Iri ku kɔ̃ iyi í dɔ̃ í re 4 - Bibeli do fee

Mɔkɔu í ni,

¹ awɔ abo kusĩai, awɔ iyi ǹ bi. Ijuɛ í sĩai bɛi ankasiidi hai si afei fuugɛsɛɛ wa. Ntoi iriɛ ŋa à yɛi bɛi iwo gaa ŋa iyi à waa kita wa hai si iri kutai Galaadi.

² Inyíɛ ŋa à fũutai bɛi angudã ŋa iyi à ja nto nŋa wa gbakã à bɛi à waa fita wa hai bii à wɛ ŋa. À waa fita wai minji minji nɔ kãma nŋa kù gaizia.

³ Anu leleɛ do ilɛu fei í yɛi bɛi ikũ wɛwɛɛ nkpa, nɔ gɛlɛɛ í sĩa. Hai si afei fuugɛsɛɛ, kɛkɛlɛ kusĩaɛ í yɛi bɛi isoi gerenadi nkpa iyi à kpalɔɛ minji.

⁴ Kɔ̃ɔɛ í yɛi bɛi ile kugboka ku nɛ gbugbã iyi Davidi í jɔ̀ à mau. Sabaɛ ŋa à yɛi bɛi tɛli dubu do bɛi tongoi woo ja igũ ŋa iyi à kɔa si ileu.

⁵ Amɔ minjiɛ ŋa à yɛi bɛi ama kulu minji do bɛi angbãi sika ŋa iyi à waa jɛ fɔfɔ ŋa.

⁶ Hee iju ku maa má, waati iyi ilu kuku á maa wɛɛ, an bɔ iri kutai tuaei miru do si geete bii tuae ku dɔ̃ inunu jiida í wa.

⁷ Awɔ abo kusĩai ntɔ ntɔ. Awɔ iyi ǹ biu n kù yɛ siɛ lɛɛfi kãma.

⁸ Awɔ iyi à ceem kuwãɛ, naa wa ka nɛ hai iri kutai Libãa. Jɔ̀ awaɛ ka nɛ hai iri kutai Libãa. Ka kita hai antaii iri kutai Amana, do iri kutai Senii do ti Hɛɛmɔɔ. Ka sa hai bi kuwai muusu nla ŋau, do hai iri kuta bi kuwai muãa ŋa.

⁹ Awɔ wecĩm, ì mu idɔm awɔ iyi à ceem kuwãɛ. Iyi ijui awaɛ í ko gbakã ì mu idɔm. Iyi ǹ yɛ lɛgɛ akãi sabaɛu ì mu idɔm.

¹⁰ Kubiɛ í ya jɔ̀ n nɛ inɔ didɔ̃ awɔ wecĩm, awɔ iyi à ceem kuwãɛ. Kubiɛu í re baa atɛ̃ vɛ̃ɛ. Bɛɛbɛ mɔi inunui tuaeɛ í dɔ̃ í re tuae ŋa iyi à gbe fei.

¹¹ Gɛlɛɛ í nɛ ididɔ̃i bɛi nyikɔ̃ awɔ iyi à ceem kuwãɛ. Nyikɔ̃ do amɔi í wa si lɛlɛi amɛɛ. Ibɔɛ ŋa à waa dɔ̃ inunui bɛi jĩi ndii Libãa ŋa.

¹² Ì yɛi bɛi jĩi ndii lambo iyi à cea danga, awɔ wecĩm, awɔ iyi à ceem kuwãɛ. Ì yɛi bɛi isɔ̃ iyi í jɛ titom, isɔ̃m iyi à jilɛɛm.

¹³ Amaawɔɛ ŋa à yɛi bɛi amaawɔi jĩi ndii gerenadi iyi í nɛ iso ku dɔ̃ ku jɛ ŋa, bɛi jĩi ku nɛ inunu jiida ŋa, do bɛi jĩi iyi à ya kpe hɛnee do naadi,

¹⁴ do safarãa do wua ku nɛ inunu jiida gɔ do kanɛli, do jĩi mmu ŋa iyi à nɛ inunu jiida ŋa, do miru, do aloɛsi hee ku koo si jĩi ŋa iyi à nɛ inunu jiida à re fei.

¹⁵ Awɔ ì yɛi bɛi isɔ̃ iyi í wa aninii lambo, isɔ̃ iyi inyiɛ í maaju nɔ í ya maa cã wa hai si iri kutai Libãa ŋa.

Abou í ni,

¹⁶ fufui awɔ njɛi kpãai inunu, dede. Fufui awɔ cangai kpãai inunu, naa wa. I dede si lambom nɔu nɔ i jɔ̀ inunu didɔ̃ɛ ŋau a fangaa ŋa. Inɛ iyi ǹ bi jiidau ku lɔ si lambou nɔ ku ba iso didɔ̃ɛ ŋa ku jɛ.