Titee 3 - Bibeli do fee

Isɛɛnɛi inɛi Jesu ŋa

¹ Ye inɛi igbɛi Jesu ŋau fei gigi a ya sũa ilaalui ilɛ ŋa do inɛ ngbo ŋa iri ilɛ, a ya jirima ŋa, nɔ a ya tã sɔɔlu si icɛ jiida fei ku ce.

² Sɔ̃ ŋa a maà ya fɔ laalɔi inɛ gɔ, nɔ a maà ya dɛ anui inɛ gɔ, amma a ya cea inɛ fei jiida nɔ a nyisi inɛ ŋa daa didɔ̃.

³ Í sĩa ka ce bɛɛbɛ domi tako wo awa mɔ à yɛi bɛi inɛ ŋa iyi à gbe. A kù nɛ yaase, a ci ya ka jirima Ilaaɔ̃, à ya ka maa ce kurara. Kɔdɛɛi andunya baa yooma fei do faayi ŋai à waa nɛò wa. À waa ce kuwɛɛ nwa do inɔ sãmi do binɛ. À jɛ inɛ laalɔ ŋa nɔ à cé njɛ.

⁴ Amma waati iyi Ilaaɔ̃ woo faaba nwa í nyisi jiida ku jɛɛ do bɛi í bi amanɛ ŋa,

⁵ í faaba wa. Waati bɛɛbɛi Hundeɛ iyi í da nwa si í bí wa isɛ gbeejisia nɔ í mu nwa kuwɛɛ titɔ̃. Kù faaba wa si na iyi í jɔ̀ à ce icɛ jiida, amma si na iyi í jɔ̀ í ce araare nwai.

⁶ Ilaaɔ̃ í mu nwa Hundeɛ do inɔ akã na saabui Jesu Kirisi woo faaba nwa,

⁷ ku ba ka na ka jɛ inɛ dee dee si wajui Ilaaɔ̃ na didɔ̃ɛ nɔ ka jɛò tubui kuwɛɛ hai tã iyi à waa cɔ kpãaɛ.

⁸ Ideu í nɛ naanɛ. Ǹ bi i fɔ ideu i sisi ku ba inɛ ŋa iyi à dasi Ilaaɔ̃ naanɛ a ce kookaai a ceò icɛ jiida. Ideu ide jiidai nɔ í nɛ aranfãani bi inɛ ŋa.

⁹ Amma i ya fɛò kudɛdɛi ide hai nɛ yaase ŋa ku ce, nɔ i maà ya dasi laakaiɛ si ide ŋa iyi inɛ ŋa à bu à waa fɔ si gãmɛi irii bala nwa ŋa iyi à ya maa dɛ ku mà, nɔ i maà ya maa ce kakɔɔ hai tã si gãmɛi wooda. Iyi bɛ fei ngbɛi, kù nɛ aranfãani kãma.

¹⁰ Inɛ iyi wa fɛɛfɛ inɛ ŋa, sɔ̃ɔ bɛi isɛ gbeeji i bɛi i nya lafɛ̃ɛ ikã.

¹¹ Awɔ takaɛ ì mà iyi amanɛ dimi bɛɛbɛ í yaai hai si kpãa jiida, wa ce dulum nɔ kookoosuɛ í jɔ̀ à yɛ taaleɛ.

Ide ankãanyi

¹² Wee an na n bɛ Aatemasi walakɔ Tisiki wa bi tɛɛ. Waati iyi inɛ akã nŋa á na ku to wa, ce kookaai i naa i bam Nikopolisi, domi bɛi ǹ bi n maa n wa sukui tũtũ.

¹³ Mua Zenasi woo mà woodau do Apolo bukaatai mii iyi à bi fei si isɛɛnɛ nŋau, ku ba ngɔgɔ ku maà gaizia ŋa.

¹⁴ Í sĩa inɛ nwa ŋau mɔ a hanya si icɛ jiida ku ce, ku ba a ba bukaatai mii iyi à bi nɔ a maà jɛ kuwɛɛ nŋa ngbɛ ngbɛ.

¹⁵ Inɛ ŋa iyi à wa bi tom ihɛ̃ fei à ceɛ fɔɔ. Ce inɛ ŋa iyi à bi wa si kpãai naanɛ ku dasi fɔɔ. Didɔ̃i Ilaaɔ̃ ku wa si iŋɛ fei.