Sofoni 3 - Bibeli do fee

Zeruzalɛmu kù gbɔ kukpei Ilaaɔ̃

¹ Inɔ kufɔi í jɛ ti ilu ku kɔ̀ ide, iyi í dasi araɛ riisi nɔ í ya maa taa inɛ ŋa gbugbãu.

² Iluu ci ya gbɔ ide kãma, nɔ kù bi ikɔ kãma ku gba. Kù dasi naanɛɛ si Aɔ̃ Lafɛ̃ɛ, nɔ ci ya bɔ kɔkɔi Ilaaɔ̃ nŋu iyi í jɛ Lafɛ̃ɛɛ.

³ Ilaaluɛ ŋau à yɛi bɛi muusu nla ŋa iyi à waa dɔ̃ anu. Woo kiitiɛ ŋau à yɛi bɛi mbo ŋa si waatii alɛ, mbo ŋa iyi a kù nɛ nkãma iyi aa ŋɔ bii iju í má daakɔ.

⁴ Waliiɛ ŋa a kù jɛ ilu laakai jiida ŋa. Woo ce zamba ŋai. Woo weeɛ ŋau à ya riisi mii iyi à nya ikã ku jɛ ti Aɔ̃ Lafɛ̃ɛi, nɔ à ya kua wooda.

⁵ Do nŋu fei, Aɔ̃ Lafɛ̃ɛ njɛ í wa bi tu ŋa bɛ, nɔ í jɛ dee dee. Ci ya ce mii iyi kù jɛ dee dee. Daakɔ fei í ya jɔ̀ dee dee ku jɛɛ ku fita gbugbãai si inya kumá, nɔ ci ya haata ajɔ kãma. Amma inɛ laalɔ kù mà anyɔ.

⁶ Aɔ̃ Lafɛ̃ɛ í ni, ǹ ce nfei ilɛ ŋa, nɔ ǹ lɛgɛ ile kugboka ŋa iyi à wa gontai bindi nŋa ŋau. Ǹ jɔ̀ kpãai ilu nŋa ŋau à baa à ce bomma, inɛ kãma ci ya too do bɛ má. Ǹ ce asɔɔi ilu nla nŋa ŋau. Inɛ kãma kù wa bɛ má.

⁷ Nɔ ǹ fɔ ǹ ni, awɔ Zeruzalɛmu bii í jɛ ì mà bɛɛrɛm wo, nɔ ì jɛsi ì gba ikɔm wo, n kaa n ce nfei kuwɛɛɛ. Waati iyi ǹ wa n kpã inɛɛ ŋa iju fei, à ya hanya a maa mɔsi laalɔ ku cei si isɛɛnɛ nŋa ŋau fei.

⁸ Ŋɔi Aɔ̃ Lafɛ̃ɛ í ni, na nŋu, i degbem ŋa si ajɔ iyi an dedeò mii ndu ŋɛ ŋa ku ko, domi ǹ dasi idɔ n tɔtɔɔ ilɛ ŋa ku ba n tɔtɔɔa aram bomma ŋa nɔ idɔɔkɔ̃ nla nlam ku naa si ŋa. Ntɔ ntɔ, inai idɔɔkɔ̃m nɔu á ce nfei inɛi andunya ŋai mam mam.

Ilaaɔ̃ á kpaasi inɛ ŋa

⁹ An jɔ̀ gɛlɛi inɛi ilɛ ŋau ku maaju ku ba aŋa fei a ya kpe irii amu Aɔ̃ Lafɛ̃ɛ nɔ a ya maa ceem icɛ ajɔ.

¹⁰ Hai icei idoi Etiopi ŋau wa, woo tɔɔm ŋa aŋa iyi à fangaa bii feiu, aa naam amua ŋa wa.

Inɛi Izirɛli ŋa iyi à gbe

¹¹ Si ajɔ nŋu bɛ, iŋɛ inɛm ŋa anyɔ kaa mu ŋɛ má si gãmɛi laalɔ ŋa iyi ì ce fei ì dedeò ide ku kɔ̀ si gãmɛm nɔu ŋa, domi an jɔ̀ inɛ ŋa iyi aa wɛɛò inɔ didɔ̃ na igũ ku jɛ nŋɛu a jĩò ŋɛ, nɔ i kaa jɛ ilu faau si iri kuta kumám nɔu má ŋa.

¹² Zamaa iyi í jɛ ilu are nɔ í kua gbugbãi an jɔ̀ nŋɛ. Zamaau á ba bi ku manji bi amu Aɔ̃ Lafɛ̃ɛ.

¹³ Inɛi Izirɛli ŋa iyi aa gbe ŋau, a kaa ya ce iyi kù jɛ dee dee má. A kaa ya sɔ ibo má, nɔ idei zamba kaa ya wa si gɛlɛ nŋa má, waati iyi aa maa sũ bi ku ce degbe nŋa. Inɛ kãma kaa wɛɛ iyi á da zigi nŋa má.

Kuteesei Zeruzalɛmu

¹⁴ Awɔ Siɔ̃ɔ ilu kusĩau, kɔ̃ iri do inɔ didɔ̃. Awɔ Izirɛli, dɔ̃ anu do inɔ didɔ̃. Ntɔ ntɔ wɛɛò inɔ didɔ̃ do idɔɛ fei, awɔ Zeruzalɛmu ilu kusĩau.

¹⁵ Aɔ̃ Lafɛ̃ɛ í jɔ̀ kiiti í sɛkɛɛ hai bi tɛɛ, nɔ í jɔ̀ mbɛɛɛ í sinda hai bi tɛɛ. Aɔ̃ Lafɛ̃ɛ ilaalui Izirɛli í wa bi tɛɛ. I kù nɛ i jɔ̀ zigiɛ ku maa daò wahala gɔ má.

¹⁶ Si ajɔ nŋu bɛ, aa sɔ̃ Zeruzalɛmu a ni, maà jɔ̀ njo ku muɛ Siɔ̃ɔ, nɔ i maà jɔ̀ wɔɔkɔɛ ku leekĩ.

¹⁷ Aɔ̃ Lafɛ̃ɛɛ í wa bi tɛɛ, nɔ nŋui í jɛ woo ja igũ iyi á faabaɛ. Á wɛɛò inɔ didɔ̃ nla nlai na iriɛ. Kubiɛui á jɔ̀ i ba kuwɛɛ titɔ̃. Á ya dɔ̃ anui do inɔ didɔ̃ na iriɛ.

¹⁸ Aɔ̃ Lafɛ̃ɛ í ni, inɛ ŋa iyi à wa si inɔ kufɔ, an nya inɔ kufɔu ku jĩò ŋai si waatii kutɔtɔɔi jingau ŋau, aŋa iyi à jĩòɛ wo nɔ anyɔ wa wɔ̀ ŋa bɛi aso.

¹⁹ Si waati nŋu bɛi an dede si inɛ ŋa iyi à waa kpãɛ iju ŋau fei. An faaba inɛɛ gɔ ŋa iyi à waa sukutɛ, an tɔtɔɔ inɛ ŋa iyi à nɛò ilɛ mmu ŋau wa. An jɔ̀ a kɔ̃ iri a maa saabu ŋa, nɔ iri nŋa iyi kù nɛ bɛɛrɛ si ilɛu fei wo, á ba bɛɛrɛ.

²⁰ Si waati nŋu bɛ, an baaò iŋɛ inɛm ŋa wa, nɔ si waati nŋu bɛ, an tɔtɔɔ ŋɛ wa. Ntɔ ntɔ an jɔ̀ i nya iri ŋa nɔ zamaai andunyau fei á maa saabu ŋɛi waati iyi an teese yaasei kuwɛɛ nŋɛ. Amu Aɔ̃ Lafɛ̃ɛi ǹ fɔ bɛɛbɛ.