Iri ku kɔ̃ iyi í dɔ̃ í re 1 - Bibeli do fee

¹ Iri ku kɔ̃ iyi í dɔ̃ í re iri ŋa fei, ti Salomɔɔi.

Faajii abo do mɔkɔ Abou í ni,

² baabaam, baabaam, kubiɛu í re baa atɛ̃ vɛ̃ɛ.

³ Inunui tuaeɛ í dɔ̃ jiida jiida. Ì yɛi bɛi tuae iyi inunuɛ í fangaa. Na ŋɔi í jɔ̀ mudɛ̃ɛ ŋa à nɛ kubiɛ.

⁴ Mu awɔm i fam nɔ ka sɛi ajɔ. Awɔi ì jɛ ilaalum, gbãm i bɔòm ilaawaɛ. ka kpɛ̃ ididɔ̃ nla nla na iriɛ. Ka kɔ̃ iri na kubiɛ iyi í re vɛ̃ɛ didɔ̃. Mudɛ̃ɛ ŋa à nɛ ntɔ a nɛ kubiɛ.

Mudɛ̃ɛ ŋa à ni, Abou í ni,

⁵ Iŋɛ mudɛ̃ɛi Zeruzalɛmu ŋa, amu amanɛ daabɔɔsii amma ǹ sĩai bɛi ilei acɔi inɛi Kedaa ŋa do bɛi acɔi kpasɛ̃i Salomɔɔ ŋa.

⁶ I maà ti i maa cɔ ara daabɔɔsim nɔu bɛɛbɛ ŋa, inunui í jɔ̀ aram í kpã bɛɛbɛ. Wecĩm ŋa à waa ce idɔɔkɔ̃ do amu nɔ à jilɛm n maa n cɔ ikoi jĩi ndii rezɛ̃ɛ ŋa. Amma n kù degbe ikoi jĩi ndii amu takam.

⁷ Sɔ̃m, awɔ iyi ǹ nɛ kubiɛ iwoi ì ya degbe mɛɛmu gaaɛ ŋa. Iwoi ì ya jɔ̀ mɛɛmu gaaɛu ku sĩmi dasã. Do yaase bɛɛbɛ, n kaa n bɔ ku dɛdɛɛ bii fei si inɔi mɛɛmu gaa mmu ŋa má.

Mudɛ̃ɛ ŋau à ni,

⁸ awɔ iyi ì re inaabo fei do kusĩa, bii i kù mà inyau, fita i too akpai angudãɛ ŋa nɔ i gbã ama iwoɛ ŋa, i koo i maa cɔ ŋa kɔkɔi kpasɛ̃i woo degbe ŋau.

Mɔkɔu í ni,

⁹ awɔ iyi ǹ bi, ì yɛ bɛi acĩ abo iyi wa fa akɔi igũi Faraɔ̃ ilaalui Ezibiti.

¹⁰ Hanlaga ŋa iyi ì ya dasii í ya jɔ̀ kɛkɛlɛɛ ku sĩa. Kɔ̃ɔɛ í ya sĩai na saba ŋa.

Mudɛ̃ɛ ŋau à ni,

¹¹ aa ka ceɛ sabai wura ŋa, do boodai isɔ fũfũ ŋa.

Abou í ni,

¹² waati iyi ilaalu wa buba do inɛɛ ŋa, inunui tuae jiidam nɔu í bii ŋai.

¹³ Inɛ iyi ǹ bi jiidau í yɛɛm nii bɛi bɔgɔ bata si bii miru í wa nɔ í naa í cuku si gɛndɛm.

¹⁴ Inɛ iyi ǹ bi jiidau í yɛɛm nii bɛi kokoi jĩi gɔ iyi à ya kpe hɛnee iyi í fita si ikoi jĩi ndii rezɛ̃ɛ ŋa Eni-Gedi.

Mɔkɔu í ni,

¹⁵ awɔ iyi ǹ bi, awɔ mudɛ̃ɛ kusĩai. Ì sĩa nɔ ijuɛ ŋa à yɛi bɛi ankasiidi.

Abou í ni,

¹⁶ awɔ iyi ǹ bi, awɔ awaasũ kusĩai. Awɔi í sĩaam si. Daayi nwa í yɛi bɛi fɔfɔ tũtũ.

¹⁷ Jĩi iyi à ya kpe sɛɛdii à ceò kaakatai ile nwau. Laasiɛ ŋau mɔ à ce ŋai do jĩi ndii sipɛrɛɛsi.