Tɛsalonika 1, 3 - Bibeli do fee

¹ Nŋui í jɔ̀ waati iyi idɔ nwa í kɔ̀ ku sũ, à lasabu iyi amu akã n gbe ilui Atɛni.

² Nɔ à bɛ Timɔtee inɛ nwa iyi wa ce icɛ do Ilaaɔ̃ ajɔ́ si icɛi laabaau jiidai Kirisiu. À bɔɔ bi tu ŋɛ ku ba ku sobi ŋɛ i leekĩ si dim dim ŋa, nɔ ku mu nŋɛ gbugbã si naanɛ ku dasi nŋɛu,

³ ku ba baa inɛ akã nŋɛ ku maà jɔ̀ ijuukpãu ku da zigiɛ. Iŋɛ taka nŋɛ ì waa mà si ŋa, inɛ nŋu kù nɛ bɛi á ce iyi kù ba wa.

⁴ Baa hai waati iyi awaɛ ŋa à wɛɛ, à ya ka sɔ̃ ŋɛ wo ka ni aa kpã wa iju. Bɛɛbɛ mɔi í nɔ í ce, si bɛi ì waa mà si sãa sãa ŋa.

⁵ Ŋɔi í jɔ̀ waati iyi idɔm í kɔ̀ ku sũ, ǹ bɛ Timɔtee bi tu ŋɛ bɛ ku ba n mà bɛi naanɛ ku dasi nŋɛ wa yɛ. Ǹ wa n ce njo Seetam woo lɛlɛ inɛu ku maa na ku lɛlɛ ŋɛ i ce dulum ŋa, nɔ icɛ nwa ku na ku jɛ ngbɛ.

⁶ Amma nsɛi iyi Timɔtee í baa hai bi tu ŋɛ, í sɔ̃ wa laabaau jiidai naanɛ ku dasi nŋɛ do kubi nŋɛ. Í sɔ̃ wa iyi ì ya maa ye gigi nwa do kubi ŋa nɔ ì waa bi ku yɛ wa ntɔ ntɔ si bɛi awa taka nwa mɔ à waa bi ku yɛ ŋɛ.

⁷ Na nŋu, iŋɛ inɛ nwa ŋa, baa bii í jɛ à yɛ ijuukpã do wahala fei, inɔ nwa de í tũ do saabui naanɛ ku dasi nŋɛ.

⁸ Bɛbɛi idɔ nwa í baa, si bɛi ì waa leekĩ si kpãai Lafɛ̃ɛ dim dim ŋa.

⁹ Zaka bɛirei aa ka yɔkɔ ka saabu Ilaaɔ̃ na inɔ didɔ̃ nla nla iyi à nɛ si wajui Ilaaɔ̃ Lafɛ̃ɛ nwa na iri nŋɛ.

¹⁰ Dasã do idũ fei à waa tɔɔɛ ntɔ ntɔ ku jɔ̀ ka yɛ ŋɛ do iju má, ku ba mii iyi wa gaizia ŋɛ si naanɛ ku dasiu ka kɔ̃ɔ nŋɛ si.

¹¹ Ilaaɔ̃ Baa nwa takaɛ do Lafɛ̃ɛ nwa Jesu a ce nwa kpãa ka naa bi tu ŋɛ.

¹² Nɔ Lafɛ̃ɛ ku kɔ̃ɔ nŋɛ si kubi si iŋɛ duusɔ̃ɔ do si inɛ fei hee kú to bɛi awa mɔ à bi ŋɛ.

¹³ Nɔ ku jɔ̀ idɔ nŋɛ ku leekĩ si dim dim, ku jɛò dee dee, ku maà nɛ taale gɔ si wajui Ilaaɔ̃ Baa nwa, si waati iyi Lafɛ̃ɛ nwa Jesu á nyi wa do inɛ ŋa iyi í cica fei.