Woo bɛ ŋa 14 - Bibeli do fee

Pɔlu do Baanabasi à wa Ikonimu

¹ Ikonimu bɛi Pɔlu do Baanabasi à lɔ ile bii Zuifu ŋa à ya ce kutɔtɔɔ nɔ à ce waazo hee inɛ nkpɔ í dasi naanɛ, hai Zuifu ŋa hee do hai jɛ Zuifu ŋa fei.

² Amma Zuifu ŋa iyi à kɔ̀ ku dasi naanɛ à dede idɔɔkɔ̃i dimi mmu ŋa ku ba a ce lasabu laalɔ si gãmɛi woo dasi Jesu naanɛ ŋau.

³ Do nŋu fei, Pɔlu do Baanabasi à kpɛ Ikonimu à waa waazoa inɛ ŋa do wɔɔkɔ. Lafɛ̃ɛ í mu nŋa gbugbã à ya maa ceò maamaake ikã ikã ŋa. Maamaake ŋau wa nyisi iyi waazo nŋa iyi à waa ce si idei didɔ̃i nŋuu ntɔi.

⁴ Amma inɛi ilu ŋau à kpɛ̃ minji. Inɛ gɔ ŋa à leekĩò Zuifu ŋa, inɛ gɔ ŋa mɔ à leekĩò woo bɛ ŋau.

⁵ Ŋɔi Zuifu ŋa do hai jɛ Zuifu ŋa do inɛ ngbo nŋa ŋa à ce anu akã a wahala woo bɛ ŋau a ta ŋa kuta a kpa ŋa.

⁶ Iyi Pɔlu do Baanabasi à mà ideu gbakã, ŋɔi à sa à bɔ Lisiti do Dɛɛbu si ilɛi Likoni do si ilɛɛkoɛ ŋa.

⁷ Nɔ à wasi laabaau jiidau ku waazo bɛ.

Pɔlu do Baanabasi à wa Lisiti

⁸ Mɔkɔ gɔ í wa Lisiti, isɛɛ ŋa fei í ku nɔ bɛɛbɛi à buu do, kù dede kù nɛ baa ajɔ akã.

⁹ Si bɛi Pɔlu wa ba inɛ ŋa ide ku fɔ mɔkɔu wa gbɔ. Ŋɔi Pɔlu í kã siɛ iju nɔ í yɛ iyi naanɛɛ á yɔkɔ ku jɔ̀ ku ba iri.

¹⁰ Ŋɔi Pɔlu í sɔ̃ɔ do gbugbã í ni, dede i leekĩ si kutɛɛ. Ŋɔi mɔkɔu í dede í fo í dingaa wa nɛ.

¹¹ Iyi zamaau í yɛ mii iyi Pɔlu í ce ŋɔi à dɔ̃ anu hee lele do fee nŋa à ni, iwɛ̃ nwa ŋau à kpɔò amanɛ à naa si wa.

¹² Ŋɔi à waa kpe Baanabasi Zusi, Pɔlu mɔ Hɛɛmɛsi domi Pɔlui í jɛ woo waazo.

¹³ Wee ilei iwɛ̃ iyi à ya kpe Zusiu í wa hai do angulei bi ku lɔi iluu wa. Ŋɔi inɛ ŋa à koo à dɛ kɛtɛ kombo ŋa wa nɔ à ce booda do kokoi jĩi ŋa à da nŋa si kɔ̃ɔ. Nɔ woo weei Zusiu í naaò ŋa wa andɛ koofai iluu. Nŋu do inɛ ŋau fei à waa bi a cea woo bɛ ŋau kuwee.

¹⁴ Amma iyi woo bɛ minji ŋau à gbɔ ideu, à ga ibɔ nŋa ŋa à waa nyisiò iyi aŋa a kù jɛsi, nɔ à sɛi à waa nɛò bi zamaau à dɔ̃ anu à waa ni,

¹⁵ na mii í ce ì waa ce bɛɛbɛ, iŋɛ kpaasi ŋa. Awa mɔ amanɛi bɛi iŋɛ taka nŋɛ. Laabaau jiidai à naa ku sɔ̃ ŋɛ ku ba i jɔ̀ iwɛ̃ nfe nŋɛ ŋau nɔ i sinda si Ilaaɔ̃, nŋu iyi í jɛ icui kuwɛɛ. Nŋui í ce lele do ilɛ do tenku do mii iyi í wa inɔ nŋa fei.

¹⁶ Tako wo í jɔ̀ dimi fei wa too kpãa iyi í bi.

¹⁷ Amma do nŋu fei í nyisi wa iyi nŋu í wɛɛ domi wa ce nwa jiida ŋa. Í jɔ̀ ijĩ wa wɔ ku ba ka ba ijɛ si iko si waatii atɛ ku ba ka nɛ inɔ didɔ̃.

¹⁸ Amma baa do iyi Pɔlu ŋa à fɔ bɛɛbɛ fei, bɛi à ce à ganji kuweei zamaau í gaabu.

¹⁹ Ŋɔi Zuifu gɔ ŋa à naa hai Antiɔsi do hai Ikonimu à wa inyii itĩi inɛ ŋau nɔ à ta Pɔlu kuta a kpaa, ŋɔi à faa à bɔò alalai iluu domi à tamaa bɛi í kui.

²⁰ Amma inɛ ŋa iyi à waa too kpãai Jesu à naa à kaakoɛ, ŋɔi í dede í bɔ inɔ ilu. Iju kumáɛ ŋɔi nŋu do Baanabasi à dede à bɔ Dɛɛbu.

À nyi Antiɔsi si ilɛi Siri

²¹ Iyi Pɔlu do Baanabasi à to Dɛɛbu à waazo laabaau jiida si iluu nɔ inɛ nkpɔ í lɔsi kpãai Jesu ku too bɛ. Si anyiɛ nɔ à nyi ikpa Lisiti do Ikonimu do Antiɔsi iyi í wa ilɛi Pisidi.

²² Nɔ à mua inɛ ŋa iyi à waa too kpãai Jesuu gbugbã ku ba a leekĩ si naanɛu dim dim. Nɔ à sɔ̃ ŋa à ni, wahala nkpɔ nkpɔi aa ka yɛ ka bɛi ka lɔ si bommai Ilaaɔ̃.

²³ Ŋɔi à cicaa igbɛi inɛi Jesu ŋa fei inɛ ngbo ŋa. Si anyiɛ nɔ à ce kutɔɔ do anu ku dĩ à so ŋa à daa Lafɛ̃ɛ si awɔ, nŋu iyi à dasi naanɛu.

²⁴ Si anyii nŋu nɔ à nɛ hai bɛ à koo à lɔ ilɛi Pisidi à bɔ ilɛi Panfili,

²⁵ nɔ à to iluɛ gɔ iyi à ya kpe Pɛɛzu à ce waazo bɛ à bɛi à bɔ Atali.

²⁶ Hai bɛi à lɔ akɔi inyi à nyi ikpa Antiɔsi si ilɛi Siri bɛ. Ilu bɛi à tako à le nŋa awɔ si iri wo na icɛ iyi aa koo a ceu ku ba Ilaaɔ̃ ku mu nŋa didɔ̃ɛ. Nɔ icɛui à ce à kpa iriɛ wa bɛ.

²⁷ Iyi à to Antiɔsi ŋɔi à tɔtɔɔ inɛi igbɛi Jesu ŋa nɔ à sisi nŋa mii iyi Ilaaɔ̃ í cea aŋa fei do si bɛi í ceò kpãa hai jɛ Zuifu ŋa mɔ à dasiò naanɛ.

²⁸ Nɔ à kpɛ ilu bɛ do inɛ ŋa iyi à waa too kpãai Jesu ajɔ.