Tɛsalonika 2, 2 - Bibeli do fee

Woo ce laalɔ

¹ Iŋɛ inɛ nwa ŋa, i jɔ̀ n fɔ idei kubaai Lafɛ̃ɛ nwa Jesu Kirisi do kutɔtɔɔ nwa do nŋu ajɔ. Ǹ wa n tɔɔ ŋɛ

² i maà jɔ̀ idɔ nŋɛ ku dede ńya ńya bii inɛ gɔ ŋa à ni ajɔi Lafɛ̃ɛ í to wa tã. Nɔ i maà jɔ̀ ku mu ŋɛ biti bii à ce waliiɛ walakɔ waazoɛ, walakɔ baa bii à ni awai à kɔɔ bɛɛbɛ.

³ I maà jɔ̀ inɛ gɔ ku dĩ iju nŋɛ si ide kãma. Ajɔi Lafɛ̃ɛu ku bɛi ku to wa inɛ nkpɔi á fũsi naanɛ ku dasiɛ awɔ. Si anyii nŋu, inɛ iyi wa ba Ilaaɔ̃ ku jau á faata wa, nŋu iyi í jɛ amai nfe ku ce.

⁴ Mbɛɛi Ilaaɔ̃i wa jɛ. Á so araɛ ku re mii fei, nɔ ku kɔ̀si Ilaaɔ̃ do mii iyi inɛ ŋa à waa tɔɔ fei. Kpasɛ̃i Ilaaɔ̃ mɔm nii á koo ku buba ku maa kpe araɛ Ilaaɔ̃.

⁵ I kù ye gigi iyi ǹ sɔ̃ ŋɛ ideu ihɛ̃ tã waati iyi ǹ wa bi tu ŋɛ?

⁶ Amma titã ngɔgɔ wa ganjiɛ ku naa nsɛi, ì nɔ ì mà sãa sãa mii iyi í jɛ ŋa. Si bɛɛbɛ, kaa naa bii kù jɛ waatiɛ í to.

⁷ Ntɔ ntɔ laalɔ wa ce tã si asii, amma í gbe inɛ iyi wa ganjiɛu ku nɛ ku bɛi ku fita gbugbãa.

⁸ Si anyii nŋu, inɛ iyi wa ba Ilaaɔ̃ ku jau á faata wa nɔ amboei kunaai Lafɛ̃ɛ Jesu ku kpa iriɛ. Jesuu, nŋui á kpaa do fufui gɛlɛɛ.

⁹ Inɛ iyi wa ba Ilaaɔ̃ ku jau á naai do gbugbãi Seetam, nɔ ku ce maamaake dimi ikã ikã fei do dobu dobu ŋa ku dĩò ijui inɛ ŋa.

¹⁰ Á nɔ ku ce laalɔ dimi ikã ikã baa yooma fei ku dĩò ijui inɛ ŋa iyi à waa bɔ nfe ku ce. Aa ce nfe domi a kù nɛ kubii ntɔu iyi á faaba ŋa.

¹¹ Ŋɔi í jɔ̀ Ilaaɔ̃ á samba banlala nla nla wa si ŋa ku ba a ya dasi ibo naanɛ.

¹² Bɛɛbɛ mɔi inɛ ŋa iyi a kù dasi ntɔ naanɛ, nɔ à waa ce laalɔ do inɔ didɔ̃, aa so taale dei.

À cica inɛi Tɛsalonika ŋai ku ba a ba faaba

¹³ Iŋɛ inɛ nwa ŋa, iŋɛ iyi Lafɛ̃ɛ í bi, à nɛ ka ya maa saabu Ilaaɔ̃i waati kãma fei na iri nŋɛ, domi Ilaaɔ̃ í cica ŋɛ hai sinteɛ i baò faaba ŋa do gbugbãi Hundeɛ, do naanɛ nŋɛ iyi ì nɛ si ntɔu ŋa. Hundeui í jɔ̀ ì jɛ inɛ kumá ŋa.

¹⁴ Mii iyi Ilaaɔ̃ wa lele mbɛ waati iyi í kpe ŋɛ si laabaau jiidau iyi à sisi nŋɛ, ku ba i nɛ ikpɛ̃ si amboei Lafɛ̃ɛ nwa Jesu Kirisi ŋa.

¹⁵ Na nŋu, iŋɛ inɛ nwa ŋa, i leekĩ dim dim i mu ide ŋa iyi à kɔ ŋɛ si gɛlɛò gɛlɛ walakɔ si tia nwa ŋau.

¹⁶ Nɔ Ilaaɔ̃ Baa nwa, nŋu iyi í bi wa, nɔ do saabui didɔ̃ɛ í mu nwa gbugbã iyi kù nɛ kɔɔ do kpãa ku cɔ jiida, nŋu do Lafɛ̃ɛ nwa Jesu Kirisi takaɛ

¹⁷ a mua idɔ nŋɛ gbugbã, nɔ a jɔ̀ i leekĩ dim dim i ceò icɛ jiida do ide jiida fei ŋa.