Iri ku kɔ̃ iyi í dɔ̃ í re 3 - Bibeli do fee

Abou í ce ala si gãmɛi inɛ iyi í biu Abou í ni,

¹ waati iyi ǹ wa n sũ si daayim idũ, ǹ dɛdɛ inɛ iyi idɔm í biu. Ǹ dɛdɛɛ amma n kù yɔɔ.

² Ŋɔi ǹ ni an dedei, n dabii si inɔ ilu do si kpãa ŋa do si bantuma ŋa, n dɛdɛ inɛ iyi idɔm í biu. Ŋɔi ǹ dɛdɛɛ nɔ n kù yɔɔ.

³ Amma ǹ ko woo degbe ŋa iyi à ya maa kaako iluu. Ŋɔi ǹ bee ŋa ǹ ni, i kù yɛɛm inɛ iyi ǹ biu ŋa?

⁴ Iyi ǹ lɔ ŋa gbakã ŋɔi ǹ yɛ inɛ iyi ǹ biu, nɔ ǹ muu n kù jɔ̀ɔ má hee ǹ koo ǹ lɔòɛ inɔ kpasɛ̃, hee inɔ ile tengi bii iyem í so asĩm.

⁵ Iŋɛ mudɛ̃ɛi Zeruzalɛmu ŋa, ntɔ ntɔ, ǹ wa n tɔɔ ŋɛi do irii angbãi ŋa, do kulu ŋa iyi à nɛ ara nŋa, i maà jĩ kubi ŋa. I maà jɔ̀ ku dede ŋa hai kù jɛsi.

Abou í ni,

⁶ Yooi wa baa hai ikpa gbaa bɛi cua. Inɛɛu í nɛ inunui tuae iyi à ya kpe miru do tuae mmu ŋa má iyi woo nya sĩa ŋa à ya maa ta.

⁷ Daayii ilaalu Salomɔɔi à so à waa baaò wa, nɔ woo ja igũ ilu wɔɔkɔi Izirɛli ŋa aŋa kita à waa tooɛ wa cingaa do cingaa fei.

⁸ Aŋa fei à waa mu taakuba nɔ à mà igũ ku ce. Inɛ baa yooma nŋa fei í dĩ taakubaɛ si cingaaɛ í wɛɛò na bii à ko mbɛɛ ŋa idũ.

⁹ Salomɔɔ í jɔ̀ à ceaa kitãi bomma do jĩi gɔ iyi à naaò wa hai ilɛi Libãa. Si kitãui à ya maa soo.

¹⁰ Nɔ à ce kutɛi kitãui do isɔ fũfũ, bi kugbesiɛu mɔ do wura. Inɔi kitãu à biiɛi do acɔ ku nɛ ila nkpa ku yɔgɛɛò boogu. Mudɛ̃ɛi Zeruzalɛmu ŋa à ce si boodai do kubi.

¹¹ Iŋɛ mudɛ̃ɛi Siɔ̃ɔ ŋa, i fita i naa i cɔ ilaalu Salomɔɔ ŋa. Í dasi fulaɛ bɛi iyeɛ í daa si si waati iyi wa ce abɔdɔ̃u. Ajɔ nŋu bɛ, í wɛɛò inɔ didɔ̃i ntɔ ntɔ.