Titee 1 - Bibeli do fee

Pɔlu í ce Titee fɔɔ

¹ Amui Pɔlu, woo ce icɛi Ilaaɔ̃ do woo bɛi Jesu Kirisi, amui ǹ kɔ tiau wa. À bɛm nii n koo n sobi inɛ ŋa iyi Ilaaɔ̃ í cicau ku ba a dasiɛ naanɛ, nɔ a mà ntɔu si gãmɛi kpãai naanɛ ku dasi nwa.

² Iyi bɛi á jɔ̀ a maa cɔ kpãai kuwɛɛ hai tã. Ilaaɔ̃ ci ya sɔ ibo. Nɔ baa hai kù taka andunya í ce kuwãi kuwɛɛ hai tã.

³ Nɔ nsɛi, si awaati iyi í jilɛu, í jɔ̀ ideɛu í fita. Ideui í daam si awɔ n waazoɛ si bɛi í jilɛɛm, nŋu iyi í jɛ Ilaaɔ̃ woo faaba nwa.

⁴ Amu Pɔlu ǹ wa n ceɛ tiau ihɛ̃ wai, Titee. Si bɛi do saabum nii ì dasiò Jesu naanɛ bɛi amu mɔ, nŋui í jɔ̀ ì jɛ amaabím. Ilaaɔ̃ Baaba do Jesu Kirisi woo faaba nwa a muuɛ didɔ̃ do laakai akã.

Icɛ iyi Pɔlu í dasi Titee Kɛrɛti

⁵ Ǹ jɔ̀ɛ Kɛrɛti bɛi ku ba i teese ide ŋa iyi í gbeu, nɔ i cica inɛ ngbo ŋa si igbɛi inɛi Jesu ŋa si ilu ŋau fei si bɛi ǹ sɔ̃ɛu.

⁶ Inɛ iyi á jɛ inɛ ngboi igbɛu í gbe ku jɛ inɛ iyi kù nɛ taale gɔ, iyi í nɛ abo akã lege lege nɔ amaɛ ŋa à jɛ woo dasi Jesu naanɛ ŋa. Ku maà jɛ a maa sɔ iri nŋa do daa bututu nɔ a maà jɛ amu ŋa iyi a ci ya jirima inɛ.

⁷ Ntɔ ntɔ, inɛ ngboi igbɛui á jɛ inɛ iyi á maa dasi icɛ iyi inɛ ŋa à waa cea Ilaaɔ̃ iju. Na nŋu í gbe ku jɛ hai nɛ taale. Kù sĩa ku jɛ ilu faau, walakɔ ilu idɔɔkɔ̃, walakɔ woo mɔ atɛ̃ hee ku kpaa, walakɔ woo bi ija, walakɔ inɛ iyi wa bi ku ba fia do bisi laalɔ.

⁸ Amma í gbe ku jɛ inɛ iyi í ya yaaɛ inɛ njoo ŋa, nɔ ku ya bi mii jiida ku ce. Nɔ ku jɛ inɛ iyi í mà araɛ. Ku jɛ inɛ dee dee do inɛ kumá nɔ ku ya saku.

⁹ Í gbe ku maa mu ide iyi í nɛ naanɛu dim dim si bɛi à kɔaa si. Bɛɛbɛi á yɔkɔ ku mua inɛ ŋa iyi à gbe gbugbã nɔ ku tusɛ nŋa yaasei cio jiida nɔ ku kãmia woo jã ide ŋa.

¹⁰ Ǹ wa n fɔ bɛɛbɛi domi inɛ nkpɔi í wa si igbɛu iyi a kù waa jirima inɛ ngbo ŋau, inɛ ŋa iyi à waa dasi inɛ ŋa iju dũdũ do ide nfe. Si inɔ nŋa Zuifu ŋa iyi à dasi Jesu naanɛu, aŋa mɔm nii à re.

¹¹ Í gbe a ganji ŋa, domi à waa bitandi nyaanze nkpɔ si bɛi à ya maa cio nŋa mii iyi kù jɔ. À ya maa ce bɛɛbɛi ku ba a baò fia do bisi laalɔ.

¹² Inɛi Kɛrɛti gɔ takaɛ iyi í jɛ woo sisi idei iwɛ̃ nŋa í ni, waati kãma fei inɛi Kɛrɛti ŋa woo sɔ ibo ŋai, nɔ à gaabu bɛi mɛɛmui sako ŋa, ilu ika ŋai, lasabu nŋa fei si kpãai ijɛi í wa.

¹³ Nɔ ide iyi inɛɛu í fɔu ntɔi. Na nŋu, sɔ̃ ŋa ide do kugaabu ku ba a leekĩ dim dim si kpãai naanɛ ku dasi,

¹⁴ nɔ a maà na a too si arái Zuifu ŋau, walakɔ woodai inɛ ŋa iyi à yaa hai si kpãai ntɔ.

¹⁵ Mii fei í mái bi inɛ ŋa iyi à má, amma nkãma ci ya má bi ilu riisi ŋa do hai dasi naanɛ ŋa, domi lasabu nŋa do idɔ nŋa fei í nɛ riisi.

¹⁶ À waa fɔ do gɛlɛ à ni aŋa à mà Ilaaɔ̃, amma kookoosu nŋa wa jã ŋa ide. À jɛ inɛ laalɔ do woo kɔ̀ ide ŋa, a kaa yɔkɔ a ce mii jiida kãma má.