Sofoni 2 - Bibeli do fee

Kukpei woo kaye ara ŋa

¹ I tɔtɔɔ njɛ nɔ i ce lasabu ŋa, iŋɛ inɛi ilɛ ŋa iyi i kù nɛ anyɔ ŋau,

² hee wooda iyi à jilɛu ku maa to wa, nɔ ajɔu ku na ku maa lɔ bɛi fɔfɔ wɛwɛɛ. I tɔtɔɔ nɔ i lasabu ŋa hee idɔɔkɔ̃ nlai Aɔ̃ Lafɛ̃ɛu ku na ku maa naa si ŋɛ, hee ajɔi idɔɔkɔ̃ nlai Aɔ̃ Lafɛ̃ɛu ku maa to wa si ŋɛ.

³ I dɛdɛ Aɔ̃ Lafɛ̃ɛ ŋa iŋɛ fei, iŋɛ woo kaye ara ŋa si ilɛu, iŋɛ iyi ì waa ce bɛi asaiyaɛ í fɔ ŋa. I dɛdɛ dee dee ku jɛ, nɔ i dɛdɛ ara ku kaye ŋa. Á yɔkɔ ku jɛ do yaase bɛɛbɛ, aa ba i manji ŋa si ajɔi idɔɔkɔ̃i Aɔ̃ Lafɛ̃ɛu.

Ijuukpã iyi á naa si inɛi nunui alɛ ŋa

⁴ Ntɔ ntɔ, ilui Gaza á kpɔò bomma, nɔ ilui Asikalɔ̃ɔ mɔ aa lɛgɛɛi. Inɛi ilui Asidodi ŋa mɔ, aa lele ŋai dasã nkpa. Ilui Ekorɔ̃ɔ mɔ, aa lɛgɛɛi.

⁵ Inɔ kufɔi á jɛ ti iŋɛ inɛi Kerɛti ŋa iyi ì wa itĩ tenkuu. Aɔ̃ Lafɛ̃ɛ wa yɛ taale nŋɛ si ide ku fɔɛ. Aɔ̃ Lafɛ̃ɛ í ni, Kanaã ilɛi inɛi Filisi ŋau, an ce nfeɛi. Inɛ kãma kaa wa si ilɛɛu má.

⁶ Itĩi tenkuu á baa ku jɛ bi ku jɛi mɛɛmu ŋa. Tengi bɛi á jɛ bi ku dabii woo degbe ŋa, do tengi bii mɛɛmu gaa ŋa aa ya wa.

⁷ Ilɛi ikpa bɛi á jɛ ti inɛi Zudaa ŋa iyi à ba à fita siu. Tengi bɛi aa ya maa degbe mɛɛmu nŋa ŋa. Alɛ, aa ya koo a sũi kpasɛ̃i inɛi Asikalɔ̃ɔ ŋa, domi Aɔ̃ Lafɛ̃ɛ nŋa á naa si ŋa, nɔ á kpaasi kuwɛɛ nŋau.

Ijuukpã iyi á naa si inɛi nunui daakɔ ŋa

⁸ Ǹ gbɔ iyi inɛi Moabu ŋa do inɛi Amɔɔ ŋa à waa nyaanyi inɛm ŋa, nɔ à fɔ ide à waa yaako ŋa. À wasi ku bu ŋa. À gba ilɛi inɛm ŋa à waa kɔ̃ɔsiò kucĩi tu ŋa.

⁹ Ntɔ ntɔ, hee do kuwɛɛm fei, ide iyi ǹ wa n fɔ wee. Amu Aɔ̃ Lafɛ̃ɛi lele do ilɛ, Lafɛ̃ɛi inɛi Izirɛli ŋa, ǹ ni, inɛi Moabu do inɛi Amɔɔ ŋa aa ce nfei, bɛi inɛi Sodomu do inɛi Gomɔɔ ŋa à ce nfe. Ilɛ nŋau á kpɔò gbaai nɔ agũ ŋai aa biiɛ. Ilɛu á yɛi bɛi à dasi imu, kaa nɛ taasi. Aa ce nfei inyaui hee do ajɔ fei. Inɛm ŋa iyi aa gbe ŋau, aŋai aa ko mii ndu ŋa ŋa, nɔ a gba ilɛ nŋau.

¹⁰ Iyi bɛ á naa si ŋai na faau nŋa, do si na iyi í jɔ̀ à cea zamaai Aɔ̃ Lafɛ̃ɛi lele do ilɛ ŋau laalɔ, nɔ à gba ilɛ nŋa ŋa.

¹¹ Zigi nŋa á da si Aɔ̃ Lafɛ̃ɛ. Aɔ̃ Lafɛ̃ɛ á ce nfei iwɛ̃ ŋa iyi à wa si andunyau fei. Inɛi gũngũm ŋau fei aa sɛɛbata si wajuɛ. Aŋa fei aa sɛɛbatai si ilɛ nŋa ŋa bɛ.

Ijuukpã iyi á naa si inɛi awɔ cangai kpãai inunu ŋa do inɛi awɔ njɛi kpãai inunu ŋa

¹² Iŋɛ inɛi Etiopi ŋa mɔ, an jɔ̀ i ku ŋai si igũ.

¹³ Aɔ̃ Lafɛ̃ɛ á jɔ̀ ijuukpã ku naai si inɛi awɔ njɛi kpãai inunu ŋau, nɔ á jɔ̀ ilɛi Asiri ku ce nfei. Á jɔ̀ ilui Ninivu ku baa ku kpɔò bommai. Ilɛɛ á gbɛi bɛi gbaa.

¹⁴ Si aniniɛ bɛi mɛɛmu gaa ŋa aa ya sũ. Hai mɛɛmu dimi ikã ikã baa yooma fei, do dimii yɛi ku cɔcɔ inyi gɔ do luulugu ŋa. Aa ya sũi idũ si antaii bi ku kpa irii sɔbeɛ ŋa. Aa ya maa gbɔ anu ku dɔ̃i yɛi ŋai hai do bi fɛrɛntii ile ŋau. Hai andɛ bi ku lɔu gbakã, aa maa yɛ idĩ kuku ŋaui, do jĩi ndii sɛɛdi ŋa iyi à lakatiu.

¹⁵ Bɛi ilui Ninivu iyi í tako wa kaaba araɛ nɔ í wɛɛò laakai ku sũu á na ku jɛ mbɛ. Inɛɛ ŋa à ya fɔ wo a maa ni, inɛ kãma kù yɛ bɛi awa. To, nsɛi bɛirei. Iluu wee à lɛgɛɛ, nɔ í baa í jɛ bi kuwai mɛɛmu ŋa. Inɛ ŋa iyi à waa lɔ kɔkɔɛ bɛbɛi fei, à ya maa fã fooi na ideu iyi í tosi ŋa nɔ a maa gbugbã iri.