Samuɛli 2, 9 - Bibeli do fee

Davidi í gba Mefibosɛti amai Zonatãa si kpasɛ̃ɛ

¹ Ajɔ nŋu gɔ Davidi í bee í ni, inɛ kãma kù gbe má si kpasɛ̃i Saulu iyi an ba n ceaa jiida na saabui Zonatãa?

² Woo ce icɛ kpasɛ̃i Saulu gɔ wee í wa bɛ, à ya kpoo Siba. Nɔ Davidi í ni a koo a kpoo wa. Iyi í to wa, nɔ í beeɛ í ni, awɔi à ya kpe Siba? Nɔ í jɛ í ni, oo, amu mbɛ lafɛ̃ɛ.

³ Ŋɔi Davidi í beeɛ í ni, inɛ kãma kù gbe má si kpasɛ̃i Saulu iyi an ba n ceaa jiida bɛi ǹ cea Ilaaɔ̃ kuwãɛ. Nɔ Siba í jɛaa í ni, ama akãi Zonatãa gɔ í gbe bɛ nɔ í jɛ wɛɛgɛ.

⁴ Ŋɔi Davidi í beeɛ í ni, iwoi í wa. Nɔ Siba í jɛaa í ni, í wa Lo-Dabaa kpasɛ̃i Makii amai Amiɛli.

⁵ Ŋɔi Davidi í bɔɔ Lo-Dabaa koo gbãa wa.

⁶ Iyi Mefibosɛti amai Zonatãa tɔkui Saulu í to wa bi Davidi, ŋɔi í sɛɛbata si wajuɛ. Nɔ Davidi í kpoo í ni, Mefibosɛti. Ŋɔi í jɛ í ni, amu wee lafɛ̃ɛ.

⁷ Ŋɔi Davidi í sɔ̃ɔ í ni, maà jɔ̀ zigiɛ ku da, domi ǹ bi ǹ ceɛ jiidai na saabui Zonatãa baaɛ. An sindoɛ buɛi balaɛ Saulu fei, nɔ kpasɛ̃m ihɛ̃i aa ya maa jɛ hee do ajɔ fei.

⁸ Ŋɔi Mefibosɛti í sɛɛbata má í ni, lafɛ̃ɛ, yooi ǹ jɛ iyi ì waa ce laakaim bɛ ihɛ̃, amu iyi ǹ jɛ bɛi aja iku.

⁹ Ŋɔi ilaaluu í kpe Siba woo ce icɛi Sauluu, í sɔ̃ɔ í ni, mii iyi í tako í jɛ ti Saulu lafɛ̃ɛɛu fei, hee do iyi í jɛ ti kpasɛ̃ɛu fei, ǹ na Mefibosɛti tɔkuɛu fei ndɛɛ.

¹⁰ Awɔi aa maa logooaa ikoɛ ŋa, awɔ do amaɛ ŋa do woo ce icɛɛ ŋa. Nɔ i ya daa amaajɛ ŋau ku ba ku ya ba sɔndai kpasɛ̃ɛ. Mefibosɛti takaɛ kpasɛ̃m ihɛ̃i á ya maa jɛ waati kãma fei. Nɔ wee Siba í nɛ ama maatũ do woo ce icɛ kɔnfia.

¹¹ Ŋɔi í jɛa ilaaluu í ni, lafɛ̃ɛ, an ce bɛi ì jilɛɛm nɔu fei. Nɔ Mefibosɛti í ya koo maa jɛ kpasɛ̃i Davidi bɛi amaɛ.

¹² Mefibosɛti í nɛ ama awaasũ gɔ iyi à ya kpe Mika, nɔ inɛ ŋa iyi à wa kpasɛ̃i Siba ŋa fei à jɛ woo ce icɛɛ ŋa.

¹³ Mefibosɛti wɛɛgɛu, í koo í wa Zeruzalɛmu ku ba ku maa jɛ kpasɛ̃i ilaaluu waati kãma fei.