Tɛsalonika 1, 2 - Bibeli do fee

Icɛ iyi Pɔlu í ce Tɛsalonika

¹ Iŋɛ inɛ nwa ŋa, iŋɛ taka nŋɛ ì mà kunaa nwa bi tu ŋɛ kù jɛ ngbɛ.

² Ì mà ŋa iyi à bú wa, à kpã wa iju Filipi à bɛi à naa bi tu ŋɛ. Do nŋu fei, Ilaaɔ̃ í mu nwa wɔɔkɔ à sisiò laabaau jiidaɛ si anini nŋɛ, baa do iyi inɛ ŋa à bi a ganji wa ntɔ ntɔ.

³ Kurara kù wa si waazo nwa, nɔ baa yaase bɛi à waa sisi nŋɛ ideu í jɛ dee dee, a kù waa dĩ iju nŋɛ.

⁴ Amma si bɛi Ilaaɔ̃ í dasi wa naanɛ, í so laabaau jiidaɛ í da nwa si awɔ, bɛɛbɛ mɔi à waa sisi ideu. A kù waa coo si bɛi á dɔ̃a amanɛ ŋa si. À waa cooi bɛi á dɔ̃a Ilaaɔ̃ si, nŋu iyi í mà yaasei idɔ nwa.

⁵ Iŋɛ taka nŋɛ ì mà sãa sãa ŋa nɔ Ilaaɔ̃ í jɛ sɛɛda nwa iyi a kù lɛlɛ ŋɛ do ide didɔ̃ gɔ, a kù nɔ a kù ce waazou ku ba ka gba fia nŋɛ.

⁶ Nɔ a kù waa dɛ saabu bi tu ŋɛ walakɔ bi inɛ gɔ ŋa,

⁷ baa bii aa ka yɔkɔ ka nyisi ŋɛ gbugbã nwa wo si na iyi í jɔ̀ à jɛ woo bɛi Kirisi ŋa. Amma à ce icɛ do daa didɔ̃ si anini nŋɛ bɛi iyei ama í ya ce do amaɛ ŋa.

⁸ Si na iyi í jɔ̀ à bi ŋɛ ntɔ ntɔ, à ya ka tã sɔɔlu, kù jɛ ka na ŋɛ laabaau jiidai Ilaaɔ̃ nŋu akã, amma do kuwɛɛi awa taka nwai, domi à nɛ kubi nŋɛ ntɔ ntɔ.

⁹ Iŋɛ inɛ nwa ŋa, ì waa ye gigi bɛi à ce icɛ si anini nŋɛ hee à gbɛɛji. À ce icɛ dasã do idũ ku ba ka maà jɛ asoi inɛ gɔ nŋɛ si waati iyi à waa sisi laabaau jiidai idei Ilaaɔ̃ si anini nŋɛ.

¹⁰ Iŋɛi ì jɛ sɛɛda nwa ŋa do Ilaaɔ̃ takaɛ iyi isɛɛnɛ nwa si wajui iŋɛ woo dasi Jesu naanɛ ŋau í má, í jɛ dee dee, nɔ taale kãma kù wa si.

¹¹ Iŋɛ fei ì nɔ ì mà ŋa iyi à ce nŋɛi bɛi baa í ya cea amaɛ ŋa.

¹² À mu nŋɛ gbugbã, nɔ à tũ idɔ nŋɛ, nɔ à tɔɔ ŋɛ ntɔ ntɔ i jɔ̀ i maa nɛ ŋa si bɛi á sĩaa Ilaaɔ̃ si, nŋu iyi í kpe ŋɛ si bommaɛ do si amboeɛ.

¹³ À ya ka maa saabu Ilaaɔ̃ ajɔ fei domi si waati iyi à waazo nŋɛ i kù doo ideu si idei amanɛ ŋa, amma ì gbaa ŋai si ti Ilaaɔ̃. Nɔ bɛɛbɛ mɔi í jɛ do ntɔ, nɔ wa ce icɛ si iŋɛ woo dasi Jesu naanɛ ŋa.

¹⁴ Iŋɛ inɛ nwa ŋa, mii iyi í ba igbɛi inɛi Jesu Kirisi ŋa iyi à jɛ ti Ilaaɔ̃ si ilɛi Zudee, nŋui í ba iŋɛ mɔ nsɛi. Ntɔ ntɔ ì yɛ ijuukpã ŋa hai bi inɛi ide nŋɛ ŋa, bɛi inɛ ŋau mɔ à yɛ bi Zuifu ŋa.

¹⁵ Zuifu ŋaui à kpa Lafɛ̃ɛ Jesu do walii ŋau, nɔ à kpã awa mɔ iju. Daa nŋa ci ya dɔ̃a Ilaaɔ̃ si, nɔ à jɛ mbɛɛi inɛ fei.

¹⁶ À ganji mɔm ka cea dimi mmu ŋa waazo iyi á jɔ̀ a ba faaba. Bɛɛbɛi dulum du ŋa iyi à ya maa ce waati kãma fei í teese wa kɔ̃ɔsi wa caa. Amma idɔɔkɔ̃i Ilaaɔ̃ í fuka si iri nŋa bɛbɛi.

Pɔlu í bi inɛi Tɛsalonika ŋau ku yɛ má

¹⁷ Iŋɛ inɛ nwa ŋa, si bɛi à kpɛò njɛ ku yɛ, nɔ à fɛɛfɛ njɛ do ara baa do iyi kù jɛ do idɔ, à waa ce bɛgɛ nŋɛ ntɔ ntɔ nɔ à waa ce kookaai ku ba ka yɛ ŋɛ.

¹⁸ À bi ka nyi wa bi tu ŋɛ bɛ má wo, nɔ amu Pɔlu ǹ dasi idɔ isɛ fɛɛfɛlo n naa bɛ, amma Seetam í da nwa kpãa.

¹⁹ Ajɔ iyi Lafɛ̃ɛ nwa Jesu á nyi wa, yoomai á jɛ kpãa ku cɔ nwa do inɔ didɔ̃ nwa. Mii aa ka tɔɔò fufu má si wajuɛ bii kù jɛ iŋɛ.

²⁰ Ntɔi, na iri nŋɛi aa ka tɔɔ fufu nɔ aa ka nɛ inɔ didɔ̃ na iri nŋɛ.