Tɛsalonika 1, 4 - Bibeli do fee

Kuce iyi wa dɔ̃a Ilaaɔ̃ si

¹ Iŋɛ inɛ nwa ŋa, à kɔ nŋɛ si bɛi í sĩa i maa nɛ ŋa ku ba ku dɔ̃a Ilaaɔ̃ si. Ntɔi, ì waa ce bɛɛbɛ tã ŋa. Amma iyi í gbe nsɛi à waa tɔɔ ŋɛ do irii Lafɛ̃ɛ Jesu, i hanya i ce bɛɛbɛ i maa koo ŋa.

² Ntɔ ntɔ, ì mà ikɔ ŋa iyi à ba hai bi Lafɛ̃ɛ Jesu nɔ à sɔ̃ ŋɛ.

³ Mii iyi Ilaaɔ̃ í bi si ŋɛ, nŋui í jɛ i má ŋa, i nɔ ara nŋɛ mam mam i maà ya ce sakara ŋa.

⁴ Iŋɛ fei í sĩa i mà ara nŋɛ ku mu nɔ kuwɛɛ nŋɛ ku má nɔ ku nɛ bɛɛrɛ,

⁵ ku maà ti ku jɛ do kɔdɛɛi ara bɛi dimi mmu ŋa à waa ce, aŋa iyi a kù mà Ilaaɔ̃.

⁶ Si ideu ihɛ̃, inɛ gɔ ku maà raraa kpaasiɛ walakɔ ku jɔɔ takii, domi Aɔ̃ Lafɛ̃ɛ á kpã woo ce mii bɛɛbɛ ŋa fei iju. À nɔ à sɔ̃ ŋɛ à kɔnkɔn du ŋɛ tã à ni i ce laakai ŋa.

⁷ Ilaaɔ̃ kù kpe wa ka naa ka maa ce sakara, amma í bi ka jɛ inɛ kumá ŋa.

⁸ Na nŋu, inɛ iyi í kɔ̀si ikɔ ŋau ihɛ̃, kù jɛ amanɛi í kɔ̀si amma Ilaaɔ̃ takaɛi, nŋu iyi í mu nŋɛ Hundeɛ.

⁹ Iyi í jɛ kubii woo dasi Jesu naanɛ ŋa, kù jɛ tilasi a kɔ nŋɛ wa, domi Ilaaɔ̃ í nyisi ŋɛ si bɛi í jɔ i bi njɛ iŋɛ duusɔ̃ɔ.

¹⁰ Ntɔi, ì nɛ kubii njɛ tã ŋa hee do woo dasi Jesu naanɛ ŋa iyi à wa ilɛi Masedɔni fei. Amma à waa tɔɔ ŋɛ, iŋɛ inɛ nwa ŋa, i hanya i ya maa ce bɛɛbɛ i maa koo ŋa.

¹¹ I kookaai ku ba i ya wa si anu akã ŋa, i ya ce wũai ide iyi í kã ŋɛ, nɔ i ya ce icɛ do awɔ nŋɛ ku ba i ba mii iyi aa maa wɛɛò ŋa si bɛi à jilɛ nŋɛ.

¹² Bii ì waa ce bɛɛbɛ ŋa, isɛɛnɛ nŋɛ á nɛ bɛɛrɛ baa si wajui hai dasi Jesu naanɛ ŋa, nɔ i kaa jɛ asoi inɛ kãma ŋa.

Kunyii Lafɛ̃ɛ wa

¹³ Iŋɛ inɛ nwa ŋa, a kù bi i wɛɛ hai mà yaase iyi í jɛ ti inɛ ŋa iyi à ku ŋa, ku ba i maà nɛ inɔ kufɔ, bɛi inɛ ŋa iyi à gbe, aŋa iyi a kù nɛ kpãa gɔ iyi à waa cɔ.

¹⁴ Awa à dasi naanɛ iyi Jesu í ku, nɔ í jĩ hai si balɛ má. Bɛɛbɛ mɔi à dasi naanɛ iyi inɛ ŋa iyi à dasi Jesu naanɛ à bɛi à ku, Ilaaɔ̃ á jĩ aŋa mɔ má hai si balɛ.

¹⁵ Iyi ihɛ̃ ikɔi Lafɛ̃ɛi à waa sɔ̃ ŋɛ bɛ. Awa iyi aa ka wɛɛ si hunde si waati iyi Lafɛ̃ɛ Jesu á nyi wa, a kaa ka cuaa iku ŋa.

¹⁶ Waati nŋu, aa ka gbɔ anu ku dɔ̃, do imui amaleka nlau do anui kãakãakĩi Ilaaɔ̃. Nɔ Lafɛ̃ɛ takaɛ á kita wa hai lele. Inɛi Kirisi ŋa iyi à ku, aŋai aa tako a jĩ.

¹⁷ Si anyii nŋu, awa iyi à wɛɛ si hunde si waati bɛɛbɛ, á so wa awaò ŋa ajɔ si kudũi ijĩ, nɔ ka ko Lafɛ̃ɛ lele bɛ. Si bɛɛbɛi aa ka maa wɛɛ do Lafɛ̃ɛ hee do ajɔ fei.

¹⁸ Na nŋu, i jɔ̀ i ya maa mua njɛ gbugbã ŋa na ideu ihɛ̃.