛ ŋa, awai à samba nŋɛ tiau ihɛ̃ wa. Iŋɛi à sambaa wa, iŋɛ hai jɛ Zuifu woo dasi naanɛ ŋa iyi ì wa Antiɔsi do Siri do Silisi. À waa ce ŋɛ fɔɔ.

²⁴ À gbɔ iyi inɛ gɔ nwa ŋa à naa bi tu ŋɛ à fɔ inɔ nŋɛ nɔ à sinda laakai nŋɛ do ide nŋa ŋa. Amma awa si à dasi ŋa ideu bɛ wa.

²⁵ Na ŋɔi í jɔ̀ à busi njɛ nɔ à yɔɔ iyi í sĩa ka cica inɛ gɔ ŋa ka bɛ si ŋɛ wa. Aŋai aa si Baanabasi do Pɔlu baakɔɔ nwa ŋau wa,

²⁶ aŋa iyi a kù saalu kuwɛɛ nŋa ngɔgɔ na irii Lafɛ̃ɛ nwa Jesu Kirisi.

²⁷ Zudu do Silasi aŋai à jɛ inɛ ŋa iyi à cicau. À waa bɛ ŋa wai a na a sɔ̃ ŋɛ ide akãu gɛlɛò gɛlɛ.

²⁸ Awa do Hundei Ilaaɔ̃ í sĩa nwa si ka maà kã nŋɛ aso gɔ bii kù jɛ iyi ihɛ̃ iyi í jɛ asoi tilasi.

²⁹ Nŋui í jɛ, i maà ya jɛ ijɛi kuwee ŋa, nɔ i maà ya jɛ njɛi iŋa ŋa, i maà ya ŋɔ iŋai mɛɛmu iyi a kù saka ŋa, nɔ i maà ya tɔtɔɔ sɛ̃ɛ do inaabo mmu gɔ walakɔ inaabo mɔ do mɔkɔ mmu gɔ ŋa. Bii ì mu ara nŋɛ si mii bɛɛbɛ ŋau bɛ ŋa í sĩa. Ka sukudɔ̃.

³⁰ Ŋɔi inɛ ŋau à dasi kpãa à nɛ Antiɔsi. Bɛi à koo à tɔtɔɔ inɛi igbɛi Jesu ŋau fei à na ŋa tiau.

³¹ Iyi à cio tiau í mu nŋa gbugbã nɔ inɔ nŋa í dɔ̃.

³² Zudu do Silasi ŋa mɔ walii ŋai, à mua kpaasi woo dasi naanɛ ŋau gbugbã nɔ à sobi ŋa si ide nkpɔ nkpɔ.

³³ Iyi à ce ajɔ minji bɛ kpaasi woo dasi naanɛ ŋau à tɔɔ ŋa sukudɔ̃ nɔ à ni a to bi inɛ ŋa iyi à bɛ ŋa wa baani. [

³⁴ Amma Silasi inɛ nŋu í dasi idɔ nŋu ku ce ajɔ minji bɛ má.]

³⁵ Pɔlu do Baanabasi à gbe Antiɔsi bɛ. Aŋaò inɛ nkpɔ ŋa ajɔ à waa kɔa inɛ ŋa si cioi idei Lafɛ̃ɛ nɔ à ce waazoɛ.

Pɔlu do Baanabasi à kpɛ̃

³⁶ Iyi í ce ajɔ minji má ŋɔi Pɔlu í sɔ̃ Baanabasi í ni, ka koo kaa kaako kpaasi nwa ŋau má si ilu ŋa bii à tako à waazo idei Lafɛ̃ɛ fei wo nɔ ka yɛ bɛi inɛ ŋau à wɛɛò si nsɛi.

³⁷ Ŋɔi Baanabasi wa bi ku gbã Zãa Maaku aŋaò ŋa.

³⁸ Amma Pɔlu í ni kù sĩa aŋa a gbãa si na iyi í jɔ̀ í sinda í jɔ̀ aŋa wa hai Panfili kù sobi aŋa si icɛu hee kɔɔ.

³⁹ Ŋɔi à ce kakɔɔ nɔ a kù gbɔ si njɛ hee à na à kpɛ̃. Ŋɔi Baanabasi í gbã Maaku à lɔ akɔi inyi à bɔ Kitimu.

⁴⁰ Nɔ Pɔlu mɔ í cica Silasi, nɔ kpaasi woo dasi naanɛ ŋau à so ŋa à daa Lafɛ̃ɛ si awɔ à bɛi à nɛ,

⁴¹ à koo à lɔ ilɛi Siri do Silisi à wasi inɛi igbɛi Jesu ŋa ku mua gbugbã si naanɛ nŋa.