Tɛsalonika 2, 3 - Bibeli do fee

Pɔlu í ni a cea aŋa kutɔɔ

¹ Iyi í gbe, iŋɛ inɛ nwa ŋa, i ce nwa kutɔɔ ŋa ku ba idei Lafɛ̃ɛu ku fangaa gbãa gbãa nɔ inɛ ŋa a mà bɛɛrɛɛ, si bɛi í ce si anini nŋɛ.

² I ce kutɔɔ ŋa ku ba Ilaaɔ̃ ku nya wa hai si awɔi amanɛ laalɔ hai nɛ iri ŋau, domi kù jɛ inɛ feii wa dasi ideu naanɛ.

³ Amma Lafɛ̃ɛ ilu naanɛi. Á mu nŋɛ gbugbã nɔ ku degbe ŋɛ na irii Seetam, inɛ laalɔu.

⁴ Lafɛ̃ɛ í jɔ̀ à dasi ŋɛ naanɛ. À mà iyi mii iyi à jilɛ nŋɛu ì waa coo ŋa, nɔ bɛɛbɛi aa ce i maa koo ŋa.

⁵ Nɔ Lafɛ̃ɛ ku jɔ̀ kubii Ilaaɔ̃ ku kɔ̃ɔsi si idɔ nŋɛ do temua iyi Kirisi takaɛ wa mu nwa.

Í sĩa amanɛ ku ce icɛ

⁶ Iŋɛ inɛ nwa ŋa, à waa tɔɔ ŋɛ do irii Lafɛ̃ɛ nwa Jesu Kirisi, i jĩò kpaasi woo dasi Jesu naanɛ baa yooma fei iyi à jɛ ilu ika ŋa nɔ a kù waa too si kukɔsi iyi à na ŋɛu.

⁷ Iŋɛ taka nŋɛ ì mà ŋa iyi í sĩa i sìsì daa nwa ŋa. Í sĩa i sìsì daa nwa ŋa domi a kù jɛ kuwɛɛ nwa si anini nŋɛ do ika.

⁸ A kù jɔ̀ inɛ gɔ ku wo wa nfe nfe hai sã fia, amma à ya ka maa ce icɛi ntɔ ntɔ alɛò daakɔ hee ka gbɛɛji ku ba ka maà jɛ asoi inɛ gɔ.

⁹ Kù jɛ a ni a kù nɛ kpãaɛ, amma à bi awa taka nwa ka nyisi ŋɛ yaase jiida iyi iŋɛ mɔ aa yɔkɔ i sìsì ŋa,

¹⁰ domi baa waati iyi à wa bi tu ŋɛ à sɔ̃ ŋɛ à ni, inɛ iyi kù bi icɛ ku ce, kù nɛ a jɔ̀ lafɛ̃ɛ ku jɛ.

¹¹ Wee à gbɔ iyi inɛ gɔ nŋɛ ŋa ilu ika ŋai iyi a kù waa ce ngɔgɔ í gbe wɔbia ku gũ.

¹² À waa sɔ̃ amanɛ dimi bɛɛbɛ ŋa, do irii Lafɛ̃ɛ Jesu Kirisi, a ya ce icɛ ku ba a wo ara nŋa.

¹³ Amma iŋɛ inɛ nwa ŋa, i maà ya gbɛɛji do jiida ku ce.

¹⁴ Inɛ iyi í kɔ̀ ku gbɔ ide iyi à kɔ si tiau ihɛ̃ i laakaiɛ ŋa nɔ i maà jɔ̀ ngɔgɔ ku tɔtɔɔ ŋɛ do nŋu, ku ba anyɔ ku muu.

¹⁵ Amma do nŋu fei i maà ti i dooɛ bɛi mbɛɛ, amma i nyisiɛ kpãa bɛi inɛ nŋɛ.

Fɔɔi ankãanyi

¹⁶ Lafɛ̃ɛ nŋu iyi í jɛ icui laakai ku sũ, ku mu nŋɛ laakai ku sũ waati kãma fei si mii iyi í ba ŋɛ fei. Lafɛ̃ɛ ku wɛɛ do iŋɛ fei.

¹⁷ Amui Pɔlu, ǹ ce ŋɛ fɔɔ. Fɔɔu ihɛ̃, do awɔi amu takam nii ǹ kɔɔò. Nŋui í jɛ sɛɛdam si tiam ŋa fei. Kukɔm nii mbɛ.

¹⁸ Nɔ didɔ̃i Lafɛ̃ɛ nwa Jesu Kirisi ku wɛɛ do iŋɛ fei.