Sofoni 1 - Bibeli do fee

¹ Aɔ̃ Lafɛ̃ɛ í ba Sofoni ide ku fɔ si waati iyi Zoziasi amai Amɔɔ wa jɛ ilaalui Zudaa. Sofoniu amai Kusii wa jɛ. Kusiu mɔ amai Gedaliai, Gedalia mɔ amai Amariai, nɔ Amaria mɔ wa jɛ amai Ezekiasi.

Ilaaɔ̃ á naaò ijuukpã wa si andunyau fei

² Aɔ̃ Lafɛ̃ɛ í fɔ í ni, an kpa mii iyi í wa si andunyai fei mam mam.

³ An kpa amanɛ ŋai do mɛɛmu ŋa. An kpa yɛi ŋai hee do cɛ̃ɛ ŋa fei. An kpa inɛ laalɔ ŋai hee do icɛ nŋa ŋa iyi wa naaò isɛ ku ko wau fei. N kaa n jɔ̀ inɛ kãma si andunya ihɛ̃.

Ilaaɔ̃ á kpã Zudaa do Zeruzalɛmu iju

⁴ Aɔ̃ Lafɛ̃ɛ í ni, an naaò ijuukpã wai si inɛi Zudaa ŋa do si inɛi Zeruzalɛmu ŋau fei. An nya mii iyi í gbe si inyau ihɛ̃ fei iyi í jɛ ti iwɛ̃ iyi à ya kpe Baaliui. Nɔ baa inɛ kãma kaa maa ye gigii woo weei Baali ŋau má.

⁵ Inɛ ŋa iyi à ya gũ antaii ile sikifa ŋa a maa tɔɔ cukpa do leleaɔ̃ ŋa, an ce nfei aŋa feii. Inɛ ŋa mɔ iyi à ya maa tɔɔm, nɔ a tɔtɔɔ a maa ceò kugbasi do irii iwɛ̃ iyi à ya kpe Molɔkuu, an ce nfe nŋai.

⁶ Amu Aɔ̃ Lafɛ̃ɛ, an ce nfei inɛ ŋa iyi à sinda à toom anyi ŋaui, aŋa iyi a kù waa dɛdɛɛm nɔ a kù waa beem ide kãma ŋau.

⁷ I coko ŋa si wajui Aɔ̃ Lafɛ̃ɛ, domi ajɔ si bii á ce kiitiɛ í maai wa. Aɔ̃ Lafɛ̃ɛ í ce sɔɔlui kuwee, nɔ inɛ ŋa iyi í kpe ŋau, í jɔ̀ à maaju.

⁸ Aɔ̃ Lafɛ̃ɛ í ni, si ajɔi kuweeu, hai akawe ŋa hee do amai ilaalu ŋau, hee ku koo si inɛ ŋa iyi à waa too si kucei inɛ njoo ŋau fei, an kpã ŋa ijui.

⁹ Ajɔ nŋu bɛ, inɛ baa yooma iyi í fo í dingaa si anu kpasɛ̃m nɔu fei, an kpãa ijui. Inɛ ŋau, aŋai à ya maa taa inɛ ŋa gbugbã nɔ a maa zamba inɛ ŋa si inɔ kpasɛ̃i lafɛ̃ɛ nŋa.

¹⁰ Aɔ̃ Lafɛ̃ɛ í ni, ajɔ nŋu bɛ, aa maa gbɔ anu ku dɔ̃ ŋai hai anu koofai cɛ̃ɛ ŋau, do anu ku dɔ̃ ŋa má ikpa ice titɔ̃i iluu, do iba nla nla ikpa iri kuta ŋau.

¹¹ Iŋɛ inɛi Makutɛsi ŋa lawɛ akãi ilui Zeruzalɛmu i dɔ̃ anu ŋa, domi woo nya sĩa ŋau fei aa kui. Inɛ ŋa iyi à ya maa ce wũaai isɔ fũfũ ŋau fei, aa kpa ŋai.

¹² Waati bɛɛbɛ, an wusɛ ilui Zeruzalɛmui do fitila ŋa, nɔ n kpã inɛ ŋa iyi à wɛɛ sɛ̃ɛ ŋau iju, aŋa iyi à fɔ à waa ni, Aɔ̃ Lafɛ̃ɛ ci ya ce jiida, ci ya nɔ ku ce laalɔ.

¹³ Aa ce asɔɔi amani nŋa ŋai, nɔ aa lɛgɛ kpasɛ̃ nŋa ŋa. Aa maa ile ŋa, amma a kaa ba a sũ si. Aa lɔ jĩi ndii rezɛ̃ɛ ŋa, amma a kaa ba vɛ̃ɛ a mɔ.

Ajɔi Aɔ̃ Lafɛ̃ɛ

¹⁴ Ajɔ nlai Aɔ̃ Lafɛ̃ɛu í maai wa. Í maai wa, nɔ wa naai gbãa gbãa. Ibai ajɔi Aɔ̃ Lafɛ̃ɛu í jɔ̀ woo ja igũ wa dɔ̃ anu na zigiida.

¹⁵ Ajɔu, ajɔi idɔɔkɔ̃i. Ajɔi inɔ kufɔi do ajɔi zigiida. Ajɔi wahalai do ajɔi asɔɔ ku ce. Ajɔi ilu kuku nla nlai. Ajɔi kudũi ijĩ do ilu kuku nla nlai.

¹⁶ Ajɔu, ajɔ si bii kuu á dɔ̃ anui. Ajɔ si bii aa dɔ̃ anui igũ si gãmɛi ilu ku nɛ gbugbã ŋaui, do si gãmɛi ile kugboka ŋa iyi à wa si gontai bindii ilu nla ŋau.

¹⁷ An jɔ̀ amanɛ ŋa a dasi inɔ kufɔi. Aa maa nɛi bɛi fɛɛju ŋa si na iyi í jɔ̀ à ce dulum bi amu Aɔ̃ Lafɛ̃ɛ. Njɛ nŋa á fangaai bii fei bɛi sãa, nɔ iku nŋa mɔ á maa nyɔi bɛi mii ndii iri ankitã ŋa.

¹⁸ Isɔ fũfũ nŋa kaa yɔkɔ ku faaba ŋa hee má jɛ wura nŋa si ajɔi idɔɔkɔ̃i Aɔ̃ Lafɛ̃ɛ. Idɔɔkɔ̃ nlaɛ á ce nfei ilɛu feii bɛi ina. Zigiida nla nlai á jɛ waati iyi á ce nfei inɛi andunya ŋau fei.