Iri ku kɔ̃ iyi í dɔ̃ í re 7 - Bibeli do fee

Mudɛ̃ɛ ŋau à ni,

¹ sinda wa, sinda wa, inaaboi Sulami sinda wa ku ba ka cɔɛ. Na mii í ce ì waa cɔ inaaboi Sulami bɛi inɛ iyi wa jojo si bubaa minji.

Mɔkɔu í ni,

² Mudɛ̃ɛ ilu bɛɛrɛ, kutɛɛ ŋa à sĩa si baataɛ ŋau. Gbankiliɛ í yɛi bɛi saba iyi woo ce icɛi awɔ gɔ í ce.

³ Abɛɛ í yɛi bɛi kɔɔfu ku munga anu iyi ci ya kua atɛ̃ vɛ̃ɛ ku dɔ̃ inunu. Inɔɛ í yɛi bɛi bilee iyi à tɔtɔɔ nɔ à kaakoɛ do koko kusĩa ŋa.

⁴ Amɔ minjiɛ ŋa à yɛi bɛi ama kulu minji do bɛi angbãi sika ŋa.

⁵ Kɔ̃ɔɛ í yɛi bɛi ile kugboka ku nɛ gbugbã iyi à ma do inyíi jua. Ijuɛ ŋa à sĩai bɛi inyii fatamai Hɛsebɔ̃ɔ iyi í wa anu koofa iyi à ya kpe Bati-Rabimu. Imɔɛ í yɛi bɛi ile kugboka ku nɛ gbugbãi Libãa iyi wa cɔ ikpa Damasi.

⁶ Iriɛ í ya wai lele bɛi iri kutai Kaamɛli. Ntoi iri sisɔɛ ŋau à waa daanai bɛi acɔi fia nkpɔ. Iyi bɛi í jɔ̀ laakaii ilaalu fei í lɔ siɛ.

⁷ Kusĩaɛ í caa, nɔ ì dɔ̃ ntɔ ntɔ. Awɔ iyi ǹ bi, siɛi inɔ didɔ̃m í wa.

⁸ Ì yɛi bɛi jĩi ndii kpakpa. Amɔɛ ŋa à yɛi bɛi isoɛ ŋa.

⁹ Ǹ ni, an gũ kpakpaui nɔ n mu isoɛ ŋa. Amɔɛ ŋa à yɛ bɛi saai rezɛ̃ɛ bi titom. Amiɛ í nɛ inunui bɛi isoi jĩi gɔ.

¹⁰ Gɛlɛɛ ku cɔ̃ɔcɔ̃ɔ í yɛi bɛi vɛ̃ɛ didɔ̃. Ntɔ ntɔ, nŋui ǹ jilɛa inɛ iyi ǹ biu. Í ya lɔ si anu leleɛ do anu lɛlɛɛ do si inyíɛ ŋai.

Abou í ni,

¹¹ Ti inɛ iyi ǹ biui ǹ jɛ, nɔ kubiɛ fei, sim nii í wa.

Didɔ̃ iyi í wa si kubi Abou í ni,

¹² Awɔ iyi ǹ bi, fita i naa wa ka bɔ si inɔ kokoi jĩi iyi à ya kpe hɛnee kaa maa sũ bɛ.

¹³ Daadaakɔ aa ka dedei ka bɔ si ikoi rezɛ̃ɛ ŋa, kaa cɔ mà à wu kpɔtɔɔ, walakɔ bii koko ŋau à fũ, nɔ ka cɔ bii jĩi ndii gerenadi ŋau à da koko. Bɛi an nyisiɛ kubi.

¹⁴ Isoi jĩi ŋa iyi à ya kpe mandagɔɔ ŋau, à waa dɔ̃ inunu. Bi anu gambo nwa ŋau, à nɛ isoi jĩi didɔ̃ ikã ikã fei. Hai ti adɔ̃ɔyi do ti icĩ fei. Ǹ jilɛ ŋai na irii awɔ iyi ǹ biu.