Iri ku kɔ̃ iyi í dɔ̃ í re 2 - Bibeli do fee

¹ Amu ǹ yɛi bɛi kokoi wuai ilɛ jiida. Ǹ yɛi má bɛi kokoi fɔfɔ iyi í wa si lɔɔma ŋa.

Mɔkɔu í ni,

² mudɛ̃ɛm iyi í wa si aninii kpaasiɛ ŋa í yɛi bɛi koko kusĩa iyi í wa si aninii agũ ŋa.

Abou í ni,

³ awaasũm iyi í wa si aninii kpaasiɛ ŋa í yɛi bɛi jĩi iyi í ya so si aninii jĩi mmu ŋa si inɔ agbo. Si abɛ jĩjĩɛi ǹ ya n bi ku buba, nɔ isoɛ ŋa à ya dɔ̃ɔm sii ntɔ ntɔ.

⁴ Í gbãm í bɔòm bii à ya jɛ jingau nla ŋa, nɔ í biim do kubi.

⁵ Kubi í jɔ̀ ǹ wa n ce bɔ̃ɔ nɔ ǹ ni ku muum gbugbã do kaa didɔ̃ nɔ ku tũ idɔm do isoi jĩi ŋa.

⁶ Awɔ cangaɛ wa mu irim, nɔ awɔ njɛɛ í sakoom.

⁷ Iŋɛ mudɛ̃ɛi Zeruzalɛmu ŋa, ntɔ ntɔ, ǹ wa n tɔɔ ŋɛi do irii angbãi ŋa, do kulu ŋa iyi à nɛ ara nŋa, i maà jĩ kubi ŋa. I maà jɔ̀ ku dede ŋa hai kù jɛsi.

Mɔkɔu wa baa Abou í ni,

⁸ i sotĩ i gbɔ imui inɛ iyi ǹ biu ŋa. I cɔ nŋu wee wa baa. Í fo wa dingaa si iri kuta ŋa do geete ŋa wa.

⁹ Aa ni bɛi angbãi walakɔ ama kului. I cɔ nŋu wee wa leekĩ do alalai idĩi ile nwa wa cɔ ilu wa hai do fɛrɛnti hai si afei isɔ wɛwɛɛ ŋau.

¹⁰ Ŋɔi í bam ide ku fɔ í ni, abo kusĩa, awɔ iyi ǹ bi, dede i naa wa.

¹¹ Wee waatii sɔnkpasa í lɔ, ijĩ kaa wɔ má, í nɛ mbɛ.

¹² Si ilɛu, jĩi ŋa à da koko bii fei, awaati bii inɛ fei í ya maa kɔ̃ irii. Kufe ŋa à ya maa kpatai bii fei si ilɛ nwau.

¹³ Jĩi ndii figi ŋa à sinti ku so, nɔ rezɛ̃ɛ ŋa mɔ koko nŋa wa dɔ̃ inunu. Abo kusĩa, awɔ iyi ǹ bi, dede i naa wa.

¹⁴ Awɔ iyi ì yɛ bɛi ankasiidi iyi wa manji si isai kuta ŋa, walakɔ si afei kuta ŋa, jɔ̀ n yɛ wajuɛ, jɔ̀ n gbɔ imuɛ, domi imuɛ í dɔ̃ ku gbɔ, nɔ wajuɛ mɔ í sĩa ntɔ ntɔ.

Iyei abou í ni,

¹⁵ i mu nwa akã ŋau ŋa, ama mɛɛmu ŋa iyi à waa bɛjɛ rezɛ̃ɛ nwa ŋa hai à waa sinti koko ŋau.

Abou í ni,

¹⁶ inɛ iyi ǹ biu, titom nii í jɛ, amu mɔ ǹ jɛ titɛɛ. Ntɔi í yɛ bɛi angbãi iyi wa jɛ fɔfɔ ŋa iyi à nɛ koko ŋa.

¹⁷ Baa wa awɔ iyi ǹ bi. Jɔ̀ i yɛ bɛi angbãi do bɛi ama kulu iyi wa jɛ si afei lɔɔmai iri kuta minji hee iju koo máò nɔ ilu kuku kaa wɛɛ má.