Iri ku kɔ̃ iyi í dɔ̃ í re 6 - Bibeli do fee

Mudɛ̃ɛ ŋau à ni,

¹ hee iwoi inɛ iyi ì biu í bɔ awɔ iyi ì re inaabo ŋa fei do kusĩa. Do ikpa iwoi í nɛ. Aa ka bɔ ku baɛ ku dɛdɛɛ.

Abou í ni,

² inɛ iyi ǹ biu í bɔi do ikpa lamboɛ. Bɛi fɔfɔ ku dɔ̃ inunu í wa, bɛi wa dabii nɔ wa ka kokoi jĩi ŋau.

³ Amu ti inɛ iyi ǹ biui ǹ jɛ nɔ nŋu mɔ titom nii í jɛ. Ntɔi í yɛ bɛi angbãi iyi wa jɛ fɔfɔ ŋa iyi à nɛ koko ŋa.

Bɛi arai abo iyi à biu í yɛ Mɔkɔu í ni,

⁴ Awɔ iyi ǹ biu ì sĩai bɛi ilu iyi à ya ni Tirisa. Awɔ iyi ǹ biu ì sĩai bɛi Zeruzalɛmu. Aa dede laakaii inɛi bɛi sooge ŋa iyi à tã sɔɔlui igũ.

⁵ Maà maa cɔm, domi ijuɛ ŋau à waa dede laakaim. Ntoi iriɛ ŋau à yɛi bɛi iwo gaa ŋa iyi à waa kita wa hai antaii iri kutai Galaadi.

⁶ Inyíɛ ŋa à yɛi bɛi angudã gaa ŋa iyi à waa fita wa hai bii à wɛ ŋa. À waa fita wai minji minji nɔ kãma nŋa kù gaizia.

⁷ Hai si afei fuugɛsɛɛ, kɛkɛlɛɛ í yɛi bɛi isoi gerenadi nkpa iyi à kpalɔɛ minji.

⁸ Ilaalu á yɔkɔ ku nɛ abo kita, abo mmu mɔ cinɛ. Mudɛ̃ɛ ŋa, inɛ nŋu ŋa a kù nɛ jia.

⁹ Amma bi titom, inaabo akãi í wɛɛ. Nŋui í jɛ inɛ iyi ǹ biu. Nŋu akãi í jɛ ama inaaboi iyeɛ, nɔ iyeu í nɛ kubiɛ ntɔ ntɔ. Mudɛ̃ɛ mmu ŋa, bii à yɔɔ à ya ni ilu inɔ didɔ̃i. Bii aboi ilaalu ŋa do abo mmu ŋa iyi ilaalu í nɛ ŋau à yɔɔ à ya cũui à maa ni,

¹⁰ inaabo yoomai wa faata wa bɛi inya kumái amɛɛjuumá. Í sĩai bɛi cukpa, nɔ wa daanai bɛi inunu. Á dede laakai inɛi bɛi sooge ŋa iyi à tã sɔɔlui igũ.

¹¹ Ǹ bɔ ikoi jĩi bii jĩi ku so ŋau à wa, ǹ koo n cɔ ama jĩi ŋa iyi à fita si lɔɔmau nɔ n cɔ bii rezɛ̃ɛ ŋau à wu kpɔtɔɔ, n ba n cɔ bii jĩi iyi à ya kpe gerenadiu í da koko.

¹² Amma n kù gbɔ yaasei nkãma má. Ì jɔ̀ aram í rɔ awɔ ama inaaboi nyaanze ilu bɛɛrɛ.