Woo bɛ ŋa 12 - Bibeli do fee

À kpa Zaaki nɔ à mu Piɛɛ mɔ à dasiɛ piisɔ̃ɔ

¹ Waati bɛɛbɛ ilaalu Herodu í sinti ku kpã inɛi igbɛi Jesu gɔ ŋa iju.

² Í jɔ̀ à kpa Zaaki igbãi Zãa do taakuba.

³ Ŋɔi í yɛ ideu í dɔ̃a Zuifu ŋau si, nɔ í jɔ̀ à mu Piɛɛ má. Wee waatii jingaui Pɛ̃ɛ hai nɛ levɛ̃ɛi.

⁴ Iyi à mu Piɛɛ ŋɔi Herodu í jɔ̀ à dasiɛ piisɔ̃ɔ nɔ í jɔ̀ sooge ŋa à waa degbeɛ, aŋa mɛɛ ikɔ mɛɛ. Herodu í bi nŋu ku ceaa kiiti si wajui zamaa bii jingaui Iku ku kuau í lɔ.

⁵ À waa mu Piɛɛ ile piisɔ̃ɔ bɛ, amma inɛi igbɛi Jesu ŋa à wasi ku ce kutɔɔ na iriɛ do himma jiida jiida bi Ilaaɔ̃.

Amaleka* gɔ í nya Piɛɛ hai ile piisɔ̃ɔ

⁶ Piɛɛ wa sĩ njoo si aninii sooge minji gɔ ŋa idũ iyi iju kumáɛ Herodu wa bi ku nyaa hai ile piisɔ̃ɔu ku bɔòɛ si wajui zamaa. À dũu do sesee minji nɔ sooge gɔ ŋa à waa degbe andɛi ile piisɔ̃ɔu bɛ.

⁷ Ŋɔi gbakã amalekai Ilaaɔ̃ gɔ í naa si ile piisɔ̃ɔu, ŋɔi inya í má. Ŋɔi amalekau í cã Piɛɛ si cingaaɛ í jũu í ni, dede ńya ńya. Bɛ gbakã sesee ŋau à cuku hai si awɔɛ ŋa.

⁸ Ŋɔi amalekau í ni, dasi ibɔɛ do baataɛ. Ŋɔi Piɛɛ í ce bɛɛbɛ, ŋɔi amalekau í sɔ̃ɔ má í ni, bii dabiiɛ nɔ i toom wa.

⁹ Ŋɔi Piɛɛ í fita hai ile piisɔ̃ɔu í tooɛ, amma kù mà iyi mii ŋau bɛ fei amalekau wa cooi ntɔ ntɔ. Í tamaa bɛi nŋu wa laalai.

¹⁰ À lɔ woo degbe piisɔ̃ɔ sinteu do minjisiau nɔ à tosi gamboi isɔu. Inɛ nŋu ikpa inɔ ilui wa cɔ. Ŋɔi í cĩ do araɛ nɔ à fita à mu kpãa à nɛ hee à lɔ kpãa kókò sinte, ŋɔi gbakã amalekau í nɛ í jɔ̀ Piɛɛ.

¹¹ Ŋɔi Piɛɛ í yɔɔ bɛbɛi iyi kù jɛ àla. Nɔ í ni, ntɔ ntɔ Ilaaɔ̃i í bɛ sim amalekaɛ wa ku na ku nyam hai si awɔi Herodu, do laalɔ iyi Zuifu ŋau à waa bi a ceem fei.

¹² Iyi í yɛ yaasei ideu ŋɔi í bɔ kpasɛ̃i Maari iyei Zãa Maaku. Wee í ko inɛ nkpɔ nkpɔi í tɔtɔɔ bɛ à wasi ku ce kutɔɔ.

¹³ Iyi Piɛɛ í to bɛ ŋɔi í cã gamboi andɛ koofau ŋɔi abo woo ce icɛ gɔ iyi à ya kpe Rodu í koo í bee í ni, yooi.

¹⁴ Iyi í mà imui Piɛɛ ŋɔi inɔ didɔ̃ kù jɔ̀ kù cũu. Ŋɔi í sɛi í nyi ile í koo í sɔ̃ inɛ ŋa í ni Piɛɛ í wa andɛ koofa.

¹⁵ Ŋɔi à sɔ̃ɔ à ni, ì waa sũmui. Amma í ni, ntɔ ntɔi. Ŋɔi à ni, á má jɛ ayaɛi.

¹⁶ Wee Piɛɛ wa leekĩ bɛ í wasi ku cã gambo. Iyi à naa à cũu nɔ à ba wee nŋui, ŋɔi í mu ŋa biti.

¹⁷ Nɔ í ni a coko do awɔ í bɛi wa sɔ̃ ŋa bɛi Lafɛ̃ɛ í ce í nya nŋu wa hai ile piisɔ̃ɔu. Ŋɔi í ni a koo a sɔ̃ Zaaki ideu do kpaasi ŋa iyi à gbe, í bɛi í fita í bɔ inya mmu má.

¹⁸ Iju kumáɛ daadaakɔ ideu í jɔ̀ sooge ŋau à biti hee à bee njɛ à waa ni, ikpa iwoi Piɛɛ í bɔ.

¹⁹ Ŋɔi Herodu í ni a dɛdɛɛ. Ŋɔi à dɛdɛɛ amma a kù yɔɔ. Ŋɔi í bee woo degbe ŋau ide. Si bɛi a kù yɔkɔ a kù jɛaa, nɔ í ni a kpa ŋa. Ŋɔi Herodu í bɛi í dede hai ilɛi Zudee í koo í buba ikpa Sezaree ajɔ minji titã.

Ikui Herodu*

²⁰ Wee idɔi Herodu í kɔ̃ò inɛi Tii ŋa do inɛi Sidɔ̃ɔ ŋa ntɔ ntɔ, ŋɔi inɛ ŋau à tɔtɔɔ njɛ nɔ à nya inɛ gɔ ŋa à bɛ ŋa bi Herodu. Nɔ à ce Balatu akawei ilaaluu kpaasi à bɛi à bɔ bi Herodu a koo a tɔɔɛ suuru domi inɛi ilɛ nŋa ŋa si ilɛi Herodui à ya bɔ ijɛ ku dɛdɛ.

²¹ Ŋɔi Herodu í da nŋa ajɔ si bii á yɛ ŋa. Iyi ajɔu í to ŋɔi Herodu í dasi ibɔi ilaaluɛ í bɛi í buba si antaii kitãi bommaɛ í bɛi í so ide wa sɔ̃ inɛ ŋau.

²² Ŋɔi inɛ ŋau à dɔ̃ anu à saabuɛ à waa ni, kù jɛ baa amanɛi wa fɔ ideu, Ilaaɔ̃i.

²³ Bɛ gbakã amalekai Ilaaɔ̃ í dasi Herodu bɔ̃ɔ í jɔ̀ kokoo ŋa à ŋɔ araɛ í ku, si na iyi í jɔ̀ nŋu amanɛ í gba amboei Ilaaɔ̃, kù kɔ̀si.

²⁴ Amma idei Ilaaɔ̃ njɛ í fangaa wa kɔ̃ɔsi.

²⁵ Iyi Baanabasi do Sɔlu à ce mii iyi à dasi ŋa ku ceu Zeruzalɛmu bɛ à tã ŋɔi à sinda à nyi Antiɔsi má. Iyi à waa nɛ à gbã Zãa Maaku í si ŋa.