Titee 2 - Bibeli do fee

Kukɔsi jiida

¹ Awɔ takaɛ kɔ woo dasi Jesu naanɛ ŋa si cio jiida.

² Sɔ̃ mɔkɔ ngbo ŋa a jɔ̀ a mà mii iyi à waa ce, nɔ a jɛ ilu bɛɛrɛ iyi à mà ara nŋa nɔ a leekĩ si kpãai naanɛ ku dasiu dim dim do ti kubi do ti temua.

³ Sɔ̃ abo ngbo ŋa mɔ a maa jɛ kuwɛɛ nŋa dee dee bɛi í jɔ inɛi Ilaaɔ̃ ŋa à ya ce. A maà jɛ woo sɔ irii inɛ ŋa walakɔ woo mɔ atɛ̃ hee ku kpa ŋa. Í sĩa a ya maa mua abo à so mɔkɔ saatara ŋa bisi jiida

⁴ ku ba a mà bɛi aa bi mɔkɔ nŋa ŋa do ama nŋa ŋa.

⁵ Nɔ a kɔ ŋa si a mà ara nŋa a jɛ inɛ ŋa iyi aa leekĩ do mɔkɔ nŋa ŋa a maa ce icɛi abo à so mɔkɔ nŋa, a jɛ inɛ jiida ŋa iyi aa sũa mɔkɔ nŋa ŋa iri ilɛ. Iyi bɛi á jɔ̀ inɛ gɔ kaa yɔkɔ ku fɔ laalɔi idei Ilaaɔ̃ na iri nŋa.

⁶ Sɔ̃ awaasũ ŋa mɔ a mà ara nŋa.

⁷ Bɛɛbɛ mɔi awɔ takaɛ, i ya jɔ̀ a yɛ siɛ jiida ku ce si mii fei. Si cioɛ, nyisi ŋa iyi ì jɛ dee dee nɔ ì waa ce mii iyi à dasiɛ.

⁸ Sɔ̃ ŋa idei ntɔu iyi a kaa yɛò taalei ideɛ. Iyi bɛi á jɔ̀ anyɔ ku mu mbɛɛ nŋɛ ŋa domi a kaa ba laalɔ nwa a fɔ.

⁹ Sɔ̃ aru ŋa mɔ a jirima lafɛ̃ɛ nŋa ŋa si mii fei nɔ a ya ce mii iyi á dɔ̃ nŋa si. A maà ya ba ŋa kakɔɔ ku ce,

¹⁰ nɔ a maà ya ce ŋa ile, amma a nyisi ara nŋa iyi aŋa à jɛ ilu naanɛ si mii fei. Bɛɛbɛi inɛ ŋa aa màò bɛɛrɛi cioi Ilaaɔ̃ woo faaba nwa.

¹¹ Ǹ ni i ce bɛɛbɛi domi Ilaaɔ̃ í jɔ̀ didɔ̃ɛ í naa si andunya. Didɔ̃u á yɔkɔ ku mua inɛ fei faaba.

¹² Didɔ̃ui wa sobi wa si gãmɛi kɔdɛɛi andunya ku jɔ̀ do si kuwɛɛ iyi kù waa mà bɛɛrɛi Ilaaɔ̃. Bɛɛbɛi aa ka ce kuwɛɛ nwa si andunyau ihɛ̃ dee dee, ka màò ara nwa, nɔ ka màò bɛɛrɛi Ilaaɔ̃,

¹³ nɔ ka maa degbeò ajɔ jiida iyi à waa cɔ kpãaɛ, si bii Jesu Kirisi woo faaba nwa á nyisi amboeɛ. Jesu Kirisi nŋui í jɛ Ilaaɔ̃, nɔ nŋui í la.

¹⁴ Í so araɛ í na na iri nwa ku ya wa hai si laalɔ baa yooma fei, nɔ ku ce wa inɛ kumá ŋa ka na ka jɛ bɛi dimi akã iyi á jɛ titi nŋu akã nɔ ka jɛ ilu himma ka maa ceò icɛ jiida.

¹⁵ Do yaase bɛɛbɛi í sĩa i ya kɔ inɛ ŋa si cio. Mu nŋa gbugbã nɔ i nyisi ŋa kurara nŋa si bɛi ì nɛ kpãaɛ. Maà jɔ̀ inɛ gɔ ku dondaɛ.