Tɛsalonika 1, 5 - Bibeli do fee

¹ Iŋɛ inɛ nwa ŋa, iyi í jɛ idei ajɔu do waati si bii mii ŋau bɛ á na ku ce, kù jɛ tilasii ka kɔ nŋɛ.

² Iŋɛ taka nŋɛ ì waa mà sãa sãa ŋa iyi Lafɛ̃ɛ á na ku nyi wai si ajɔ iyi inɛ kãma kaa mà, bɛi woo ce ile ŋa à ya naa idũ.

³ Waati iyi inɛ ŋa à waa ni laakai ku sũ í wɛɛ, zigiida kù wɛɛ má, bɛ gbakã iri ku kpai andunya á boe ŋa bɛi ara kuro í ya ba bãasĩ. A kaa ba bii aa sa a bɔ má.

⁴ Amma iŋɛ inɛ nwa ŋa, i kù wa si ilu kuku ŋa hee ajɔu ku zamba ŋɛ bɛi kunaai ile.

⁵ Iŋɛ fei ì jɛ inɛi inya kumá ŋa do inɛi dasã ŋa. Ntɔ ntɔ awa woo dasi naanɛ ŋa a kù jɛ inɛi idũ ŋa iyi à wa si ilu kuku.

⁶ Na nŋu, ka maà sĩ njoo bɛi inɛ ŋa iyi à gbe, amma í sĩa ka wɔ njoo ka maa ceò laakaii ara nwa.

⁷ Idũi inɛ ŋa à ya sĩ njoo, nɔ idũ mɔi woo mɔ atɛ̃ ŋa à ya mɔ atɛ̃ ku maa kpa ŋa.

⁸ Amma awa iyi à jɛ inɛi dasã ŋa, í sĩa ka ya ce laakaii ara nwa. Ka jɔ̀ naanɛ ku dasi do kubi ku degbe wa bɛi ibɔi igũ, nɔ kpãai faaba ku cɔ ku jɛ nwa bɛi fulai isɔ.

⁹ Ntɔ ntɔ, Ilaaɔ̃ kù kpe wa ka naa ka yɛ idɔɔkɔ̃ɛ, amma ku ba ka ba faaba do saabui Lafɛ̃ɛ nwa Jesu Kirisi.

¹⁰ Nŋui í ku na iri nwa ku ba bii à wɛɛ si hunde si waati iyi á nyi wa walakɔ bii à nɔ à ku mɔi, ka wɛɛ do nŋu ajɔ.

¹¹ Na nŋu, i ya mua njɛ gbugbã ŋa nɔ i ya maa sobi njɛ ku ba i la si naanɛ ku dasi nŋɛ, si bɛi ì waa ce tã ŋa.

Ide ankãanyi do fɔɔɛ

¹² Iŋɛ inɛ nwa ŋa, à waa tɔɔ ŋɛ i ya jirima inɛ ŋa iyi à waa ce icɛ ntɔ ntɔ si inɔ nŋɛ, inɛ ŋa iyi Lafɛ̃ɛ í jɔ̀ à waa gbã ŋɛ nɔ à waa nyisi ŋɛ kpãa.

¹³ I jɔ̀ i nɛ kubi nŋa jiida nɔ i mà bɛɛrɛ nŋa ŋa na irii icɛ nŋa. I ya jɔ̀ i wɛɛò laakai ku sũ iŋɛ duusɔ̃ɔ.

¹⁴ À waa tɔɔ ŋɛ iŋɛ inɛ nwa ŋa, i sɔ̃ ilu ika ŋa a ce laakai. Inɛ ŋa iyi à mɔngɔ munya, i mu nŋa gbugbã. I sobi hai nɛ gbugbã ŋa. I temua do inɛ fei ŋa.

¹⁵ I ce laakai ŋa i maà jɔ̀ inɛ gɔ ku sãa kpaasiɛ laalɔ, amma i hanya i cea njɛ jiida waati kãma fei ŋa do inɛ ŋa iyi à gbe fei.

¹⁶ I jɔ̀ i ya nɛ inɔ didɔ̃ waati kãma fei ŋa.

¹⁷ I ce kutɔɔ hai nɛ kɔɔ ŋa.

¹⁸ Bɛi í jɛò fei i saabu Ilaaɔ̃ ŋa. Bɛɛbɛi Ilaaɔ̃ í bi i ce ŋa si kuwɛɛ nŋɛ do Jesu Kirisi.

¹⁹ I maà ganji Hundei Ilaaɔ̃ ku ce icɛ si ŋɛ.

²⁰ I maà donda amuai walii ku ce ŋa.

²¹ Amma i jɔ̀ i wũa mii fei ŋa nɔ i mu iyi í sĩa ŋa.

²² I mu ara nŋɛ si kpãai laalɔ fei ŋa.

²³ Nɔ Ilaaɔ̃ takaɛ, nŋu iyi í jɛ icui laakai ku sũ, ku nya ŋɛ i jɛ titɛɛ mam mam ŋa, nɔ ku degbe hunde nŋɛ do laakai nŋɛ do ara nŋɛ, taale gɔ ku maà wa si, hee ku toò ajɔ iyi Lafɛ̃ɛ nwa Jesu Kirisi á nyi wa.

²⁴ Ilaaɔ̃, nŋu iyi í kpe ŋɛu, í nɛ naanɛ, á nɔ ku ce fei ndɛɛ.

²⁵ Iŋɛ inɛ nwa ŋa, i ce nwa kutɔɔ ŋa.

²⁶ I ce inɛ nwa ŋa fei fɔɔ do kubi ŋa.

²⁷ Ǹ wa n tɔɔ ŋɛ do irii Lafɛ̃ɛ, i cioa inɛ nwa ŋa fei tiau ihɛ̃.

²⁸ Nɔ didɔ̃i Lafɛ̃ɛ nwa Jesu Kirisi ku wa si ŋɛ.