Woo bɛ ŋa 10 - Bibeli do fee

Piɛɛ do Kɔɔnɛi

¹ Inɛ gɔ í wa Sezaree, à ya kpoo Kɔɔnɛi. Nŋui wa jɛ inɛ ngboi wuai sooge gɔ ŋa iyi à ya kpe Inɛi Itali ŋa.

² Mɔkɔu wa too Ilaaɔ̃ nɔ í ya maa jirimaɛ ntɔ ntɔ, nŋu do nyaanzeɛ ŋa fei. Í ya maa ce kutɔɔ waati kãma fei, í ya nɔ ku sobi ilu arei Zuifu ŋa ntɔ ntɔ.

³ Ŋɔi ajɔ akã zakai isɔ mɛɛta í ce kuyɛ. Í yɛ amalekai Ilaaɔ̃ dee dee. Amalekau í lɔ siɛ wa, ŋɔi í kpoo í ni, Kɔɔnɛi.

⁴ Ŋɔi í cɔ amalekau í kãsiɛ iju ŋɔi njo í muu nɔ í beeɛ í ni, Lafɛ̃ɛ, mii í ce. Ŋɔi amalekau í jɛaa í ni, Ilaaɔ̃ í gbɔ kutɔɔɛ, nɔ kù gbɛjɛ yaase bɛi ì sobi ilu are ŋau.

⁵ Nsɛi, bɛ inɛ gɔ ŋa Zopee a koo a kpe Simɔɔ iyi à ya kpe Piɛɛu wa.

⁶ Inɛ njooi, í wa kpasɛ̃i anà gɔ iyi à ya kpe Simɔɔ. Kpasɛ̃ɛ í wa kɔkɔi tenku.

⁷ Iyi amalekau í baa ide ku fɔ í tã í nɛ, ŋɔi Kɔɔnɛi í kpe inɛ minji gɔ ŋa si inɔi woo ce icɛɛ ŋau. Nɔ si inɔi sooge ŋa iyi à ya wa kɔkɔɛu í kpe inɛ akã gɔ má iyi í mà bɛɛrɛi Ilaaɔ̃.

⁸ Ŋɔi í sisi nŋa ide iyi í ce fei, í bɛi í bɛ ŋa Zopee.

⁹ Iju kumáɛ zakai dasã à wa si kpãau nɔ à maai si iluu. Waati bɛɛbɛ í ko Piɛɛ í gũ antaii ile sikifa wa ce kutɔɔ.

¹⁰ Ŋɔi ari í na wa kpaa, nɔ wa bi ku jɛ. Waati iyi à waa tɛkɛaa caka ŋɔi í ce kuyɛ.

¹¹ Í yɛ lelei Aɔ̃ í cĩ nɔ acɔ nla gɔ iyi à waa mu gonta mɛɛɛ wa kita wa ilɛ.

¹² Inɔɛ bɛi dimii iŋa kutɛ mɛɛ fei í wa si do iyi wa cã ilɛ do dimii yɛi fei.

¹³ Ŋɔi Piɛɛ í gbɔ ide ku fɔ gɔ í ni, Piɛɛ dede, kpa i ŋɔ.

¹⁴ Amma Piɛɛ í jɛaa í ni, jãm, Lafɛ̃ɛ. Ajɔ kãma n kù ŋɔ iŋa iyi í jɛ iwɔ̀ hee má jɛ iyi í riisi.

¹⁵ Nɔ ide ku fɔu í ni má, mii iyi Ilaaɔ̃ í ni í maaju maà ti i kɔ̀si.

¹⁶ Bɛɛbɛi í ce hee isɛ gbɛɛta. Nɔ gbakã acɔu í nyi lele.

¹⁷ Ŋɔi Piɛɛ wa bee araɛ yoomai í jɛ yaasei kuyɛu. Waati bɛɛbɛi inɛ ŋa iyi Kɔɔnɛi í bɛ ŋau à to Zopee bɛ. Ŋɔi à bee kpasɛ̃i Simɔɔ nɔ à nyisi ŋa. Waati iyi Piɛɛ í wasi ku lasabu si ideu ŋɔi à to wa andɛ koofa bɛ.

¹⁸ Ŋɔi à kpe inɛi kpasɛ̃ ŋau à bee ŋa mà inɛ njoo gɔ í wa bɛ iyi à ya kpe Simɔɔ Piɛɛ.

¹⁹ Si bɛi Piɛɛ í wasi ku lasabu si idei kuyɛɛu ŋɔi Hundei Ilaaɔ̃ í sɔ̃ɔ í ni, wee amanɛ mɛɛta gɔ ŋa à waa dɛdɛɛ.

²⁰ Dede i kita i koo i ba ŋa. Nɔ iŋɛò ŋa i nɛ. Maà leekĩ leekĩ, domi amui ǹ bɛ ŋa wa.

²¹ Ŋɔi Piɛɛ í kita í koo í ba ŋa í ni, inɛ iyi ì waa dɛ ŋau amui ihɛ̃ mɛɛ. Mii ì bi ŋa.

²² Nɔ à ni, Kɔɔnɛi, inɛ ngboi sooge ŋai wa dɛdɛɛ. Inɛ dee deei, í ya maa jirima Ilaaɔ̃ nɔ Zuifu ŋa fei à ya maa fɔ jiida ku jɛɛ. Amalekai Ilaaɔ̃ gɔ í sɔ̃ɔ í ni ku kpeɛ bi tɛɛ ku ba ku gbɔ ide iyi aa sɔ̃ɔ.

²³ Idũu ŋɔi Piɛɛ í dasi inɛ ŋau kpasɛ̃ í ce nŋa yaaɛ. Iju kumáɛ í dasiò ŋa kpãa, nɔ kpaasi woo dasi Jesu naanɛi Zopee gɔ ŋa à suu.

²⁴ Iju kumá mmuɛ ŋɔi à to Sezaree. Wee hee a maa to wa Kɔɔnɛi í tɔtɔɔ nyaanzeɛ ŋa do kpaasi jiidaɛ ŋa à waa degbe ŋa.

²⁵ Iyi Piɛɛ wa bi ku lɔ inɔ kpasɛ̃u ŋɔi Kɔɔnɛi í bɔ ku koɛ. Nɔ í koo í sɛɛbata si wajuɛ.

²⁶ Amma Piɛɛ í dedeɛ í ni, dede, domi amu mɔ amanɛi bɛi awɔ.

²⁷ Ŋɔi wa ba Kɔɔnɛi ide ku fɔ hee í koo í lɔò inɔ ile, nɔ í yɛ inɛ nkpɔ í tɔtɔɔ bɛ.

²⁸ Nɔ í sɔ̃ ŋa í ni, iŋɛ taka nŋɛ ì mà ŋa iyi woodai awa Zuifu ŋa í kɔ̀ nwa ka tɔtɔɔ do iŋɛ dimi mmu ŋa, walakɔ ka bɔ kpasɛ̃ nŋɛ. Amma Ilaaɔ̃ í sɔ̃m í ni kù sĩa n kpe inɛ gɔ ilu riisi hee má jɛ n kɔ̀siɛ.

²⁹ Nŋui í jɔ̀ iyi ì kpem ŋa n kù kɔ̀. Nsɛi, ǹ bi i sɔ̃m na mii í ce ì kpem wa ŋa.

³⁰ Ŋɔi Kɔɔnɛi í ni, í to ajɔ mɛɛ wa ihɛ̃ nnyi iyi zakai isɔ mɛɛta bɛ ihɛ̃i ǹ wa kpasɛ̃m ihɛ̃ ǹ wa n ce kutɔɔ. Ŋɔi inɛ gɔ í naa bi tom, wa dasi ibɔ ku daana gɔ.

³¹ Nɔ í sɔ̃m í ni, Kɔɔnɛi, Ilaaɔ̃ í gbɔ kutɔɔɛ nɔ kù gbɛjɛ jiida ku ceɛ do bɛi ì ya maa sobi ilu are ŋa.

³² Na nŋu, bɛ inɛ gɔ ŋa Zopee a koo a kpe Simɔɔ Piɛɛ wa. Inɛ njooi wa jɛ. Í wa kpasɛ̃i anà gɔ iyi à ya kpe Simɔɔ. Kpasɛ̃ɛ í wa kɔkɔi tenku.

³³ Iyi amalekau í fɔ bɛɛbɛ, ŋɔi ǹ bɛ siɛ inɛ ŋau bɛ wa gbakã, ì nɔ ì jɛ ì naa. Iyi bɛ í sĩa. Nsɛi awa fei à wa si wajui Ilaaɔ̃ ihɛ̃ à waa de itĩ si ide iyi Lafɛ̃ɛ í sɔ̃ɛ fei i sɔ̃ wa.

Waazo iyi Piɛɛ í ce kpasɛ̃i Kɔɔnɛi

³⁴ Ŋɔi Piɛɛ í so ide í ni, ǹ mà bɛbɛi iyi Ilaaɔ̃ kù waa cɔ inɛ kãma dimi mmu.

³⁵ Inɛ iyi í ya maa jirima Ilaaɔ̃ fei nɔ wa ce iyi í sĩa dee dee, Ilaaɔ̃ í ya gba lafɛ̃ɛi si dimi iyi í jɛ fei.

³⁶ Ì mà laabaau jiida iyi Ilaaɔ̃ í jɔ̀ à waazoa inɛi Izirɛli ŋa à ni inɛ ŋa aa ba laakai ku sũ do saabui Jesu Kirisi nŋu iyi í jɛ Lafɛ̃ɛi inɛ fei.

³⁷ Ì nɔ ì mà ŋa mii iyi í sinti si ilɛi Galilee í bɛi í ce si ilɛi Zudee fei waati iyi Zãa í sisi idei inyi ku dasi iyi í ya maa ceu í tã.

³⁸ Ì mà bɛi Ilaaɔ̃ í mua Jesu inɛi Nazarɛtiu Hundeɛ ŋa do bɛi í muaa gbugbã. Nɔ í dabii si ilɛu fei wa ce jiida nɔ í jɔ̀ inɛ ŋa iyi à wa si awɔi Seetam fei à ba iri. Í ya maa ce bɛɛbɛi si na iyi í jɔ̀ Ilaaɔ̃ í wɛɛ do nŋu.

³⁹ Awai à waa jɛa inɛ ŋa sɛɛdai mii iyi í ce ilɛi Zuifu ŋa do ilui Zeruzalɛmu fei. Nɔ inɛ ŋa à kpakpaɛ si jĩi à kpaa.

⁴⁰ Amma si ajɔ mɛɛtasia Ilaaɔ̃ í jũu hai si balɛ nɔ í jɔ̀ í tusɛa inɛ gɔ ŋa araɛ.

⁴¹ Kù nɔ kù jɛ inɛ feii í yɔɔ bii kù jɛ awa iyi à jɛ sɛɛda iyi Ilaaɔ̃ í cica hai tako, awa iyi à jɛ nɔ à mɔ do nŋu si anyii kujĩɛ hai si balɛ.

⁴² Nɔ í dasi wa ka maa waazoa inɛ ŋa, nɔ ka jɛa inɛ ŋa sɛɛda iyi nŋui Ilaaɔ̃ í cica ku kiiti ilu hunde do iku ŋa.

⁴³ Bɛɛbɛ mɔi walii ŋa fei à fɔ ideɛ à ni inɛ iyi í dasiɛ naanɛ fei Ilaaɔ̃ á kpa dulum dii lafɛ̃ɛ na saabui iriɛ.

Dimi mmu ŋau mɔ à ba Hundei Ilaaɔ̃

⁴⁴ Waati iyi Piɛɛ wa fɔ ide má, ŋɔi Hundei Ilaaɔ̃ í naa si inɛ ŋa iyi à waa gbɔ ideu fei.

⁴⁵ Zuifu woo dasi Jesu naanɛ ŋa iyi à si Piɛɛ bɛu, à biti do iyi Ilaaɔ̃ í mua dimi mmu ŋa mɔ Hundeɛ,

⁴⁶ domi à gbɔ inɛ ŋau à waa fɔ ide do fee ŋa iyi a kù waa gbɔ nɔ à waa sisi bɛi kulai Ilaaɔ̃ í to.

⁴⁷ Ŋɔi Piɛɛ í ni, si bɛi inɛ ŋau ihɛ̃ à ba Hundei Ilaaɔ̃ bɛi awa mɔ, yooi á yɔkɔ ku ganji ŋa a dasi ŋa inyi.

⁴⁸ Ŋɔi í ni a dasi ŋa inyi do irii Jesu Kirisi. Ŋɔi Kɔɔnɛi ŋa à tɔɔɛ à ni ku buba bi aŋa bɛ ku ce ajɔ minji.