Tɛsalonika 2, 1 - Bibeli do fee

Pɔlu í ce inɛi Tɛsalonika ŋa fɔɔ

¹ Amu Pɔlu do Silasi do Timɔtee à ce ŋɛ fɔɔ, iŋɛ inɛi igbɛi Jesu ŋa iyi ì wa Tɛsalonika ŋa, iŋɛ iyi ì jɛ ti Ilaaɔ̃ Baa nwa do ti Lafɛ̃ɛ Jesu Kirisi.

² Ilaaɔ̃ Baa nwa do Lafɛ̃ɛ Jesu Kirisi a mu nŋɛ didɔ̃ do laakai ku sũ.

Ilaaɔ̃ á kiiti inɛ ŋa si ajɔ iyi Kirisi* á nyi wa

³ Iŋɛ inɛ nwa ŋa, í sĩa ka ya maa saabu Ilaaɔ̃ waati kãma fei na iri nŋɛ. I jɔ̀ ka maa ce bɛɛbɛ domi naanɛ ku dasi nŋɛ wa kɔ̃ɔsi ntɔ ntɔ, nɔ kubi iyi ì nɛ iŋɛ duusɔ̃ɔ í la wa kɔ̃ɔsii.

⁴ Ŋɔi í jɔ̀ à waa tɔɔ fufu na iri nŋɛ si igbɛi inɛi Ilaaɔ̃ ŋa na temua nŋɛ do naanɛ ku dasi nŋɛ si ijuukpã do wahala nŋɛ fei.

⁵ Iyi ihɛ̃i wa nyisi kãm kãm iyi kiitii Ilaaɔ̃ í jɛ dee dee, domi ijuukpã iyi ì yɛ fei ŋa na irii bommai Ilaaɔ̃i. Nŋui á jɔ̀ Ilaaɔ̃ ku ka ŋɛ si inɛ ŋa iyi à to a lɔ si bommaɛu.

⁶ Ntɔi, Ilaaɔ̃ á ce iyi í jɛ dee dee. Inɛ ŋa iyi à waa kpã ŋɛ iju, á sã nŋa ijuukpã.

⁷ Nɔ iŋɛ iyi ì waa yɛ ijuukpã ŋau á mu nŋɛ kusĩmi do awa taka nwa. Iyi bɛ á cei si waati iyi Lafɛ̃ɛ Jesu á faata wa hai lele do amaleka ilu gbugbãɛ ŋa.

⁸ Á naai do ina sasa ku ba ku kpã inɛ ŋa iyi a kù mà Ilaaɔ̃ iju, aŋa iyi a kù waa jirima laabaau jiidai Lafɛ̃ɛ nwa Jesu.

⁹ Gbese iyi aa sã nŋa nŋui í jɛ nfe ku ce hee do ajɔ fei. Aa fɛɛfɛ do Lafɛ̃ɛ Jesu do si gbugbã ilu amboeɛ

¹⁰ si waati iyi á nyi wa ku jɛ ilu jirima bi inɛ ŋa iyi à jɛ tɛɛ, nɔ inɛ ŋa iyi à dasiɛ naanɛ ŋa fei aa maa cɔɔ do bɛɛrɛ si ajɔ nŋu. Iŋɛ taka nŋɛ aa wa inɔ nŋa ŋa, domi ì dasi sɛɛda iyi à jɛ nŋɛu naanɛ ŋa.

¹¹ Na ŋɔi í ce à waa ce kutɔɔ ajɔ fei na iri nŋɛ. À waa tɔɔ Aɔ̃ Lafɛ̃ɛ nwa ku jɔ̀ i jɛ kuwɛɛ nŋɛ dee dee si bɛi í jɔ inɛ ŋa iyi à gbɔ kukpeɛ a ce. Nɔ à waa tɔɔ má gbugbãɛ ku jɔ̀ i ce jiida iyi ì waa dasi idɔ ŋa nɔ ku jɔ̀ kucei naanɛ ku dasi nŋɛ ku kɔ̃.

¹² Bɛɛbɛi Lafɛ̃ɛ nwa Jesu á baò amboe hai bi tu ŋɛ, nɔ iŋɛ mɔ i baò amboe hai bi tɛɛ ŋa, do saabui didɔ̃i Ilaaɔ̃ do Lafɛ̃ɛ nwa Jesu Kirisi.